~~~~~~~~⊰❂ unicode ❂⊱~~~~~~~~

အဆိုပါ ငွေစာရင်းကို လွှတ်တော်သို့ တင်ပြရန် တိုင်းဒေသကြီးလွှတ်တော်ဥက္ကဋ္ဌက အစိုးရအဖွဲ့ထံ နှစ်ကြိမ်တောင်းခံခဲ့ပြီး ပြည်သူ့ ငွေစာရင်းကော်မတီက ငွေစာရင်းဌာန ဒုတိယညွှန်ကြားရေးမှူးချုပ် အပါအဝင် လွှတ်တော်ဝန်ထမ်း (၇)ဦးဖြင့် ဘတ်ဂျက်စစ်ဆေးရေးအဖွဲ့ ဖွဲ့ထားသည့်အပြင် ကော်မတီ (၁၀)ခုကလည်း စစ်ဆေးရန်နှင့် လွှတ်တော်ကိုယ်စားလှယ်များကလည်း မြို့နယ်အလိုက် စိစစ်နိုင်ရန် ပြင်ဆင်ထားခဲ့သော်လည်း အစိုးရအဖွဲ့က ငွေစာရင်းတင်ပြမှု နောက်ကျသဖြင့် စိစစ်နိုင်ခြင်း မရှိခဲ့ခြင်းဖြစ်ကြောင်း သိရသည်။

“လွှတ်တော်အဖွဲ့က စီစဉ်မှုအပြည့်နဲ့ လုံ့လစိုက်ထုတ်ထားပေမဲ့ ကျွန်တော်တို့ဆီကို (၁၀)ရက်ကျော်မှ ရောက်လာတော့ (၂၇)ရက်နေ့လောက် အထိ စိစစ်နိုင်မယ်လို့ လွှတ်တော်က ချိန်ဆထားပေမဲ့ ဇွန်လ(၁၈)ရက်နေ့မှာ ဒုသမ္မတဆီ တင်ရမယ်ဆိုပြီးတော့ အစိုးရအဖွဲ့ရဲ့ ပြောကြားတောင်းဆိုချက်ကြောင့် ပြည်သူ့ငွေစာရင်း ကော်မတီရဲ့တာဝန်ဖြစ်တဲ့ ဘတ်ဂျက်ကိုစိစစ်ပြီး အစီရင်ခံစာရေးတင်ရမယ့်တာဝန်ကို ထမ်းဆောင်နိုင်ခြင်း မရှိခဲ့ပါဘူး ”ဟု ပြည်သူ့ ငွေစာရင်းကော်မတီ ဥက္ကဋ္ဌ ဦးတင့်လွင်က တာချီလိတ်သတင်းအေဂျင်စီသို့ ပြောသည်။

၂၀၁၈ ခုနှစ်၊ ဇွန်လ(၁၅)ရက်တွင်ပြုလုပ်သော ဒုတိယအကြိမ် မကွေးတိုင်းဒေသကြီးလွှတ်တော် အရေးပေါ် အစည်းအဝေး (၃/၂၀၁၈) ဒုတိယနေ့တွင် စိစစ်နိုင်ခြင်းမရှိဘဲ အတည်ပြုခဲ့ရသည့် ငွေစာရင်းအား ပြည်ထောင်စုအဆင့်သို့ တင်ပြထားစဉ် ကာလအတွင်း လွှတ်တော်အနဖြေင့် ပြန်လည်စိစစ်ရန် တိုင်းဒေသကြီးလွှတ်တော်ဥက္ကဌက တိုက်တွန်းထားသည်။

“၂၀၁၈ - ၂၀၁၉ ဘဏ္ဍာနှစ်မှာ လုပ်ထားတဲ့ဟာတွေကို ဘာတွေသုံးနေတယ်ဆိုတာ စိစစ်ဖို့လိုပါတယ်။ တစ်ချို့အသုံးတွေက စာရင်းစာအုပ်တွေကို် သေချာမကြည့်နိုင်သေးဘဲ အပေါ်ယံကြည့်တာတောင် ကုန်ကျသင့်တာထက် ပိုများနေတာတွေ့ရှိပါတယ်။ ပိုပြီးအရေးကြီးမယ့် ပိုပြီးထိရောက်မယ့်ကိစ္စတွေကို ၂၀၂၀ အတွင်းမှာ ဆောင်ရွက်နိုင်အောင် ငွေစာရင်းကို ပြည်ထောင်စုက ပြန်ကျမလာခင် စိစစ်လေ့လာ ပြင်ဆင်ထားဖို့ လွှတ်တော်ကိုယ်စားလှယ်တွေကို တိုက်တွန်းပါတယ်” ဟု လွှတ်တော်အစည်းအဝေးတွင် ဥက္ကဋ္ဌ ဦးတာက ပြောသည်။

အခြားပြည်နယ်နှင့်တိုင်းများတွင် လွှတ်တော်ဥပဒေပုဒ်မ (၁၃၅) တွင်ပြဌာန်းထားသည့်အတိုင်း ၂၀၁၈-၂၀၁၉ ရသုံးမှန်းခြေငွေစာရင်းများကို လွှတ်တော်သို့ တစ်လမှ သုံးလခန့်အထိ ကြိုတင်ပေးနိုင်ကြသဖြင့် မန္တလေးတို်င်းတွင် (၁၂)ဘီလီယံ၊ မွန်ပြည်နယ်တွင် (၁၀)ဘီလီယံ၊ ရန်ကုန်တိုင်းတွင် (၇)ဘီလီယံ၊ ပဲခူးတိုင်းတွင် (၆)ဘီလီယံလွဲနေသည်ကို စိစစ်တွေ့ရှိ၍ လွှတ်တော်က ပြန်လည်တည့်မတ်ပေးနိုင်ခဲ့ကြောင်း သိရသည်။

ယခင်အစိုးရလက်ထက်က ရေးဆွဲခဲ့သည့် ၂၀၁၆-၂၀၁၇ ဘဏ္ဍာနှစ်ဘတ်ဂျက်ထဲတွင် လမ်းဦးစီးဌာနက ကတ္တရာနှင့် ကျောက်စရစ်ဝယ်ယူရန် တင်သွင်းထားသည့် ပမာဏမှ (၁၀.၂၇)ဘီလီယံကို မကွေးတိုင်းဒေသကြီး လွှတ်တော်က စိစစ်နိုင်ခဲ့ကြောင်း သိရသည်။

သတင်း - ဖီးနစ်
ဓာတ်ပုံ - လွှတ်တော်