~~~~~~~~⊰❂ unicode ❂⊱~~~~~~~~

နိုင်ငံကူးလက်မှတ်လျှောက်ထားခြင်းကို ကြားပွဲစားများဖြင့် မလုပ်ကြရန်နှင့် သတ်မှတ်နှုန်းထားထက် ငွေကြေးပိုယူခြင်းများ ရှိပါက တိတိကျကျ တိုင်ကြားကြရန် မြန်မာနိုင်ငံကူးလက်မှတ် ထုတ်ပေးရေးရုံးခွဲ (တာချီလိတ်)မှ တာဝန်ခံအရာရှိ ဒုတိယရဲမှူးကြီးအေးနိုင်က အသိပေးတိုက်တွန်းလိုက်သည်။

“ပွဲစားတော့ မဟုတ်ဘူး။ တချို့က ရှမ်းလိုပဲတတ်ကြတော့ ဘာသာပြန်ပေးဖို့ ပါလာတာတွေလည်းပါတယ်။ ငွေကြေး ပိုယူတယ်ဆိုရင် ဘယ်သူတွေ လုပ်သလဲဆိုတာ တိတိကျကျ လာတိုင်တာတော့ ခုထိမရှိသေးဘူး။ ဘေးမှာတော့ ပြောနေတာပဲ။ အဲဒီလိုလုပ်နေတဲ့သူက ဝန်ထမ်းလား၊ အပြင်လူလား သိဖို့လိုတယ်။ ကျွန်တော်တို့ ဒီမှာ တရားဝင် စာကပ်ထားတယ်။ မသိတာတွေ ရှိရင်မေးနိုင်တယ်။ သတ်မှတ်ငွေကြေးထက် ပိုယူတာတွေရှိရင် တိုင်ကြားနိုင်တယ်။ ဒီလိုလုပ်တာက အပြင်လူလား၊ ဝန်ထမ်းလား သိဖို့လိုတယ်။ ကျွန်တော်တို့ ညှိနှိုင်း ဖြေရှင်းပေးတာ၊ အရေးယူတာတွေလုပ်မယ်။ အရပ်သား ပွဲစားဘာလုပ်တယ် ညာလုပ်တယ် ဆိုရင်တော့ ကျွန်တော်တို့က ဖြေရှင်းပေးလို့ မရဘူး။ ရဲနဲ့သက်ဆိုင်မှာပေါ့။ ကျွန်တော်တို့ ဝန်ထမ်းတွေဆိုရင်တော့ လာဘ်ပေးလာဘ်ယူမှု ဥပဒေအရ ကျွန်တော်တို့ အရေးယူလို့ရတယ်”ဟု မြန်မာနိုင်ငံကူးလက်မှတ် ထုတ်ပေးရေးရုံးခွဲ (တာချီလိတ်)မှ တာဝန်ခံအရာရှိ ဒုတိယရဲမှူးကြီးအေးနိုင်က တာချီလိတ်သတင်းအေဂျင်စီသို့ ပြောသည်။

ထိုင်းနိုင်ငံတွင် နိုင်ငံခြားသားလုပ်သားများ အတွက် အလုပ်သမားဥပဒေအပြောင်းအလဲကြောင့် ထိုင်းနိုင်ငံတွင် အလုပ်လုပ်ကိုင်နေသည့် မြန်မာနိုင်ငံသားအများစု အထောက်အထားမပြည့်စုံမှုကြောင့် နေရပ်ပြန်လာရပြီးနောက်၎င်းတို့အနဖြေင့် နိုင်ငံကူးလက်မှတ်အလွယ်တကူပြုလုပ်နိုင်စေရေးအတွက် ထိုင်းနိုင်ငံနှင့် နယ်စပ်မြို့များဖြစ်သည့် တာချီလိတ်၊ ကော့သောင်းနှင့် မြဝတီတို့တွင် နိုင်ငံကူးလက်မှတ် ထုတ်ပေးရေးရုံးခွဲများကို ၂၀၁၇ ခုနှစ် စက်တင်ဘာလ (၂၅)ရက်နေ့မှစတင် ဖွင့်လှစ်ဆောင်ရွက်ပေးနခြေင်း ဖြစ်သည်။

“ကျွန်တော်တို့ ဒီမှာ ရုံးထိုင်အလုပ် လုပ်တယ်ဆိုတာက တစ်ဖက်နိုင်ငံမှာ အလုပ် လုပ်နေရတဲ့ ကျွန်တော်တို့ နိုင်ငံသားတွေ လိုအပ်တဲ့ အထောက်အထားတွေ အလွယ်တကူ ရနိုင်အောင်၊ ကုန်ကျစရိတ်တွေ သက်သာအောင် ပြုလုပ်ပေးဖို့ ရုံးဖွင့်လှစ် လုပ်ဆောင်နေတာပါ။ ဒီလိုလုပ်တဲ့အခါမှာ ယိုးဒယား (ထိုင်း)ဘက်မှာ အလုပ် လုပ်နေရတဲ့ အလုပ်သမားတွေက ဒီဘက်လာလုပ်ဖို့ ခွင့်ရက်၊ သွားလာရေး ဒါတွေကို အေးဂျင့်လိုမျိုးနဲ့ စီစဉ်ကြပါတယ်။ ကျွန်တော်တို့ရုံးကတော့ သတ်မှတ်နှုန်းထား အတိုင်းပဲ ဆောင်ရွက်ပေးနေပါတယ်”ဟု မြန်မာနိုင်ငံကူးလက်မှတ် ထုတ်ပေးရေးရုံးခွဲ (တာချီလိတ်)မှ တာဝန်ခံအရာရှိ ဒုတိယရဲမှူးကြီးအေးနိုင်က ပြောသည်။

မြန်မာနိုင်ငံကူးလက်မှတ် ထုတ်ပေးရေးရုံးခွဲ (တာချီလိတ်)မှ ပထမဆုံးထုတ်ပေးမည့် နိုင်ငံကူးလက်မှတ် စာအုပ်များလျှောက်ထားရာ အချက်အလက် မမှန်မကန် ဖြည့်သွင်းထားသူများလည်း ပါဝင်သဖြင့် ပြန်လည်စိစစ်မှုများ လုပ်ဆောင်နေရသဖြင့်၎င်းတို့အတွက် သတ်မှတ်ရက်ထက် နောက်ကျမည်ဖြစ်ကြောင်း သိရသည်။

“ကျွန်တော်တို့က စာအုပ်တွေက ဒီမှာရေးတာ မဟုတ်ဘူး။ ရန်ကုန်ကို လှမ်းပို့ရတယ်။ အဲဒီမှာ အချက်အလက်တွေ မမှန်မကန် ဖြည့်တာမျိုးတွေက သတ်မှတ်ရက်ဖြစ်တဲ့ (၁၀)ရက်အတွင်း မရနိုင်တော့ဘူး။ ဥပမာ ရန်ကုန်ရုံးမှာ စစ်ဆေးတဲ့အခါမှာ တချို့က စာအုပ်ရှိဖူးပေမဲ့ စာအုပ်မရှိဖူးဘူးဆိုပြီး ဖြည့်ထားတာမျိုးဆို သူဘာကြောင့် လိမ်ညာထားလဲဆိုတာ ပြန်စစ်ရပြီ။ ဒီလိုမျိုးဆိုရင် ကြန့်ကြာပြီပေါ့။ ပုံမှန်အတိုင်း မှန်မှန်ကန်ကန်ဖြည့်တဲ့သူတွေဆိုရင်တော့ သတ်မှတ်ရက်အတွင်း ရပါတယ်”ဟု ဒုတိယရဲမှူးကြီးအေးနိုင်က ပြောသည်။

မြန်မာနိုင်ငံကူးလက်မှတ်ထုတ်ပေးရေးရုံးခွဲ(တာချီလိတ်)အား တာချီလိတ်မြို့ ဆန်ဆိုင်း(ခ)ရပ်ကွက်၊ ရှမ်းရိုးမကွင်းရှေ့ရှိ အောင်ချမ်းသာတိုက်တန်းတွင် ဖွင့်လှစ်ထားခြင်းဖြစ်ပြီး စက်တင်ဘာလ(၂၉)ရက်နေ့ အထိ ဒေသတွင်းနှင့် ထိုင်းနိုင်ငံရောက် မြန်မာလုပ်သားများ နိုင်ငံကူးလက်မှတ်လျှောက်ထားမှု (၂၀၀)နီးပါးရှိကြောင်း သိရသည်။

သတင်း - ချယ်ရီထိုက်
ဓာတ်ပုံ - ယာဆေး