~~~~~~~~⊰❂ Unicode Version ❂⊱~~~~~~~~

ဆွီဒင်နိုင်ငံတွင် သဘာဝပတ်ဝန်းကျင်ထိန်းသိမ်းရန် လေကြောင်းခရီးအစား ရထားအသုံးပြုမှုများလာ
********************
ဆွီဒင်နိုင်ငံတွင် သဘာဝပတ်ဝန်းကျင်ထိန်းသိမ်းသည့်အနေဖြင့် လေယာဉ်ဖြင့်ခရီးထွက်ခြင်းအစား ရထားကို အသုံးပြုမှုများလာနေကြောင်း သိရသည်။

ဆွီဒင်နိုင်ငံလူထုအတွင်း Flight Shame လှုပ်ရှားမှုကြောင့် လေဆိပ်များတွင် ၂၀၁၉ ခုနှစ်အတွင်း ခရီးသွားအရေအတွက် (၈)ရာခိုင်နှုန်းအထိ ကျဆင်းသွားကြောင်း သိရသည်။

ရာသီဥတုပြောင်းလဲမှုသိသာလာသည်နှင့်အမျှ ဆွီဒင်နိုင်ငံသားများက သဘာဝပတ်ဝန်းကျင်ထိခိုက်နိုင်သည့် ခရီးသွားလာခြင်းကို လျှော့ချလာကြသည့် အကျိုးဆက်အနေဖြင့် လွန်ခဲ့သည့်နှစ် ကာလတူနှင့် နှိုင်းယှဉ်ပါက ပြည်တွင်းလေကြောင်းလိုင်းများတွင် ဧပြီလအတွင်း (၁၅)ရာခိုင်နှုန်းအထိကျဆင်းလာကြောင်း သိရသည်။

မကြာမီက ကောက်ယူခဲ့သည့်စစ်တမ်းအရ ဆွီဒင်နိုင်ငံသားလေးပုံတစ်ပုံက ကမ္ဘာကြီးအားကယ်တင်ရန်အတွက် လေယာဉ်မစီးရန်ဆုံးဖြတ်သည်ဟု ဖြေကြားထားကြောင်း သိရသည်။

ဆွီဒင်နိုင်ငံသည် ဥရောပတွင် လေကြောင်းခရီးသွားလာမှုအများဆုံး တစ်နိုင်ငံဖြစ်သော်လည်း ယခုနှစ်ပိုင်းမှစ၍ ခရီးရှည်များကိုပင် ရထားစီးနင်းလာကြခြင်းဖြစ်ကြောင်း သိရသည်။

အကွာအဝေးတူခရီးအား ရထားမှ ကာဗွန်ဒိုင်အောက်ဆိုဒ်ထုတ်လွှတ်မှုမှာ (၄၄)ကီလိုဂရမ်ရှိသော်လည်း လေယာဉ်တစ်စီးမှ ကာဗွန်ဒိုင်အောက်ဆိုဒ်ထုတ်လွှတ်မှုမှာ (၂၆၂) ကီလိုဂရမ်ထုတ်လွှင့်နိုင်ကြောင်း သိရသည်။

ဆွီဒင်နိုင်ငံသားများကြားတွင် ရထားဖြင့်ခရီးသွားခြင်းမှာ လူကြိုက်များလာပြီး မိသားစုခရီးများတွင် ကလေးများအား သဘာဝပတ်ဝန်းကျင်ရှုခင်းများကို ပြသနိုင်သည့် ရထားခရီးရွေးချယ်လာကြခြင်း၊ နိုင်ငံဖြတ်ကျော်ခရီးများကိုပါ ရထားဖြင့်သွားလာလိုသူများလာခြင်းတို့ကြောင့် ဥရောပနိုင်ငံများကို ဖြတ်သန်းသွားလာသည့် ညအိပ်ရထားခရီးစဉ်များကို ပြန်လည်ပြေးဆွဲရန် ဆွီဒင်အစိုးရက စဉ်းစားလာပြီဖြစ်ကြောင်း သိရသည်။

ရထားခရီးစဉ်များအတွက် ဆွီဒင်အစိုးရက ယခုနှစ်အတွင်း အမေရိကန်ဒေါ်လာ (၅)သန်းအထိ ရင်းနှီးမြုပ်နှံထားပြီဖြစ်ကြောင်း သိရသည်။

ယင်းအခြေအနေများကြောင့် လေကြောင်းလုပ်ငန်းများကလည်း ၂၀၅၀ ခုနှစ်တွင် ကာဗွန်ထုတ်လွှတ်မှုလျှော့ချမည့် လေယာဉ်သစ်များကို အသုံးပြုလာနိုင်မည်ဟု ကတိပြုပြောကြားလာကြောင်း သိရသည်။

Tachileik News Agency
Ref: World Economic Forum