~~~~~~~~⊰❂ Unicode Version ❂⊱~~~~~~~~

ထိုင်းလူငယ်တစ်ဦး ရဲစခန်းတွင်း ဖေါက်ထွင်းဝင်ကာ ရဲကားခိုးယူသွားပြီး နှစ်နာရီအကြာတွင် လမ်းဘေးမီးတိုင်ဝင်တိုက်မိ၍ အဖမ်းခံရ
**************
ထိုင်းနိုင်ငံ၊ ဆူရတ်ဌာနီရဲတပ်ဖွဲ့၏ကားတစ်စီးကို စိတ်ကြွဆေးသုံးထားသည့် အသက်(၂၀)အရွယ် ထိုင်းလူငယ်က ခိုးယူသွားပြီး လမ်းဘေးမီးတိုင်ကို ဝင်တိုက်မိသဖြင့် ရဲတပ်ဖွဲ့က ပြန်လည်ဖမ်းဆီးရမိထားကြောင်း သိရသည်။

ရဲစခန်း ကားရပ်နားရန်နေရာတွင် ရပ်ထားသည့်ကားကို မေလ (၂၅)ရက်နေ့ည (၁၁)နာရီဝန်းကျင် ခိုးယူသွားခြင်းဖြစ်ပြီး မေလ (၂၆)ရက်နေ့ နံနက် (၁)နာရီဝန်းကျင်တွင် လမ်းဘေးမီးတိုင်ကို ဝင်တိုက်ထားသည့် ကားကို ရဲတပ်ဖွဲ့က ပြန်တွေ့ရပြီး ကားခိုးသွားသူမှာ ဒဏ်ရာအနည်းငယ်ရထားကြောင်း သိရသည်။

ကားခိုးသည့်လူငယ်က ရဲစခန်းအတွင်း ပြတင်းပေါက်မှ ခိုးဝင်ပြီး ကားသော့ယူခဲ့ခြင်းဖြစ်ကြောင်း သိရသည်။

ကားခိုးသွားသည့်လူငယ်အား ဆီးစစ်ရာ စိတ်ကြွဆေးပြားသုံးထားကြောင်း တွေ့ရသဖြင့် မူးယစ်ဆေးမှု၊ ရဲစခန်းတွင်း ဖောက်ထွင်းဝင်ရောက်မှု၊ ကားခိုးမှု၊ ကားတိုက်မှုတို့ဖြင့် အရေးယူခံရမည်ဖြစ်ကြောင်း သိရသည်။

Tachileik News Agency
Ref: The Nation