~~~~~~~~⊰❂ Unicode Version ❂⊱~~~~~~~~

ချင်းမိုင်ဒေသတွင် တောမီးများကြောင့် မီးခိုးမြူထူထပ်စွာပိတ်နေ၍ လေကြောင်းခရီးစဉ်များ ရွှေ့ဆိုင်းထားရပြီး မီးတားဇုန်များ ဖေါ်ဆောင်နေ
****************
မြန်မာနှင့် အိမ်နီးချင်း ထိုင်းနိုင်ငံ၊ ချင်းမိုင်ဒေသတွင် တောမီးရှို့မှုများကြောင့် မီးခိုးမြူများပိတ်နေသဖြင့် ချင်းမိုင်နှင့် မယ်ဟောင်ဆောင်သို့ မနက်အစောပိုင်းလေယာဉ်ခရီးစဉ်များကို ရွှေ့ဆိုင်းထားရကြောင်း သိရသည်။

အဆိုပါပြည်နယ်နှစ်ခုတွင် လေယာဉ်ဆင်းသက်ရန် မြင်ကွင်းရှင်းလင်းမှုမရှိသဖြင့် လေကြောင်းခရီးစဉ်များ ရွှေ့ဆိုင်းမှုပြုလုပ်နေရရာ လေယာဉ်ခရီးစဉ် (၁၀)ခုထက်မနည်းကို ရွှေ့ဆိုင်းခဲ့ရပြီး ဆက်လက်ရွှေ့ဆိုင်းရဖွယ်ရှိကြောင်း ဘန်ကောက်လေကြောင်းလိုင်းက သတင်းထုတ်ပြန်သည်။

မယ်ဟောင်ဆောင်ခရိုင်တွင် ၂၀၁၉ ခုနှစ်  တောမီးရှို့သည့်နေရာပေါင်း (၂၇၉)နေရာကို တွေ့ရှိထားပြီး လွန်ခဲ့သည့်နှစ် အလားတူကာလအတွင်း (၁၄၁)နေရာတွင် လောင်ကျွမ်းခဲ့ကြောင်း သိရသည်။

လက်ရှိတွင် တာဝန်ရှိသူများနှင့် ဒေသခံများပူးပေါင်းပြီး တောမီးမပျံ့စေရန် မီးတားဇုန်များ လုပ်ဆောင်ရန် ကြိုးစားနေကြသည်။

“အဓိကကတော့ တောမီးတွေလောင်တာကြောင့်ပါ။ နောင်မှာ အခုလိုတောမီးရှို့တာတွေမရှိအောင် နည်းလမ်းရှာဖွေရတော့မယ်”ဟု အဆိုပါဒေသသို့ လာရောက်သည့် ဒုဝန်ကြီးချုပ် ပရာဝတ် ဝုန်ဆူဝမ်က ပြောကြားခဲ့ကြောင်း သိရသည်။

ထိုင်းနိုင်ငံအတွင်း စိုက်ပျိုးရာသီတွင် တောင်ယာမီးရှို့ခြင်း၊ စိုက်ပျိုးမြေများမီးရှို့ခြင်းများကြောင့် မီးခိုးမြူထူထပ်စွာ ဖုံးလွှမ်းခြင်းကို ဆယ်စုနှစ်များစွာ ကြုံတွေ့နေရခြင်းဖြစ်သော်လည်း တောင်သူများက တောမီးရှို့သည့်ဓလေ့ကို ကျင့်သုံးနေဆဲဖြစ်သည်။

ထိုင်းနိုင်ငံနည်းတူ အိမ်နီးချင်းမြန်မာနိုင်ငံ၏ တောင်ပေါ်ဒေသများတွင်လည်း တောင်ယာမီးရှို့သည့်ဓလေ့ကို ကျင့်သုံးနေကြခြင်းဖြစ်သည်။

Tachileik News Agency
Ref: Bangkok Post