~~~~~~~~⊰❂ Unicode Version ❂⊱~~~~~~~~

နေဝန်းနီစက်သုံးဆီအရောင်းဆိုင်အနီး ဗိုလ်ချုပ်အောင်ဆန်းလမ်းမပေါ်တွင် ပြည်နယ်/ခရိုင်/မြို့နယ် နှင့် မြို့မရဲစခန်းမှ သက်ဆိုင်ရာ ရဲတပ်ဖွဲ့ဝင်များ၊ အမှတ်(၁၁၉) ယာဉ်ထိန်း ရဲတပ်ဖွဲ့စု (တာချီလိတ်ခရိုင်)မှ
ယာဉ်ထိန်းရဲတပ်ဖွဲ့ဝင်များ အပါအဝင် ဝိန်းကျောက်ရပ်ကွက်အုပ်ချုပ်ရေးမှူးရုံးမှ အဖွဲ့ဝင်များအပြင် သက်ဆိုင်ရာပူးပေါင်းအဖွဲ့များဖြင့် ၂၀၁၉ခုနှစ် ဖေဖော်ဝါရီလ(၁၁)ရက်နေ့ ညနေပိုင်းက ရှောင်တခင် စစ်ဆေးမှုများ ပြုလုပ်စဉ် မြို့တွင်းဘက်မှ အာခါဈေးဘက်သို့ မောင်းလာသည့် ဆိုင်ကယ်အား ရပ်တန့် စစ်ဆေးရှာဖွေရာက ဆိုင်ကယ်မောင်းလာသူမှာ ထိုင်းနိုင်ငံသားဖြစ်နပြေီး၎င်းအား ဆက်လက် စစ်ဆေးရှာဖွေရာမှ ကျည်ဆံများနှင့် သေနတ်အပါအဝင် မူးယစ်ဆေးဝါး အနည်းငယ်တို့ကို ရှာဖွေတွေ့ရှိရခြင်း ဖြစ်ကြောင်း သိရသည်။

ပူးပေါင်းအဖွဲ့မှ ရှာဖွေစစ်ဆေးမှုများ ပြုလုပ်ရာတွင်၎င်းထံက ကျည်အိမ်တပ်လျှက် ကစ္စတိုသေနတ်(၁)လက်၊ ကျည်အိမ်အတွင်းမှ (.38)အမျိုးအစား ကျည်(၇)တောင့် နှင့် Wy စာတမ်းပါ စိတ်ကြွဆေးပြား (၂)ပြား နှင့် ice (ဝ.၇)ဂရမ်ဝန်းကျင်အပြင် ဘောင်းဘီရှည် အိတ်ကပ်အတွင်းက .45 Auto စာတန်းပါ ကျည်(၈)တောင့်တို့အား ရှာဖွေတွေ့ရှိကြောင်း သိရသည်။

လက်နက်၊ကျည်ဆံနှင့်အတူ မူးယစ်ဆေးဝါး အပါအဝင် တွေ့ရှိရသည့် အသက်(၃၂)နှစ်ဝန်းကျင်ရှိ ထိုင်းနိုင်ငံသား ဆရရွတ်ဆိုသူသည် ထိုင်းနိုင်ငံ ချင်းရိုင်းခရိုင် မယ်ဆိုင်မြို့တွင် နေထိုင်သူဖြစ်ကြောင်း သိရသည်။

အဆိုပါ ဖြစ်စဉ်နှင့် ပတ်သက်၍ လက်နက်နှင့်မူးယစ်ဆေးဝါး လက်ဝယ်တွေ့ရှိရသူ ထိုင်းနိုင်ငံသား ဆရရွတ် အား တာချီလိတ်မြို့မရဲစခန်းတွင် မယ(ပ) ၂၄/၂၀၁၉၊ မူး/စိတ်ပုဒ်မ ၁၆(၈)/၂၂(ခ)ဖြင့် အမှုဖွင့်အရေးယူဆောင်ရွက်ထားရှိပြီး ဆက်လက်၍ စစ်ဆေးမှုများ ပြုလုပ်နေလျက်ရှိကြောင်း သိရသည်။

တာချီလိတ်မြို့တွင် ၂၀၁၉ ခုနှစ်၏ ဇန်နဝါရီလ(၂၁)ရက်နေ့မှ ဖေဖော်ဝါရီလ(၈)၇ရက်နေ့အထိ (၁၈)ရက်အတွင်း သေနတ်ပစ်မှု (၃)ကြိမ်ဖြစ်ပွားခဲ့ရာ မြန်မာနိုင်ငံသား လုပ်ငန်းရှင်တစ်ဦး၊ ထိုင်းနိုင်ငံသား တစ်ဦးတို့ သေဆုံးပြီး တစ်ဦးမှာ ဒဏ်ရာရသွားခဲ့ရာ သေနတ်ဖြင့် ပစ်ခတ်မှုကျူးလွန်ခဲ့သည့် ထိုင်းနိုင်ငံသား တစ်ဦး အပါအဝင် ကျူးလွန်သူအားလုံး လွတ်မြောက်နေဆဲဖြစ်၍ မြန်မာနိုင်ငံရဲတပ်ဖွဲ့မှ အရှိန်အဟုန် တိုးမြှင့်၍ ရှောင်တခင် စစ်ဆေးမှုများ ပြုလုပ်ရာ ဖေဖော်ဝါရီလ(၁၁)ရက်နေ့အထိ ထိုင်းနိုင်ငံသား (၇)ဦးကို မူးယစ်ဆေးနှင့် လက်နက်များဖြင့် ဖမ်းဆီးရရှိမှုများ ရှိခဲ့ပြီး ဆက်လက်၍လည်း ရှောင်တခင် စစ်ဆေးမှုများ ပြုလုပ်နေလျက်ရှိကြောင်း သိရသည်။

Tachileik News Agency
ဓာတ်ပုံ - ရဲတပ်ဖွဲ့