~~~~~~~~⊰❂ unicode ❂⊱~~~~~~~~
*************
စစ်ကိုင်းတိုင်းဒေသကြီး၊ မုံရွာခရိုင်၊ ချောင်းဦးမြို့နယ်၊ မင်းတည်ကျေးရွာတွင် ၂၀၁၈ ခုနှစ်၊ စက်တင်ဘာလ (၁၀) ရက်နေ့ ည (၇) နာရီဝန်းကျင်က အမျိုးသားတစ်ဦးအား မိန်းကလေးကို ဖမ်းခေါ်ရန်ကြိုးစားသည်ဟု အထင်လွဲပြီး ကျေးရွာလူထုဝိုင်းဝန်းရိုက်နှက်ရာမှ သေဆုံးသွားသဖြင့် အလောင်းဖျောက်မီးရှို့ခဲ့သဖြင့် ခရိုင်ရဲတပ်ဖွဲ့မှူး ဦးဆောင်သည့်အဖွဲ့ဖြင့် စုံစမ်းစစ်ဆေးနေကြောင်း သိရသည်။
အဆိုပါကျေးရွာတွင် အသက်(၁၆)နှစ်အရွယ်မိန်းကလေးက ကျေးရွာအလယ်ပိုင်းရှိဈေးဆိုင်မှ ဈေးဝယ်၍ ပြန်လာစဉ် ရွာလယ်လမ်း၌ ၎င်း၏ရှေ့မှသွားနေသည့် အမျိုးသားတစ်ဦးကို မသင်္ကာသဖြင့် နေအိမ်သို့ ရောက်ရှိစဉ် မိခင်အားပြောပြရာ မိခင်ဖြစ်သူက နေအိမ်ရှေ့သို့ထွက်၍ "သမီးကို လူဖမ်းတယ်"ဟု အော်ဟစ်အကူအညီတောင်းခံခဲ့ခြင်းဖြစ်ကြောင်း သိရသည်။
အဆိုပါ အော်ဟစ်အကူအညီတောင်းသံကြောင့် ကျေးရွာမှလူများထွက်လာကာ လမ်းလျှောက်နေသည့် အမျိုးသားအား ဝိုင်းဝန်းဖမ်းဆီးရိုက်နှက်ခဲ့ရာ သတိလစ်နေစဉ် သေသွားသည်ထင်သဖြင့် သင်္ချိုင်းအနီး သယ်ဆောင်မီးရှို့ခဲ့ခြင်းဖြစ်ကြောင်း သိရသည်။
အဆိုပါဖြစ်စဉ်တွင် ပါဝင်သူများကို မုံရွာခရိုင် ရဲတပ်ဖွဲ့မှူး ဒုတိယရဲမှူးကြီး သန်းဝင်းဦးဆောင်သည့် ရဲတပ်ဖွဲ့က စုံစမ်းစစ်ဆေးနေပြီး ချောင်းဦးမြို့မရဲစခန်းတွင် (ပ)၂၁၅/၂၀၁၈၊ ရာဇသတ်ကြီးပုဒ်မ ၃၀၂/၂၀၁/ ၁၁၄ ဖြင့် အမှုဖွင့်ထားကြောင်း ရဲတပ်ဖွဲ့၏သတင်းထုတ်ပြန်ချက်အရ သိရသည်။
မင်းတည်ကျေးရွာတွင် အိမ်ခြေ (၂၂၀)၊ လူဦးရေ (၁၀၀၀) ကျော်ခန့်နေထိုင်ကြကြောင်း သိရသည်။
~~~~~~~~~~~~~~~~~~ ေၾကာ္ျငာ ~~~~~~~~~~~~~~~~~~~~ 
