~~~~~~~~⊰❂ unicode ❂⊱~~~~~~~~

သင်္ကန်းဝတ်မည့် တောဝက်ဘောလုံးအသင်းမှ (၁၂)ဦး ရှင်ပြုမင်္ဂလာ အခမ်းအနားကျင်းပနေသည့် မယ်ဆိုင်မြို့ လွိုင်တုံးတောင်ရှိ ဓာတ်တော်စေတီညီနောင်ရင်ပြင်တွင် ဇူလိုင်လ(၂၅)ရက်နေ့ နံနက်(၈း၄၅)နာရီဝန်းကျင်က ထိုင်းဘုရင်၊ ဘုရင့်မယ်တော် အပါအဝင် ကယ်ဆယ်ရေးအတွင်း သေဆုံးသွားသည့် ရေငုပ်အဖွဲ့မှ ဆာမန်ခူနန် နှင့် မိဘဆွေမျိုးများ အပြင် ကျေးဇူးတင်ထိုက်သူတို့အား ဂါရဝပြုခဲ့ကြသည်။

သာသနာ့ဘောင်သို့ ဝင်ရောက်ခြင်း အခမ်းအနားကို ၂၀၁၈ ခုနှစ်၊ ဇူလိုင်လ (၂၅)ရက်နေ့တွင် မယ်ဆိုင်မြို့ လွိုင်တုံးတောင်ရှိ ဓာတ်တော်စေတီ ညီနောင်ရင်ပြင်တွင် လာရောက် ကျင်းပခြင်းဖြစ်ပြီး ရှင်ပြုမင်္ဂလာအခမ်းအနားသို့ တာချီလိတ်မြို့ နဂါးနှစ်ကောင် ပရိယတ္တိစာသင်တိုက်၏ ဦးစီးပဓာန နာယက ဆရာတော်၊ နိုင်ငံတော် သြဝါဒစရိယ၊ အဘိဓဇအဂ္ဂမဟာသဒ္ဓမ္မဇောတိက၊ အဂ္ဂမဟာပဏ္ဍိတ၊ ဂုဏ်ထူးဆောင် ပါရဂူဘွဲ့ရ နဂါးနှစ်ကောင် ဆရာတော် ဘဒ္ဒန္တဓမ္မသီရိလည်း ကြွရောက်လာသည်ကို တွေ့ရသည်။

လွိုင်တုံးတွင် တစ်ညအိပ်ပြီးနောက် တောဝက်ဘောလုံးအသင်းမှ (၁၂)ဦးသည် ဇူလိုင်လ(၂၄)ရက်နေ့က မယ်ဆိုင်မြို့ ဒွိုင်ဝေါင်းဘုန်းတော်ကြီးကျောင်းရှိ ဓာတ်တော်စေတီတွင် ထိုင်းဗုဒ္ဓဘာသာထုံးစံအရ ဝတ်ဖြူစင်ကြယ်ဝတ်ဆင်ခြင်း၊ ဆံချခြင်းတို့ကို လုပ်ဆောင်ခဲ့ခြင်းဖြစ်သည်။

Tachileik News Agency
ဓာတ်ပုံ - ကိုဇောင်း