~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ် တစ်လျှောက် ထိုင်းနိုင်ငံဘက်ခြမ်း မယ်ဆိုင်မြို့နယ်မှ မယ့်ဖလုံမြို့နယ် နယ်နိမိတ် အထိ ရောက်ရှိမည့် အကျယ် ပေ(၃၀)နှင့် အလျား (၁၇)ကီလိုမီတာရှည်သည့် မီးတားလမ်း ဖော်မည် ဖြစ်ကြောင်း သိရသည်။

မီးတားလမ်းအတွက် သတ်မှတ်နေရာ ရှင်းလင်းခြင်းအား မြန်မာ - ထိုင်း နှစ်ဖက် နယ်ခြားကော်မတီ (TBC) အပါအဝင် မြန်မာနိုင်ငံဘက်က တာဝန်ရှိသူများ အပါအဝင် သက်ဆိုင်ရာ ဌာနများ၊ လွယ်တော်ခမ်းကျေးရွာအုပ်စုအုပ်ချုပ်ရေးမှူးနှင့် အဒီး၊ နာကျဲ၊ ဗာလ၊ ပါခါး စသည့် ကျေးရွာများမှ ဒေသခံများက ထိုင်းနိုင်ငံမှ အမှတ်(၃)လှုပ်ရှားယန္တရားတပ်မှ တာဝန်ရှိသူများ အပါအဝင် ထိုင်းနိုင်ငံဘက်ခြမ်းရှိ ကျေးရွာများမှ ဒေသခံများ၊ သက်ဆိုင်ရာဌာနများဖြင့် ပူးပေါင်းဆောင်ရွက် ကြခြင်း ဖြစ်ကြောင်း သိရသည်။

ထိုင်းနိုင်ငံက နိုင်ငံမြောက်ပိုင်းဒေသတွင် မီးခိုးဖုံးလွှမ်းမှု ထူထပ်စွာ ဖြစ်ပေါ်လေ့ရှိသဖြင့် ထိုင်းနိုင်ငံ မြောက်ပိုင်းဒေသများနှင့် နယ်နမိတ် ထိစပ်နေသည့် မြန်မာနိုင်ငံ၊ လာအိုနိုင်ငံများဖြင့်ပါ ပူးပေါင်းပြီး ၂၀၁၈ ခုနှစ်တွင် ယခင်နှစ်ထက် မီးခိုးမြူဖုံးလွှမ်းမှု (၆၀) ရာခိုင်နှုန်းအထိ လျှော့ချရန် ဆောင်ရွက်နခြေင်း ဖြစ်ကြောင်း သိရသည်။

ထိုင်းနိုင်ငံက အိမ်နီးချင်းနိုင်ငံများနှင့် ပူးပေါင်း၍ နယ်နမိတ်ဒေသတစ်လျှောက် မီးခိုးမြူလျှော့ချရေး ပူးပေါင်း ဆောင်ရွက်မှုအတွက် ထိုင်းတပ်မတော် တပ်မဟာ (၃)၏ ဒုတိယဗိုလ်ချုပ်ကြီး Wichak Siribansop က တာဝန်ယူဆောင်ရွက်နပြေီး ထိုင်းနိုင်ငံတွင်း တောမီးရှို့သည့် ဓလေ့အား ပညာပေး လုပ်ငန်းများအတွက် ဒေသခံ လုပ်အားပါဝင်မှုများဖြင့် ပူးပေါင်းဆောင်ရွက်ခြင်းကိုလည်း လုပ်ဆောင်နေကြောင်း သိရသည်။

တောမီးရှို့မှုများကြောင့် မြန်မာ - ထိုင်း နယ်စပ် တာချီလိတ်မြို့နယ်တွင်လည်း တောမီးရှို့သည့် ရာသီများတွင် မီးခိုးမြူ ဖုံးလွှမ်းခြင်းများ ဖြစ်လေ့ရှိပြီး တောမီးရှို့သည့် စနစ်အား ပြုပြင်ရန် စိုက်ပျိုးရေး ဌာနက စိုက်ပျိုးနည်းစနစ် ပညာပေးမှုများနှင့် အုပ်ချုပ်ရေးဌာနက ရပ်/ကျေးအုပ်ချုပ်ရေးမှူးများအား အလျဉ်းသင့်သလို ဆွေးနွေးမှုများ ရှိသော်လည်း တောမီးရှို့မှုအား ပညာပေးလှုံ့ဆော်မှုအဖြစ် လုပ်ဆောင်ရန် ညွှန်ကြားမှု မရှိသေးကြောင်း တာချီလိတ်ခရိုင် အထွေထွေအုပ်ချုပ်ရေးဦးစီးဌာနမှ သိရသည်။

သတင်း #ကိုဇောင်း
ဓာတ်ပုံ - YNDL