~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) မိုင်းဖြတ်မြို့တွင် လားဟူစုပေါင်းနှစ်သစ်ကူးပွဲတော်ကို မိုင်းဖြတ်မြို့ရှိ မြို့မဘောလုံးကွင်းအတွင်း ဇန်နဝါရီလ (၃)ရက်နေ့မှ (၆)ရက်နေ့ အထိ ကျင်းပမည်ဖြစ်ကြောင်း သိရသည်။

"ဒီပွဲအတွက် ဧည့်သည်တော်တွေရော အားလုံးဖိတ်ထားပါတယ်။ မိုင်းဖြတ်မြို့နယ်အတွက် ကျင်းပမှာပါ။ ကျွန်တော်တို့ လားဟူတိုင်းရင်းသားတွေ အားလုံးအနေနဲ့ စုပေါင်းမကျင်းပဖြစ်တာ သုံးနှစ်လောက်ရှိပြီ။ အားလုံးမြို့နယ်အလိုက်ပဲ ကျင်းပကြပါတယ် “ ဟု မိုင်းဖြတ်မြို့နယ် လားဟူပါတီဥက္ကဌ ဦးဒါဝိက တာချီလိတ်သတင်းအေဂျင်စီသို့ ပြောသည်။

လားဟူတိုင်းရင်းသားစုပေါင်းနှစ်သစ်ကူးပွဲတော်၏ ပထမနေ့တွင် လားဟူရိုးရာအကများဖြစ်သည့် ဗူးပလွေအကယှဉ်ပြိုင်ခြင်း၊ ရိုးရာဂျင်ပေါက်ပြိုင်ပွဲ ကျင်းပခြင်း၊ စတိတ်ရှိုးနှင့်အကပဒေသာတို့ ပါဝင်ကာ ဒုတိယနေ့တွင် ခေတ်ပေါ်လူငယ် အကပြိုင်ပွဲ၊ ဆန်ကာတင်အဖွဲ့ ရိုးရာဂျင်ပေါက်ပြိုင်ပွဲ၊ လားဟူတေးသီချင်းဆိုပြိုင်ပွဲ၊ စတိတ်ရှိုးနှင့် အကပဒေသာတို့ ပါဝင်မည်ဖြစ်ပြီး နောက်ဆုံးနေ့တွင် နှစ်သစ်ကူးပွဲတော် အခမ်းအနား ကျင်းပခြင်း၊ ဧည့်ခံကျွေးမွေးခြင်း၊ ဖက်ရှင်မော်ဒယ်ရှိုးပြိုင်ပွဲနှင့် ပြိုင်ပွဲဆုများ ချီးမြှင့်ခြင်းတို့ ပါဝင်မည်ဖြစ်ကြောင်း သိရသည်။

သတင်း - ဇာနှင်း