~~~~~~~~⊰❂ unicode ❂⊱~~~~~~~~
************
တိုင်းဒေသကြီးနှင့် ပြည်နယ်အသီးသီးမှ ရှမ်းစာပေနှင့် ရိုးရာဓလေ့သင်ကြားလိုသူများအား ရှှမ်းပြည်နယ် တောင်ပိုင်း၊ တောင်ကြီးမြို့ ရှမ်းစာပေနှင့် ယဉ်ကျေးမှုအသင်းမှ အခမဲ့သင်ကြားပေးသွားမည်ဖြစ်ကြောင်း သိရသည်။
“ ရှမ်းလူမျိုးပဲ လာရမယ်လို့ မဟုတ်ဘူး။ ဘာသာစုံလူမျိုးတွေ လာသင်လို့ရတယ်။ ခွဲခြားသတ်မှတ်ထားတာလည်း မရှိပါဘူး။ အရင်နှစ်တွေမှာဆို စစ်ကိုင်းတိုင်းထိ အကူအညီတောင်းလို့ သင်ကြားပေးတာရှိတယ်။လွိုင်ကော်မှာလည်း သင်ပေးတယ်။ တိုင်း နဲ့ ပြည်နယ်ကနေလာခေါ်ရင်တော့ သင်ကြားပေးသွားမှာပါ။လာကြိုရင်လည်းရတယ်။ သွားဖို့စရိတ်တွေကိုတော့ ကျွန်မတို့ ရှမ်းစာပေအသင်းတိုက်ကနေ ထောက်ပ့ံပေးပါတယ်။ လာအကူအညီတောင်းတဲ့ မည်သည့်နေရာမဆို အခမဲ့ သွားရောက်သင်ကြားပေးပါတယ်”ဟု တောင်ကြီးမြို့ ရှမ်းစာပေနှင့် ယဉ်ကျေးမှုအသင်းမှ ဆရာမ နန်းဝိုးစံက ပြောသည်။
လက်ရှိတွင် တောင်ကြီးမြို့ ရှမ်းစာပေနှင့် ယဉ်ကျေးမှုအသင်းတွင်လည်း ဧပြီလ (၁) ရက်နေ့မှ မေလ (၂၀) ရက်နေ့အထိ သင်တန်းဖွင့်ထားပြီး တောင်ကြီးမြို့အနီးဝန်းကျင်ဒေသများတွင် သင်ကြားပေးနေကြောင်း သိရသည်။
“ ရှမ်းရိုးရာဓလေ့ယဉ်ကျေးမှု မပျောက်ကွယ်အောင် မျိုးဆက်သစ်လူငယ်တွေလည်း ဆက်ပြီးထိန်းသိမ်း နိုင်အောင်ပါ။ တခြားရပ်ရွာကျေးရွာတွေမှာလည်း သင်ကြားပေးသွားမှာပါ။ ရွာတွေမှာလည်း ရှမ်းရိုးရာနဲ့ ပတ်သက်ပြီး လာသင်ကြားဖို့ ဖိတ်ခေါ်တာတွေလည်းရှိတယ်။ နွေရာသီရောက်ပြီဆိုရင် တခြားနယ်က ဖိတ်ခေါ်တာတွေများတယ်”ဟု ဆရာမ နန်းဝိုးစံက ပြောသည်။
ရှမ်းစာပေအပြင် ရှမ်းရိုးရာအက၊ ရှမ်းရိုးရာသိုင်း၊ ရှမ်းသီချင်း၊ ရှမ်းဘုရားစာ၊ ယဉ်ကျေးမှုအနုပညာတို့ကိုလည်း သင်ကြားပေးခြင်းဖြစ်ကြောင်း သိရသည်။
သတင်း #နိုနို
