မကွေးမြို့တွင် အသက် (၆၀)အရွယ် မသန်စွမ်းအမျိုးသားတစ်ဦးက(၁၀)နှစ်အရွယ် အိမ်နီးချင်း မိန်းကလေးကို လက်ဖက်ရည်ဝယ်ပေးရန် အကူအညီတောင်းပြီး အဓမ္မပြုကျင့်ကြောင်း အမှုဖွင့်တိုင်ကြား၍ ဖမ်းဆီးစစ်ဆေးနေကြောင်း သိရသည်။

အဖွားဖြစ်သူက ညီမဖြစ်သူ၏နေအိမ်တွင် ဗီဒီယိုသွားကြည့်နေ၍ နေအိမ်၌ အဆိုပါ မိန်းကလေးကျန်နေခဲ့စဉ် အိမ်နီးချင်းဖြစ်သည့် အဖိုးအရွယ်အမျိုးသားက လက်ဖက်ရည်ဝယ်ခိုင်းခဲ့ခြင်းဖြစ်သည်ဟု သိရသည်။

လက်ဖက်ရည်ဝယ်ပြီး အိမ်သို့သွားပို့ပေးသည့် မိန်းကလေးကို အသက် (၆၀)အရွယ် မသန်စွမ်းအမျိုးသားက အဓမ္မပြုကျင့်နေကြောင်း အိမ်နီးချင်းအမျိုးသမီးက မိန်းကလေး၏အဖွားထံ လာပြောသဖြင့် အဖွားဖြစ်သူက မြေးဖြစ်သူအား သွားခေါ်ကာ အမှုဖွင့်တိုင်တန်းခဲ့ခြင်းဖြစ်ကြောင်း သိရသည်။

“တိုင်တန်းခံရသူအိမ်နဲ့ ကလေးမလေးအိမ်နဲ့က ပေ(၁၀၀)လောက်ပဲ ဝေးတယ်။ ကောင်မလေးကို လက်ခုပ်တီးခေါ်ပြီး လဖက်ရည် အဝယ်ခိုင်းလိုက်တယ်။ ပြန်လာတဲ့အခါကျတော့  သူ့ရဲ့အိမ်ခန်းထဲမှာ ကလေးမလေးကိုဆွဲခေါ်ပြီး သားမယားအဖြစ်ပြုကျင့်တယ်လို့ ကလေးမလေးနဲ့ သက်သေက ထွက်ချက်ပေးပါတယ်။ ကျွန်တော်တို့အနေနဲ့ ဆေးစာထင်မြင်ချက် တောင်းခံထားပြီး ရဲလုပ်ငန်းတွေကို ဆက်လက်လုပ်ဆောင်နေပါတယ်။ ကျူးလွန်ကြောင်း အစွပ်စွဲခံရသူကိုဖမ်းဆီးပြီး သက်သေခံပစ္စည်းတွေကို သိမ်းဆည်းတာ၊ အချုပ်ရီမန်ယူတာတွေ ဆောင်ရွက်ထားပါတယ်” ဟု မကွေးနယ်မြေရဲစခန်းမှူး  ရဲအုပ်သူရဇော်က တာချီလိတ်သတင်းအေဂျင်စီသို့ ပြောသည်။

အဓမ္မပြုကျင့်သည်ဟု အမှုဖွင့်တိုင်ကြားခံရသည့် လှဝေအား မကွေးမြို့ နယ်မြေရဲစခန်းတွင် (ပ)၆၁၅/၂၀၁၉၊ ရာဇသတ်ကြီး ဥပဒေပုဒ်မ ၃၇၆/၃၆၃ တို့ဖြင့် အမှုဖွင့်ထားပြီး သက်သေခံပစ္စည်းများအား ဓာတုဗေဒဝန်ရုံးသို့ ပေးပို့သွားရန်နှင့် အမြန်ဆုံးတရားစွဲဆိုတင်ပို့နိုင်ရန် ဆောင်ရွက်လျှက်ရှိကြောင်း သိရသည်။

မကွေးမြို့တွင် စက်တင်ဘာလ (၂၁)ရက်နေ့ကလည်း အသက်(၇)နှစ်အရွယ်ရှိ မိန်းကလေးငယ်ကို အသက်(၃၂နှစ်)အရွယ်ရှိ အမျိုးသားက ဓမ္မတာနှင့်ဆန့်ကျင်သော အဓမ္မပြုကျင့်မှုတစ်ရပ် ဖြစ်ပွား၍ နယ်မြေရဲစခန်းက အရေးယူခဲ့ရကြောင်း  သိရသည်။
Tachileik News Agency
သတင်း #ဖီးနစ်
ဓာတ်ပုံ-ရဲစခန်း