~~~~~~~~⊰❂ Unicode Version ❂⊱~~~~~~~~

မီးလောင်မှုနှစ်ကြိမ်ဖြစ်ပွားခဲ့သည့် မကွေးတိုင်း ထန်းကိုင်းရေနံမှော်မှ တရားမဝင်ရေနံလုပ်ကွက်များ ဖယ်ရှားရမည်
************
ရေနံတွင်းမီးလောင်မှုဖြစ်ပွားပြီးနောက် မကွေးတိုင်းဒေသကြီး၊ မင်းလှမြို့နယ် ထန်းကိုင်းကျေးရွာအုပ်စုအတွင်းရှိ ထန်းကိုင်းရေနံမြေတွ တရားမဝင် ရေနံထုတ်လုပ်တူးဖော်နေမှုများကို ၂၀၁၉ ခုနှစ်၊ ဧပြီလ(၂၄) ရက်နေ့ နောက်ဆုံးထား၍ ဖယ်ရှားရန် ဒေသန္တရအမိန့်ထုတ်ပြန်လိုက်သည်။

“ ထန်းကိုင်းမှော်က ပိတ်သိမ်းမယ့်လုပ်ကွက်တွေဟာ ခွင့်ပြုချက်တင်ပြီး လုပ်ကြတဲ့လုပ်ကွက်တွေ မဟုတ်ဘူး။  ပြီးခဲ့တဲ့ မတ်လပိုင်းက ရေနံတွင်းမီးလောင်လို့ ပြည်ထောင်စုကတောင် ယာဉ်၊ စက်ယန္တရားတွေ အုပ်ဆောင်းတွေသုံးပြီး လာငြိှမ်းရတယ်။ တစ်ခါ ဒုတိယအကြိမ် ထပ်လောင်တယ်။ နိုင်ငံပိုင် MOGE နဲ့လည်းနီးသလို ကပစနဲ့ကလည်း နီးနေတော့ အန္တရာယ်ရှိတာကြောင့် ပြည်ထောင်စုက ပိတ်သိမ်းစေတာပါ”  ဟု သဘာဝပတ်ဝန်းကျင်၊ သယံဇာတရေးရာ၊ လျှပ်စစ်နှင့်စွမ်းအင်ဝန်ကြီး ဦးမြင့်ဇော်က တာချီလိတ်သတင်း အေဂျင်စီသို့ ပြောကြားသည်။

ထန်းကိုင်းရေနံမှော်တွင် ၂၀၁၉ခုနှစ် မတ်လအတွင်း မီးလောင်မှု (၂)ကြိမ်ဖြစ်ပွားခဲ့ရာ အနီးရှိ အမှတ်(၁၀) ကာကွယ်ရေးပစ္စည်းစက်ရုံအတွက် မီးဘေးအန္တရာယ်စိုးရိမ်ရခြင်းနှင့် ရေနံလုပ်ကွက်များမှာ စက်ရုုံဧရိယာဘက်သို့ တိုးရွှေ့လာနိုင်ခြင်းတို့ ကို ဖြေရှင်းပေးရန် အလယ်ပိုင်းတိုင်းစစ် ဌာနချုပ်(မန္တလေး)နှင့် အမှတ်(၁၀)ကာကွယ်ရေးပစ္စည်းစက်ရုံ တာဝန်ရှိသူများက မကွေးတိုင်းဒေသကြီးအစိုးရအဖွဲ့ထံ တင်ပြထားသဖြင့် ဧပြီလ (၃)ရက်နေ့က ကျင်းပသည့် မကွေးတိုင်းဒေသကြီး အစိုးရအဖွဲ့ အစည်း အဝေးအမှတ်စဉ် (၁၄/၂၀၁၉) ဆုံးဖြတ်ချက်ဖြင့် ယင်းကဲ့သို့ ဒေသန္တရအမိန့် ထုတ်ပြန်လိုက်ခြင်းဖြစ်ကြောင်း သိရသည်။

ထန်းကိုင်းရေနံမှော်မှ ပိတ်သိမ်းရမည့် ရေနံလုပ်ကွက်ပိုင်ရှင်များထံသို့ မင်းလှမြို့နယ်အထွေထွေ အုပ်ချုပ်ရေးဦးစီးဌာနက ဒေသန္တရအမိန့်ထုတ်ပြန်ထားကြောင်း သိရသည်။

“ဧပြီလ (၂၄)ရက်နေ့မှာ လုပ်ကွက်တွေ အပြီးပိတ်သိမ်းမယ်ဆိုတဲ့ အသံတွေကြားနေရတာကြောင့် အနယ်နယ် အရပ်ရပ်က ထန်းကိုင်းမှော်ကို မှီတင်းနေကြရတဲ့ ခုနှစ်သောင်းလောက်ရှိတဲ့လူဦးရေရဲ့ မိသားစုဘဝ ရပ်တည်ရေးအတွက်နဲ့ ကလေးတွေပညာရေးအတွက် တွေးပူပြီး စိတ်ဆင်းရဲနေကြပါတယ်။ ပြည်သူတွေ တင်မြှောက်ထားတဲ့ ပြည်သူ့အစိုးရက ဘာမဟုတ်တဲ့ အကြောင်းပြချက်လေးနဲ့ ပြည်သူတွေဘဝရပ်တည်မှု ခက်ခဲကျပ်တည်းအောင် လုပ်တာမျိုးတော့ မဖြစ်သင့်ဖူးပေါ့ဗျာ” ဟု ထန်းကိုင်းရေနံမှော်လုပ်ကိုင်သူ ဒေသခံ ဦးဌေးဝင်းက ပြောသည်။

မကွေးတိုင်းဒေသကြီးအတွင်း မြိုင်၊ ဆော၊ မင်းလှ၊ ပခုက္ကူ၊ ပေါက်၊ စလင်း၊ မင်းဘူးမြို့နယ်အသီးသီး၌ ယခင်က ခွင့်ပြုချက်ရထားသည့် ရေနံလုပ်ကွက် (၃၁)ကွက်ရှိခဲ့သော်လည်း ယခုအခါ သက်တမ်းတိုးနှင့် အသစ်လျှောက်သည့် လုပ်ကွက် (၁၇)ကွက်သာရှိကြောင်း သိရသည်။

သတင်း၊ဓါတ်ပုံ #ဖီးနစ်