~~~~~~~~⊰❂ Unicode Version ❂⊱~~~~~~~~

မြန်မာ - ထိုင်းနယ်စပ်၊ တာချီလိတ်မြို့ရှိ မယ်ခေါင်ရပ်ကွက်အတွင်း၌ မူးယစ်ဆေးဝါးသတင်းအရ စောင့်ဖမ်းရာက အမျိုးသားတစ်ဦးကို စိတ်ကြွဆေးပြား စုစုပေါင်း (၁,၄၆၅)ပြား အပါအဝင် မက်သာအဖက်တမင်း ဟိုက်ဒြိုလ်ကလိုရိုက်(ice) (၁၄၅.၅)ဂရမ်တို့ နှင့်အတူ ၂၀၁၉ခုနှစ် ဖေဖော်ဝါရီလ(၁၆)ရက်နေ့ နံနက်(၉)နာရီခွဲ ဝန်းကျင်အချိန်က ဖမ်းဆီးရမိ၍ တာချီလိတ်မြို့မရဲစခန်းတွင် အမှုဖွင့် အရေးယူးထားကြောင်း သိရသည်။

မူးယစ်တပ်ဖွဲ့စု(၃၀)တာချီလိတ်မှ တပ်ဖွဲ့ဝင်များနှင့် သက်ဆိုင်ရာ ပူးပေါင်းအဖွဲ့တို့က မယ်ခေါင်ရပ်ကွက်၊ ဗိုလ်ချုပ်အောင်ဆန်းလမ်းမပေါ်တွင် မူးယစ်ဆေးဝါးသတင်းအရ စောင့်ဆိုင်းနေစဉ် ကြိုတင်သတင်း ရရှိထားသူ သင်းအောင်(ခ)ကရင်သည် ဆိုင်ကယ်ဖြင့် မောင်းလာစဉ်၎င်းအား တားမြစ်စစ်ဆေးရာက မူးယစ်ဆေးဝါးများကို ရှာဖွေတွေ့ရှိရခြင်း ဖြစ်ကြောင်း သိရသည်။

အဆိုပါ ပူးပေါင်းအဖွဲ့မှ ရှာဖွေမှုများ ပြုလုပ်ရာတွင် သင်းအောင်(ခ)ကရင် ဝတ်ဆင်ထားသည့် အင်္ကျငီ်္ အတွင်းမှ Wy စာတမ်းပါ စိတ်ကြွဆေးပြား စုစုပေါင်း (၂၀၅)ပြား နှင့် အလေးချိန် (ဝ.၅)ဂရမ်ရှိသည့် အိုက်စ်တို့ကို အပြင် ဖုန်းတစ်လုံးအား စစ်ဆေးတွေ့ရှိရ၍ သိမ်းဆည်းခဲ့ကြသည်။

ဆက်လက်၍ စစ်ဆေးမှုများအရ၎င်းငှါးရမ်းနေထိုင်သည့် မယ်ခေါင်ရပ်ကွက်အတွင်းရှိ နေအိမ်တွင် သို့ နံနက်(၉း၄၅)နာရီ ဝန်းကျင်အချိန်က သွားရောက်ရှာဖွေမှုများ ပြုလုပ်ရာ နေအိမ် အိပ်ခန်းအတွင်းရှိ ဘီဒိုပေါ်မှ Wy စာတမ်းပါ စိတ်ကြွဆေးပြား (၁၂၆၀)ပြား နှင့် စုစုပေါင်း အလေးချိန် (၁၄၅)ဂရမ်ရှိ မက်သာအဖက်တမင်းဟိုက်ဒြိုလ်ကလိုရိုက်(ice)နှင့် မူးယစ်ဆေးဝါးချိန်တွယ်ရာတွင် အသုံးပြုသည့် ဒီဂျစ်တယ်စက်တစ်လုံး၊ သတ္တုဇွန်း(၁)ချောင်းတို့အား ထပ်မံတွေ့ရှိ သိမ်းဆည်းရမိကြောင်း သိရသည်။

မူးယစ်ဆေးဝါးများနှင့်အတူ ဖမ်းဆီးရမိသည့် အသက်(၅၄)နှစ်အရွယ်ရှိ သင်းအောင် (ခ) ကရင်အား တာချီလိတ်မြို့မ ရဲစခန်းတွင် မယ(ပ) ၂၆/၂၀၁၉၊ မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉(က) ဖြင့် အမှုဖွင့် အရေးယူထားရှိကြောင်း သိရှိရသည်။

Tachileik News Agency
ဓာတ်ပုံ - KHS