~~~~~~~~⊰❂ unicode ❂⊱~~~~~~~~

မကွေးတိုင်းဒေသကြီးအတွင်း မြစ်ကျောက်၊သဲထုတ်လုပ်ငန်းများကို မြို့နယ်အဆင့် ကော်မတီများဖြင့် ကြီးကြပ်မည်
***************
မကွေးတိုင်းဒေသကြီးအတွင်း မြစ်ကျောက်စရစ်နှင့် သဲထုတ်လုပ်ငန်းများ စနစ်တကျ တူးဖေါ်စေရေးနှင့် တရားဝင်ခွင့်ပြုပေးထားသည့် လုပ်ငန်းများကို ဥပဒေအရ အကာအကွယ်ပေးရေးတို့ကို မြန်မြန်ဆန်ဆန်ဆောင်ရွက်နိုင်ရန် မြို့နယ်အဆင့်ကော်မတီများဖြင့် ကြီးကြပ်သွားမည်ဖြစ်ကြောင်း သိရသည်။

အဆိုပါမြို့နယ်အဆင့် ဆိပ်ကမ်းများ၊ သင်္ဘောဆိပ်များ၊ ဆိပ်ခံများ စီမံခန့်ခွဲမှုကော်မတီများကို အထွေထွေအုပ်ချုပ်ရေး ဦးစီးဌာန၊ ရဲတပ်ဖွဲ့၊ စည်ပင်သာယာရေးဌာန၊ မီးသတ်ဦးစီးဌာန၊ လယ်ယာမြေ စီမံခန့်ခွဲရေးနှင့် စာရင်းအင်းဦးစီးဌာန၊ ငါးလုပ်ငန်းဦးစီးဌာန၊ ပြည်တွင်းရေကြောင်း၊ အရပ်ဘက်မှ လုပ်ငန်းရှင် (၃)ဦး၊ ရပ်မိရပ်ဖ(၅)ဦးစီ ပါဝင်ဖွဲ့စည်းမည်ဖြစ်ကြောင်း သိရသည်။

မကွေးတိုင်းဒေသကြီးအစိုးရအဖွဲ့ ဆောက်လုပ်ရေး၊ ပို့ဆောင်ဆက်သွယ်ရေးဝန်ကြီးဌာန ဝန်ကြီး ဦးတင်နွယ်ဦး ဦးဆောင်သည့် မကွေးတိုင်းဒေသကြီး ဆိပ်ကမ်းများ၊ သင်္ဘောဆိပ်များ၊ ဆိပ်ခံများ စီမံခန့်ခွဲမှုကော်မတီဖွဲ့စည်းပြီး ဆိပ်ကမ်းနယ်မြေများအား စီမံခန့်ခွဲခြင်းနှင့်အတူ ကမ်းပါးနယ်တွင် လုပ်ကိုင်နေသည့် ကျောက်၊ သဲထုတ်လုပ်မှုများ ကိုပါ စနစ်တကျကြီးကြပ်နိုင်ရန် ဆောင်ရွက်နေခြင်းဖြစ်ကြောင်း သိရသည်။

လက်ရှိတွင် မြစ်အတွင်း သဲ၊ကျောက်ထုတ်လုပ်သည့်လုပ်ငန်းများအနေဖြင့် စနစ်တကျ လာရောက် လျှောက်ထားနိုင်ရန် လုပ်ဆောင်ပေးမှုများကြောင့် အခွန်ငွေရရှိမှုတိုးလာရာ ၂၀၁၇ - ၂၀၁၈ ဘဏ္ဍာနှစ်တွင် ၂၀၁၆ -၂၀၁၇ ဘဏ္ဍာနှစ်ထက် နှစ်ဆနီးပါးနှင့် လက်ရှိဘဏ္ဍာနှစ် နှစ်ဝက်တွင်လည်း နှစ်ဆနီးပါး တိုးတက်ရရှိလာနေခြင်းဖြစ်ကြောင်း သိရသည်။
မြို့နယ်အဆင့်ကော်မတီများဖြင့် မြေပြင်အခြေအနေအား ကြီးကြပ်စေခြင်းဖြင့် တရားမဝင် မြစ်ကျောက်၊သဲထုတ်လုပ်နေသူများလုပ်ကိုင်ခွင့်လျှောက်ထားစေကာ အမှန်တကယ် ထုတ်လုပ်နိုင်ချေရှိသည့်နေရာများအား စနစ်တကျ ခွင့်ပြုပေးခြင်းဖြင့် ဒေသတွင်း အလုပ်အကိုင်အခွင့်အလမ်း ရရှိစေပြီး  သဘာဝပတ်ဝန်းကျင်ပျက်စီးမှုကို ကာကွယ်နိုင်စေရန်အတွက် ရည်ရွယ်ခြင်းဖြစ်ကြောင်း သိရသည်။

သတင်း၊ဓါတ်ပုံ #ဖီးနစ်