~~~~~~~~⊰❂ unicode ❂⊱~~~~~~~~

ကျိုင်းတုံနှင့် မိုင်းဖြတ်မြို့များတွင် မျက်စိဝေဒနာရှင်များအား အခမဲ့ကုသပေးမည်ဖြစ်၍ စာရင်းပေးသွင်းနိုင်ပြီ
************
ရန်ကုန်မြို့မှ မျက်စိပါရဂူကြီးများနှင့် ကျွမ်းကျင်ပညာရှင်များပါဝင်သည့် ချယ်ရီမေတ္တာဖောင်ဒေးရှင်းက ရှမ်းပြည်နယ်(အရှေ့ပိုင်း) ကျိုင်းတုံမြို့နှင့် မိုင်းဖြတ်မြို့တွင် မျက်စိအခမဲ့ကုသပေးမည်ဖြစ်၍ ဆက်သွယ်စာရင်းပေးသွင်းနိုင်ပြီဖြစ်ကြောင်း သိရသည်။

ဖောင်ဒေးရှင်း၏ (၂၅) ကြိမ်မြောက် စက္ခုဒါနလှူဒါန်းပွဲအဖြစ် ကျိုင်းတုံမြို့တွင် ၂၀၁၈ ခုနှစ် နိုဝင်ဘာလ (၂၆)ရက်နေ့မှ ဒီဇင်ဘာလ(၁)ရက်နေ့အထိလည်းကောင်း မိုင်းဖြတ်မြို့တွင် (၂၆)ကြိမ်မြောက် စက္ခုဒါနလှူဒါန်းပွဲအဖြစ် နိုဝင်ဘာလ (၂၅)ရက်နေ့မှ နိုဝင်ဘာလ(၂၈)ရက်နေ့အထိလည်းကောင်း ကုသပေးသွားမည်ဖြစ်ကြောင်း သိရသည်။

“တစ်ခြားဒေသက ဝေဒနာရှင်တွေလည်း လာလို့ရပါတယ်။ လာမယ်ဆိုရင်တော့ ကျွန်တော်တို့က နေဖို့ထိုင်ဖို့အတွက်ကတော့ ကိုယ့်အစီအစဉ်နဲ့ကိုယ် နေရမှာ ဖြစ်ပါတယ်။ ကျန်တဲ့ စမ်းသပ်ခ၊ ခွဲစိတ်ခ၊ မျက်မှန်နဲ့ ဆေးဝါးတွေအတွက်ကတော့ အခမဲ့ပါ”ဟု ဒေါက်တာဂျိုးဇော်က တာချီလိတ်သတင်းအေဂျင်စီသို့ ပြော သည်။

ကျိုင်းတုံမြို့တွင် ကောင်းမှူးခမ်း ကျောင်းတိုက်၌ စမ်းသပ်ပေးသွားမည်ဖြစ်ပြီး ခွဲစိတ်ရန် လိုအပ်သူများကို နိုဝင်ဘာလ(၂၉)ရက်မှ ဒီဇင်ဘာလ(၁)ရက်နေ့အထိ ကျိုင်းတုံမြို့ရှိ ကုတင်(၂၀၀)ဆံ့ ပြည်သူ့ဆေးရုံကြီးတွင် ခွဲစိတ်ကုသပေးသွားမည် ဖြစ်ကြောင်း သိရပြီး မိုင်းဖြတ်မြို့တွင် ပြည်သူ့ဆေးရုံကြီး၌ စမ်းသပ်ကုသမှုများ လုပ်ဆောင်ပေးသွားမည်ဖြစ်ကြောင်း သိရသည်။

ဆေးကုသမှု ခံယူလိုသော မျက်စိဝေဒနာရှင်များအနေဖြင့် သက်ဆိုင်ရာ ရပ်ကွက်၊ ကျေးရွာ အုပ်ချုပ်ရေးမှူးရုံးများတွင် စာရင်းပေးနိုင်သည့်အပြင် ကျိုင်းတုံမြို့တွင် ကုသမှုခံယူလိုသူမျာအးနေဖြင့် ဒေါက်တာ စိုင်းစိုင်း ၀၉ ၅၂၅၂၈၈၉၊ ဒေါက်တာ ဂျိုးဇော် ၀၉ ၄၅၈၀၃၁၃၅၃၊ ဒေါက်တာ ဉာဏ်လင်းထိုက် ၀၉၅၂၄၂၉၀၅ ၊ဦးအောင်ဌေး ၀၉ ၄၅၆၅၅၉၇၇၇ တို့သို့လည်းကောင်း မိုင်းဖြတ်မြို့တွင် ကုသမှုခံယူလိုသူများအနေဖြင့် ပြည်သူ့လွှတ်တော်ကိုယ်စားလှယ် ဦးလင်းဇော်ထွန်း ၀၉ ၅၂၅၀၀၁၄၊ ၀၉ ၃၁၀၀၁၆၁၆၊ ပြည်နယ်လွှတ်တော်ကိုယ်စားလှယ်များဖြစ်သည့် ဦးစိုင်းကျောက် ၀၉ ၄၂၈၂၁၀၈၄၁နှင့် ဦးအားကို ၀၉ ၄၂၈၂၁၀၈၆၆ တို့သို့ ဆက်သွယ်စာရင်းပေးသွင်းနိုင်ကြောင်း သိရသည်။

ချယ်ရီမေတ္တာဖောင်ဒေးရှင်းသည် နှစ်စဉ် နယ်မြို့များတွင် အခမဲ့ မျက်စိခွဲစိတ် ကုသပေးခြင်းများကို ဆောင်ရွက်ပေးနေခြင်းဖြစ်ကြောင်း သိရသည်။
သတင်း #ဇွဲမြတ်