~~~~~~~~⊰❂ unicode ❂⊱~~~~~~~~

မိုင်းဆတ်မြို့တွင် ရဲလုပ်ငန်းတွင်ပူးပေါင်းပါဝင်သည့် ဒေသခံများအား (၅၄)နှစ်မြောက် မြန်မာနိုင်ငံရဲတပ်ဖွဲ့နေ့တွင် ဂုဏ်ပြုချီးမြှင့်
***************
 (၅၄)နှစ်မြောက် မြန်မာနိုင်ငံရဲတပ်ဖွဲ့နေ့အထိမ်းအမှတ်အဖြစ် ရှမ်းပြည်နယ် (အရှေ့ပိုင်း) မိုင်းဆတ်မြို့၌ ထူးချွန်ရဲတပ်ဖွဲ့ဝင်များနှင့် မိသားစုဝင်များအပြင် ရဲလုပ်ငန်းတွင် တက်ကြွစွာပူးပေါင်းပါဝင်သည့် ဒေသခံများကို ဂုဏ်ပြုချီးမြှင့်ပြီး ရဲတပ်ဖွဲ့ဝင်ဟောင်းများကို အမှတ်တရလက်ဆောင်ပေးအပ်ကြောင်း သိရသည်။

၂၀၁၈ ခုနှစ်၊ အောက်တိုဘာလ(၁)ရက်နေ့တွင် ကျရောက်သည့် မြန်မာနိုင်ငံရဲတပ်ဖွဲ့နေ့ အထိမ်းအမှတ်အခမ်းအနားကို ခရိုင်ရဲတပ်ဖွဲ့မှူးရုံးတွင် ကျင်းပရာ ထူးချွန်ရဲတပ်ဖွဲ့ဝင်များ၊ မိသားစုစည်းရုံးရေးနှင့် စည်းကမ်းထိန်းသိမ်းရေးကော်မတီက ရွေးချယ်ခံရသည့် ရဲတပ်ဖွဲ့ဝင်မိသားစုများအပြင် ရဲလုပ်ငန်းတွင် ပူးပေါင်းပါဝင်ပေးခဲ့သည့် ဒေသခံများကိုပါ ဂုဏ်ပြုဆုများ ချီးမြှင့်ခဲ့ပြီး ရဲတပ်ဖွဲ့ဝင်ဟောင်းများအား အမှတ်တရလက်ဆောင်များ ပေးအပ်ခဲ့ကြောင်း သိရသည်။

ခရိုင်ရဲတပ်ဖွဲ့မှူးရုံးတွင် ကျင်းပသည့်အဆိုပါအခမ်းအနားတွင် မြန်မာနိုင်ငံရဲတပ်ဖွဲ့ ရဲချုပ်၊ ဒုတိယရဲဗိုလ်ချုပ်ကြီး အောင်ဝင်းဦးထံမှပေးပို့သော သဝဏ်လွှာအား  ခေတ္တခရိုင်ရဲတပ်ဖွဲ့မှူး ရဲမှူးမြင့်ရွှေဖတ်ကြားခဲ့ပြီး ဂုဏ်ပြုဆုများကို ပြည်သူ့လွှတ်တော်ကိုယ်စားလှယ် ဦးစိုင်းခတ္တိယ၊ ခရိုင်အုပ်ချုပ်ရေးမှူး ဦးနေမျိုးအောင်၊ ခေတ္တခရိုင်ရဲတပ်ဖွဲ့မှူး ရဲမှူးမြင့်ရွှေ၊ မြို့နယ်ရဲတပ်ဖွဲ့မှူး ရဲမှူးအောင်နိုင်ရွှေနှင့် တာဝန်ရှိသူတို့က ချီးမြှင့်ကြောင်း သိရသည်။

အဆိုပါ အခမ်းအနားတွင် မြန်မာနိုင်ငံရဲတပ်ဖွဲ့နေ့ မှတ်တမ်း(၅)မိနစ်စာ ဗီဒီယိုပြသပြီး အထိမ်းအမှတ်ပြခန်းကိုလည်း ပြသထားကြောင်း သိရသည်။

သတင်း၊ဓါတ်ပုံ #ဇော်ဝမ်းထွန်း