~~~~~~~~⊰❂ unicode ❂⊱~~~~~~~~

ရှမ်းပြည်နယ်အစိုးရအဖွဲ့ရုံးသစ် နှင့် ရှမ်းပြည်နယ်လွှတ်တော် အဆောက်အဦသစ် ဖွင့်ပွဲ အခမ်းအနားအား တောင်ကြီးမြို့တွင် ၂၀၁၈ခုနှစ် မတ်လ(၂၃)ရက်နေ့ နံနက်ပိုင်းက ကျင်းပပြုလုပ်ရာ ပြည်နယ်နှင့် တိုင်းဒေသကြီးတို့မှ လွှတ်တော်ဥက္ကဌများနှင့်ဒုတိယဥက္ကဌများ တက်ရောက်လာခဲ့ကြကြောင်း သိရသည်။

ရှမ်းပြည်နယ်အစိုးရ အဖွဲ့ရုံးသစ်အား တောင်ကြီးမြို့၊ သစ်တောရပ်ကွက်၊ အိမ်တော်လမ်းရှိ မြေဧရိယာ(၃.၈၅၅)ဧကပေါ်တွင် ရှမ်းပြည်နယ်အစိုးရအဖွဲ့၏ ရန်ပုံငွေ ကျပ်သန်းပေါင်း (၆၁၀၀)ဖြင့် တည်ဆောက်ခြင်း ဖြစ်ကြောင်း သိရသည်။

"ရှမ်းပြည်နယ်အစိုးရအဖွဲ့ရုံးသစ်ကို ရှမ်းပြည်နယ်အစိုးရအဖွဲ့ ရန်ပုံငွေ ကျပ်သန်းပေါင်း (၆၁၀၀)ဖြင့် Great Horuzone Co.,Ltd မှ တာဝန်ယူ တည်ဆောက်ခဲ့ခြင်း ဖြစ်ပါတယ်။ ယခု အဆောက်အဦဟာ ရှမ်းပြည်နယ်ရဲ့ အမြင့်ဆုံး အုပ်ချုပ်ရေးအဖွဲ့များ ရုံးထိုင်ရာ အဆောက်အဦ ဖြစ်တဲ့အတွက် ရုံး၏ အသွင် သဏ္ဍာန်ပိုင်းအား အကောင်းမွန်ဆုံး ပြုလုပ်ထားတာကို တွေ့မြင်ရမှာဖြစ်ပါတယ်၊ ကျွန်တော်အပါအဝင် ဝန်ကြီးများ၊ အရာထမ်းများ၊ အမှုထမ်းများအနဖြေင့် ဒီအဆောက်အဦအရိပ်ကို ခိုလှုံပြီး ပြည်နယ်အကျိုး၊ နိုင်ငံ့အကျိုးကို တာဝန်သိသိ၊ အနှစ်သာရရှိရှိဖြင့် လုပ်ဆောင်သွားကြဖို့ တိုက်တွန်း ပြောကြားလိုပါတယ်"ဟု ရှမ်းပြည်နယ်အစိုးရအဖွဲ့ရုံးသစ်ဖွင့်ပွဲ အခမ်းအနားတွင် ရှမ်းပြည်နယ်ဝန်ကြီးချုပ် ဒေါက်တာလင်းထွဋ်က တိုက်တွန်းပြောကြားသွားသည်။

ရှမ်းပြည်နယ်အစိုးရအဖွဲ့ရုံးသစ် နှင့် ရှမ်းပြည်နယ်လွှတ်တော်အဆောက်အဦသစ် ဖွင့်ပွဲတွင် ရှမ်းပြည်နယ်အစိုးရ အဖွဲ့ဝင် ပြည်နယ်ဝန်ကြီးချုပ် ဒေါက်တာလင်းထွဋ် နှင့် အစိုးရအဖွဲ့ဝင်ဝန်ကြီးများ၊ တိုင်းရင်းသားရေးရာဝန်ကြီးများ၊ ပြည်နယ်လွှတ်တော်ဥက္ကဌ ဦးစိုင်းလုံဆိုင် နှင့် တာဝန်ရှိသူများက ဖွင့်လှစ်ပေးခဲ့ကြကြောင်း သိရသည်။

ရှမ်းပြည်နယ်လွှတ်တော် အဆောက်အဦသစ် ဖွင့်ပွဲပြီးသည့် နောက်တွင် ဖွင့်ပွဲ အထိမ်းအမှတ် အနဖြေင့် ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ်လွှတ်တော်ဥက္ကဌ ဦးစိုင်းလုံဆိုင် နှင့် ပြည်နယ် တရားလွှတ်တော် တရားသူကြီးချုပ် ဦးကြွယ်ကြွယ်တို့မှ သစ်ပင်စို်က်ပျိုးခဲ့ကြကြောင်း သိရသည်။

ရှမ်းပြည်နယ်အစိုးရအဖွဲ့ရုံးသစ် နှင့် ရှမ်းပြည်နယ်လွှတ်တော် အဆောက်အဦသစ် ဖွင့်ပွဲ အခမ်းအနားသို့ ရှမ်းပြည်နယ်အစိုးရအဖွဲ့ဝင် ဝန်ကြီးချုပ်နှင့် ဝန်ကြီးများ၊ တိုင်းရင်းသားရေးရာဝန်ကြီးများ၊ ရှမ်းပြည်နယ်ရှိ ကိုယ်ပိုင်အုပ်ချုပ်ခွင့်ရဒေသများမှ ဥက္ကဌများ၊ ရှမ်းပြည်နယ်လွှတ်တော် ဥက္ကဌ နှင့် လွှတ်တော် ကိုယ်စားလှယ်များ၊ တိုင်းဒေသကြီးနှင့်ပြည်နယ်လွှတ်တော်များမှ ဥက္ကဌ နှင့် ဒုတိယဥက္ကဌများ၊ ဖိတ်ကြားထားသည့် ဧည့်သည်တော်များ တက်ရောက်လာခဲ့ကြကြောင်း သိရသည်။

သတင်း - ဇန်ထွန်း
ဓာတ်ပုံ - soom sai san khat