~~~~~~~~⊰❂ unicode ❂⊱~~~~~~~~

ကျိုင်းတုံတွင် မူးယစ်ကျော်ဇောသတင်းရှိသည့်နေအိမ်အား ရှာဖွေရာ စိတ်ကြွဆေးပြား ၄၀၀ ကျော်ဖမ်းမိ
**********
ရှမ်းပြည်နယ်(အရှေ့ပိုင်း) ကျိုင်းတုံမြို့တွင် မူးယစ်ဆေးဝါးကျော်ဇောသတင်းရှိသည့်နေအိမ်အား ၂၀၁၈ ခုနှစ် ဇွန်လ (၁၁)ရက်နေ့ နံနက် (၁)နာရီမထိုးမီအချိန်က ဝင်ရောက်ရှာဖွေရာ WY စိတ်ကြွဆေးပြား (၄၁၉)ပြားနှင့်အတူ အဆိုပါနေအိမ်တွင် နေထိုင်သူနှစ်ဦးအား ဖမ်းဆီးရမိကြောင်း သိရသည်။

မူးယစ်ဆေးဝါးရောင်းဝယ်ကြောင်း သတင်းရရှိသဖြင့် မင်းမင်းဇော်(ခ) မောင်ဇော်၏နေအိမ်အား ရဲတပ်ဖွဲ့က ဝင်ရောက်ရှာဖွေရာ အဆိုပါနေအိမ်တွင် မင်းမင်းဇော်(ခ)မောင်ဇော်အား ၎င်း၏ဇနီးဖြစ်သူ မဥမ္မာဌေးတို့နှစ်ဦးအား အတူထိုင်နေသည်ကို တွေ့ရပြီး မင်းမင်းဇော်၏လက်ထဲတွင် ပလတ်စတစ်ကော်ဗူး (၃)ဗူးကိုင်ဆောင်ထားသည်ကို တွေ့ရကြောင်း သိရသည်။

ရဲတပ်ဖွဲ့က ရှာဖွေရန်ကြိုးစားစဉ် မင်းမင်းဇော်က ပလတ်စတစ်ဗူးများကို ယူ၍ နေအိမ်အပေါ်ထပ်သို့ တက်ပြေးသွားသဖြင့် လိုက်လံဖမ်းဆီးရာ ပလတ်စတစ်ဗူးများအား နေအိမ်ပြတင်းပေါက်မှတစ်ဆင့် အိမ်နီးချင်း၏ ခြံဝန်းအတွင်း လွှင့်ပစ်လိုက်သည်ကို တွေ့ရသဖြင့် ရဲတပ်ဖွဲ့က သွားရောက်စစ်ဆေးရာ WY စိတ်ကြွဆေးပြား (၄၁၉)ပြားထည့်ထားသည်ကို စစ်ဆေးတွေ့ရှိရခြင်းဖြစ်ကြောင်း သိရသည်။

မူးယစ်ဆေးများနှင့်အတူ ဖမ်းဆီးရမိသည့် မင်းမင်းဇော်(ခ)မောင်ဇော်အား ကျိုင်းတုံမြို့မရဲစခန်းတွင် မယ(ပ) ၈၄/၂၀၁၈၊ မူး/စိတ်ပုဒ်မ ၁၉(က)အရ အမှုဖွင့်ထားကာ မူးယစ်ဆေးဝါးသုံးစွဲခြင်းရှိ/မရှိကို ကျိုင်းတုံပြည်သူ့ဆေးရုံကြီးသို့ ပို့ဆောင်စစ်ဆေးထားကြောင်း သိရသည်။

သတင်း #ငြိမ်းချမ်း(ပြည်)
ဓါတ်ပုံ #ရဲတပ်ဖွဲ့