~~~~~~~~⊰❂ unicode ❂⊱~~~~~~~~

ကျိုင်းတုံတွင် ကျင်းပသည့် လူငယ်ခေါင်းဆောင်မှုဖိုရမ်သို့ ဒေသတွင်းမှ လူငယ် ၁၀၀ ခန့်တက်ရောက်ဆွေးနွေး
*********
ရှမ်းပြည်နယ် (အရှေ့ပိုင်း) ကျိုင်းတုံမြို့ရှိ စည်ပင်ခန်းမတွင် ဒီဇင်ဘာလ(၃)ရက်နေ့က ကျင်းပသည့် လူငယ်ခေါင်းဆောင်မှုဖိုရမ်ကို ဒေသတွင်းရှိ လူငယ်(၁၀၀)ဦးခန့် တက်ရောက်ကြကြောင်း သိရသည်။

အမေရိကန်သံရုံး၏ အရှေ့တောင်အာရှလူငယ်ခေါင်းဆောင်များ ဖွံ့ဖြိုးရေးအစီအစဉ် YSEALI စတင်ခဲ့သည့် လေးနှစ်ပြည့် အထိမ်းအမှတ်အဖြစ် အဆိုပါဖိုရမ်အား ကျင်းပခြင်းဖြစ်သည်။

“အဓိကကတော့ ဒေသအကျိုး၊ လူငယ်အကျိုးကို လုပ်ကိုင်ချင်တဲ့ အရည်အချင်းပြည့်ဝတဲ့ လူငယ်ခေါင်းဆောင်သစ်တွေ ပေါ်ထွက်လာအောင်နဲ့ လူငယ်တွေ စုစုစည်းစည်းနဲ့ လှုပ်ရှားမှုတွေလုပ်လာနိုင်ဖို့ ရည်ရွယ်ပြီးတော့ ကျင်းပတဲ့ပွဲဖြစ်ပါတယ်။ ဒီလိုပွဲကို YSEALI ရဲ့ အကူအညီနဲ့ ကျိုင်းတုံမှာ ပထမဆုံးလုပ်နိုင်တာဆိုတော့ လူငယ်တွေရဲ့ အောင်မြင်မှုလို့ပြောလို့ရသလို ဒီလိုပွဲတွေ များများလုပ်နို်င်အောင်လည်း ကြိုးစားသွားပါမယ်”ဟု ကျိုင်းတုံလူငယ်စင်တာမှ ဥက္ကဌ ဒေါက်တာစိုင်းဆုမ်ဝုန်းက တာချီလိတ်သတင်းအေဂျင်စီသို့ ပြောသည်။

အဆိုပါဖိုရမ်တွင် လူငယ်ရေးရာ တက်ကြွလှုပ်ရှားသူ တစ်ဦးဖြစ်သည့် မသဥ္ဇာရွှန်းလဲ့ရည်၊ စာရေးဆရာ ဆရာမောင်မောင်စိုးနှင့် ကျိုင်းတုံလူငယ်စင်တာမှ ဒေါက်တာဂျိုးဇော်တို့က ဦးဆောင်၍ လူငယ်ခေါင်းဆောင်မှုနှင့် ပတ်သက်ပြီး ဆွေးနွေးကာ တက်ရောက်လာသူများက အပြန်အလှန် ဆွေးနွေးခဲ့ကြပြီး အမေရိကန်သံရုံးမှ ဒေါ်စောကြည်သာကလည်း အမေရိကန်သံရုံးမှ ပေးအပ်လျှက်ရှိသော ပညာသင်ဆုများအကြောင်း ရှင်းလင်းဆွေးနွေးခဲ့ကြသည်။

“ဒီနဲ့လုပ်တဲ့ပွဲရှိတယ်ဆိုတာကို Facebookက တစ်ဆင့်သိရလို့ လာပြီးတက်တာဖြစ်ပါတယ်။ ပွဲမှာဆွေးနွေးသွားတာတွေကလည်း တစ်ကယ်ကောင်းပါတယ်။ အတွေးသစ်၊ အမြင်အသစ်တွေလည်း ရလာတာပေါ့။ ဆွေးနွေးပွဲနောက်ပိုင်းလုပ်တဲ့ အမေရိကန်သံရုံးကပေးတဲ့ ပညာသင်ဆုအကြောင်းတွေကိုလည်း သိရတဲ့အတွက် လူငယ်တွေအတွက် အခွင့်အရေးတွေပေါ်လာသလို အားတက်စရာတွေလည်း ဖြစ်လာပါတယ်”ဟု အဆိုပါ ဖိုရမ်သို့ တက်ရောက်လာသူတစ်ဦးဖြစ််သည့် မောင်စိုးဝေယံကျော်က ပြောသည်။

အမေရိကန်သံရုံး၏ YSEALI အရှေ့တောင်အာရှ လူငယ်ခေါင်းဆောင်များ ဖွံ့ဖြိုးတိုးတက်ရေး အစီအစဉ် စတင်ခဲ့သည့် လေးနှစ်ပြည့်အထိမ်းအမှတ်ပွဲကို YESALI YOUnified 2017 အစီအစဉ်အဖြစ် မြန်မာနိုင်ငံ အပါအဝင် အာဆီယံ(၁၀)နိုင်ငံတွင်လည်း တစ်ပြိုင်နက်တည်း ကျင်းပခဲ့ခြင်းဖြစ်ကြောင်း သိရသည်။

သတင်း၊ဓါတ်ပုံ #ဇွဲမြတ်