~~~~~~~~⊰❂ unicode ❂⊱~~~~~~~~

ကုလသမဂ္ဂလူ့အခွင့်အရေးကောင်စီအထူးအစည်းအဝေး၌ အိုအိုင်စီမှ တင်သွင်းသော မြန်မာနိုင်ငံဆိုင်ရာ ဆုံးဖြတ်ချက်အဆိုမူကြမ်းအား တူညီဆန္ဒဖြင့် အတည်ပြုနိုင်ခဲ့ခြင်းမရှိ
***********
ကုလသမဂ္ဂလူ့အခွင့်အရေးကောင်စီအထူးအစည်းအဝေး၌ အိုအိုင်စီမှ တင်သွင်းသော မြန်မာနိုင်ငံဆိုင်ရာ ဆုံးဖြတ်ချက်အဆိုမူကြမ်းအား မဲခွဲဆုံးဖြတ်ရာ လူ့အခွင့်အရေးကောင်စီအဖွဲ့ဝင် (၄၇)နိုင်ငံရှိသည့်အနက် (၁၄)နိုင်ငံက ထောက်ခံခြင်း မပြုခဲ့ကြသဖြင့် အဆိုမူကြမ်းမှာ တူညီဆန္ဒဖြင့် အတည်ပြုနိုင်ခဲ့ခြင်း မရှိကြောင်း သိရသည်။
အဆိုပါမူကြမ်းအား မဲခွဲဆုံးဖြတ်ရန် လူ့အခွင့်အရေးကောင်စီအဖွဲ့ဝင် တရုတ်နိုင်ငံကိုယ်စားလှယ်အဖွဲ့က တောင်းဆိုခဲ့ခြင်းဖြစ်ပြီး မြန်မာနိုင်ငံအနေဖြင့် ဆုံးဖြတ်ချက်နှင့်ပတ်သက်ပြီး ပါ၀င်ပတ်သက်မည် မဟုတ်ကြောင်း ထုတ်ဖော်ပြောကြားခဲ့ကြောင်း သိရသည်။

ဆုံးဖြတ်ချက်အဆိုအား မဲခွဲဆုံးဖြတ်ရာတွင် ထောက်ခံမဲ (၃၃)မဲ၊ ကန့်ကွက်မဲ(၃)မဲ၊ ကြားနေမဲ (၉)မဲဖြင့် အတည်ပြုခဲ့ပြီး လူ့အခွင့်အရေးကောင်စီအဖွဲ့ဝင် (၂) နိုင်ငံမှ ပါဝင်မဲပေးခြင်း မပြုခဲ့ကြောင်း သိရသည်။

မဲခွဲဆုံးဖြတ်ရာတွင် ကန့်ကွက်မဲပေးသည့်နိုင်ငံများမှာ တရုတ်နိုင်ငံ၊ ဖိလစ်ပိုင်နိုင်ငံနှင့် ဘူရွန်ဒီနိုင်ငံတို့ ဖြစ်ကြောင်း သိရသည်။

မြန်မာနိုင်ငံအစိုးရအနေဖြင့် ရခိုင်ပြည်နယ်အရေးကိစ္စကို ပြည်တွင်းတွင် ဖြေရှင်းဆောင်ရွက်နေသကဲ့သို့ ဘင်္ဂလားဒေ့ရှ်နိုင်ငံနှင့်လည်း နှစ်နိုင်ငံညှိနှိုင်းဖြေရှင်းလျက်ရှိနေရာ အဆိုပါမူကြမ်း ချမှတ်ခြင်းသည် မြေပြင်အခြေအနေကို အထောက်အကူ မဖြစ်စေဘဲ ပိုမိုရှုပ်ထွေးလာစေနိုင်သည့် အချက်ကို ထောက်ပြ၍ တရုတ်နိုင်ငံကိုယ်စားလှယ်အဖွဲ့အနေဖြင့် မဲခွဲရန် တောင်းဆိုခဲ့ခြင်း ဖြစ်ကြောင်း သိရသည်။

ဂျီနီဗာမြို့ ကုလသမဂ္ဂအဆောက်အအုံရှိ လူ့အခွင့်အရေးကောင်စီ၌ အစ္စလာမ်မစ် နိုင်ငံများ ပူးပေါင်း ဆောင်ရွက်ရေးအဖွဲ့ (အိုအိုင်စီ)မှ မြန်မာနိုင်ငံနှင့်စပ်လျဉ်း၍ (၂၇) ကြိမ်မြောက် အထူးအစည်းအဝေး တစ်ရပ်ကို ဒီဇင်ဘာလ (၅) ရက်နေ့က ခေါ်ယူခဲ့ခြင်းဖြစ်ပြီး အစည်းအဝေးတွင် ဘင်္ဂလားဒေ့ရှ်နိုင်ငံက ရခိုင်ပြည်နယ်ရှိ လူနည်းစုများနှင့် မူဆလင်အသိုက်အဝန်း၏ လူ့အခွင့်အရေးအခြေအနေနှင့်ပတ်သက်၍ ဆုံးဖြတ်ချက် အဆိုမူကြမ်းကို အရေးယူဆောင်ရွက်ရန် အဆိုတင်သွင်းခဲ့ခြင်းဖြစ်ကြောင်း သိရသည်။

ဆုံးဖြတ်ချက်အဆိုအား အရေးယူဆုံးဖြတ်ခြင်းမပြုမီ မြန်မာအမြဲတမ်းကိုယ်စားလှယ် သံအမတ်ကြီး ဦးထင်လင်း ပြောကြားသည့် မိန့်ခွန်းတွင် မြန်မာနိုင်ငံသည် နိုင်ငံတစ်နိုင်ငံတည်းကိုသာ ချမှတ်သည့် မည်သည့် ဆုံးဖြတ် ချက်မျိုးကိုမဆို ဆန့်ကျင်ပြီး ထိုသို့ ဆုံးဖြတ်ချက်ချမှတ်ခြင်းသည် ပိုမိုကွဲပြားမှုနှင့် ထိပ်တိုက်ရင်ဆိုင်မှုများကိုသာ ဖြစ်ပေါ်လာစေနိုင်သဖြင့် လူ့အခွင့်အရေးကောင်စီ၏ ဘက်မလိုက်မှု၊ ဓမ္မဓိဋ္ဌာန်ကျမှု၊ ရွေးချယ်မှု မရှိစေရေး စသည့်မူများနှင့် လိုက်လျောညီထွေ မရှိပါကြောင်းထည့်သွင်း ပြောကြားခဲ့သည်။

အဆိုမူကြမ်းသည် ယုံကြည်မှု တူညီခြင်းမရှိသည့် လူစုတစ်စုအပေါ်တွင်သာ အဓိကအလေးထားပြီး လူ့အခွင့်အရေးကာကွယ်စောင့်ရှောက်ခြင်းတွင် ကမ္ဘာပေါ်ရှိ မည်သည့် လူမျိုး၊ ဘာသာနှင့် ကျား/မ ခွဲခြားမှု မရှိသင့်ကြောင်းကိုလည်း ထည့်သွင်း ပြောကြားခဲ့သည်။

အဆိုမူကြမ်းပါ အချက်အချို့သည် မြန်မာနိုင်ငံ၏ အချုပ်အခြာအာဏာကို ထိပါးသကဲ့သို့ ဖြစ်နေကာ ခိုင်မာလုံလောက်သည့် သက်သေများမရှိဘဲ စွပ်စွဲချက် များကိုလည်း ထည့်သွင်းဖော်ပြထားပြီး နိုင်ငံတကာ၏ အကူအညီပေးမှုသည် ပြဿနာကို ဖြေရှင်းမှုသာဖြစ်သင့်ကာ ပိုမိုဆိုးရွားစေမှုကို မဖြစ်စေသင့်ကြောင်းကိုလည်း သံအမတ်ကြီး၏ မိန့်ခွန်းတွင် ပြောကြားခဲ့ကြောင်း သိရသည်။

အဆိုမူကြမ်း၌ ARSA ၏ အကြမ်းဖက်တိုက်ခိုက်ခြင်းကို ရှုတ်ချခြင်း မရှိကြောင်းကိုလည်း သံအမတ်ကြီးက ထောက်ပြပြောဆိုခဲ့ပြီး အဆိုပါအချက်များကြောင့် မြန်မာကိုယ်စားလှယ်အဖွဲ့သည် အဆိုမူကြမ်းအား လက်မခံနိုင်သဖြင့် ပါဝင်ပတ်သက်ခြင်းပြုမည် မဟုတ်ကြောင်း ထုတ်ဖေါ်ပြောကြားခဲ့သည်။

ရခိုင်ပြည်နယ်အရေးကိစ္စသည် ရှုပ်ထွေးသိမ်မွေ့သဖြင့် နိုင်ငံတကာအသိုက်အဝန်းအနေဖြင့် စိန်ခေါ်မှု များကို နားလည်ရန်လိုအပ်ပြီး လူ့အခွင့်အရေးကောင်စီ၏ ဆုံးဖြတ်ချက် ရှိသည်ဖြစ်စေ၊ မရှိသည်ဖြစ်စေ ရခိုင်ပြည်နယ်တွင် ရင်ဆိုင် နေရသော ကိစ္စများကို ဆက်လက်ဖြေရှင်းဆောင်ရွက်သွားမည် ဖြစ်ကြောင်း သံအမတ်ကြီး၏ မိန့်ခွန်းတွင် ထုတ်ဖေါ်ပြောကြားခဲ့သည်။

ရခိုင်ပြည်နယ်ကိစ္စနှင့် ပတ်သက်၍ ဘက်ပေါင်းစုံမှ ဖိအားပေး နေသည့်ကြားမှ မဲခွဲရန်တောင်းဆိုပေးခြင်း၊ အဆိုမူကြမ်းကို ကန့်ကွက်မဲပေးခြင်း (သို့မဟုတ်) ကြားနေမဲပေးခြင်း (သို့မဟုတ်) မဲပေးမှုတွင် မပါဝင်ခြင်းဖြင့် မြန်မာနိုင်ငံအပေါ် နားလည်မှုပြသခဲ့ ကြသည့် လူ့အခွင့်အရေးကောင်စီအဖွဲ့ဝင်နိုင်ငံများကို နိုင်ငံခြားရေးဝန်ကြီးဌာနမှ ကျေးဇူးတင်ရှိကြောင်းကိုလည်း ဖေါ်ပြခဲ့သည်။

Source:နိုင်ငံခြားရေးဝန်ကြီးဌာန