~~~~~~~~⊰❂ unicode ❂⊱~~~~~~~~

လုပ်ငန်းခွင်အကြို ဆရာအတတ်ပညာ ဒီပလိုမာ နှစ်နှစ်သင်တန်းတက်ရောက်လိုသူများ စက်တင်ဘာ ၂၉ ရက် နောက်ဆုံးထား လျှောက်ထားနိုင်
***********
၂၀၁၇ ခုနှစ်တက္ကသိုလ်ဝင်တန်းအောင်မြင်ထားသူများ လုပ်ငန်းခွင်အကြို ဆရာအတတ်ပညာဒီပလိုမာ နှစ်နှစ်သင်တန်းကို စက်တင်ဘာလ (၂၉)ရက်နေ့ နောက်ဆုံးထား၍ လျှောက်ထားနိုင်ကြောင်း ပညာရေးဝန်ကြီးဌာနက ထုတ်ပြန်ထားသည်။

ဒီဇင်ဘာလ (၄)ရက်နေ့တွင် စတင်ဖွင့်လှစ်မည့် အဆိုပါသင်တန်းအား တက်ရောက်ခွင့် ရွေးချယ်ခံရပါက ပညာရေးကောလိပ်ကျောင်းဆောင်နေထိုင်ခွင့်လည်း ရရှိမည်ဖြစ်ကြောင်း သိရသည်။

ဒီဇင်ဘာလ (၁)ရက်နေ့တွင် အသက်(၂၂)နှစ်ထက်မကြီးသူများ ၂၀၁၇ ခုနှစ် တက္ကသိုလ်ဝင်စာမေးပွဲအမှတ်စာရင်းနှင့်အတူ မိမိတို့တက္ကသိုလ်ဝင်စာမေးပွဲအောင်မြင်ခဲ့သည့် တိုင်းဒေသကြီး/ပြည်နယ်အတွင်းရှိ ပညာရေးကောလိပ်ကျောင်းများသို့ လည်းကောင်း၊ နေပြည်တော်ကောင်စီနယ်မြေမှ အောင်မြင်သူများအနေဖြင့် ပညာရေးဝန်ကြီးဌာန၊ အဆင့်မြင့်ပညာဦးစီးဌာန၊ ဆရာအတတ်သင်ပညာနှင့် လေ့ကျင့်ရေးဌာနသို့ လူကိုယ်တိုင်ဖြစ်စေ၊ စာတိုက်မှဖြစ်စေ သတ်မှတ်ပုံစံဖြင့် လျှောက်ထားနိုင်ကြောင်း သိရသည်။

သင်တန်းတက်ရောက်ခွင့်ရသူများစာရင်းကို သက်ဆိုင်ရာ ပညာရေးကောလိပ်များတွင် ထုတ်ပြန်ကြေညာပြီးပါကတက်ရောက်ခွင့်ရသူများသည် နိုဝင်ဘာလ (၃၀)ရက်နေ့မှ ဒီဇင်ဘာလ (၃)ရက်နေ့အတွင်း  သက်ဆိုင်ရာ ပညာရေးကောလိပ်များသို့ သတင်းပို့ရမည်ဖြစ်ကြောင်း သိရသည်။

ပညာရေးကောလိပ်များကို ကချင်ပြည်နယ်တွင် မြစ်ကြီးနား၊ ကယားပြည်နယ်တွင် လွိုင်ကော်၊ ကရင်ပြည်နယ်တွင် ဘားအံ၊ ချင်းပြည်နယ်တွင် ဟားခါး၊ စစ်ကိုင်းတိုင်းဒေသကြီးတွင် စစ်ကိုင်းနှင့် မုံရွာ၊ တနင်္သာရီတိုင်းဒေသကြီးတါင် ထားဝယ်၊ ပဲခူးတိုင်းဒေသကြီးတွင် တောင်ငူနှင့် ပြည်၊ မကွေးတိုင်းဒေသကြီးတွင် မကွေးနှင့် ပခုက္ကူ၊ မန္တလေးတိုင်းဒေသကြီးတွင် မန္တလေးနှင့် မိတ္ထီလာ၊ မွန်ပြည်နယ်တွင် မော်လမြိုင်၊ ရခိုင်ပြည်နယ်တွင် ကျောက်ဖြူ၊ ရန်ကုန်တိုင်းဒေသကြီးတွင် ရန်ကင်း၊ သင်္ဃန်းကျွန်းနှင့် လှည်းကူး၊ ရှမ်းပြည်နယ်တွင် တောင်ကြီး၊ လားရှိုးနှင့် ကျိုင်းတုံ၊ ဧရာဝတီတိုင်းဒေသကြီးတွင် ပုသိမ်၊ မြောင်းမြနှင့် ဘိုကလေးတို့တွင် ဖွင့်လှစ်ထားခြင်းဖြစ်သည်။