~~~~~~~~⊰❂ unicode ❂⊱~~~~~~~~

ဖရူဆိုမြို့နယ်မှ နိုင်ငံပိုင် ပိုးစာခြံ ပြန်လည်ပြုပြင်ထိန်းသိမ်းပြီး ပိုးမွေးမြူရေး ပြန်လည်လုပ်ကိုင်မည်
************
ကယားပြည်နယ် ၊ ဖရူဆိုမြို့နယ် ၊ ထီးပေါ့ဆိုကျေးရွာအုပ်စု ၊ ထီးစကလူဒေါကျေးရွာရှိ နိုင်ငံပိုင် ပိုးစာခြံအား ပြည်လည်ပြုပြင်ထိန်းသိမ်း၍ ပိုးစာလုပ်ငန်းများ ပြည်လည်လုပ်ဆောင်သွားမည် ဖြစ်ကြောင်း သိရသည်။

" ပိုးစာခြံသည် ယခင်က ပိုးစာပင်များနှင့် လယ်ယာထွက်သီးနှံများ စိုက်ပျိုးဖြစ်ထွန်းအောင်မြင်ခဲ့သဖြင့် ပြန်လည်တိုးချဲ့စိုက်ပျိုးသွားမည်ဖြစ်ပြီး ကျွဲ/နွားလွှတ်ကျောင်းခြင်းများမှ ကာကွယ်ရန်နှင့် သွပ်ဆူးကြိုး နှင့် အုတ်တံတိုင်း ကာရံ၍ ပိုးစာပင် စိုက်ပျိုးခြင်း၊ ပိုးမွေးမြူခြင်းလုပ်ငန်းများကို တိုးချဲ့ ဆောင်ရွက်သွားမှာဖြစ်ပါတယ် "ဟု ကယားပြည်နယ် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးဘော့စကိုက ပြောသည်။

ဧက (၁၀၀)ကျော်ရှိသည့် ပိုးစာခြံမှာ လက်ရှိတွင် ပိုးစာပင်များ စိုက်ပျိုးခြင်းမရှိဘဲ အဆောက်ဦများမှာလည်း ပျက်စီးနေသဖြင့် နွားများလွှတ်ကျောင်းရာနေရာ ဖြစ်နေကြောင်း သိရသည်။

"ကျွန်တော် ဖရူဆိုရောက်တိုင်း ဖြတ်သွားတယ် ။ ပိုးစာခြံလို့သာပြောတယ်။ မသုံးတာကြာတော့ ချုံတွေနဲ့ပြည့်နေတယ်။ အဆောက်အဦတွေလည်း နှမြောစရာကောင်းတယ်။ တချို့ဆို ပျက်နေပြီပေါ့။ နွားတွေလည်း ဝင်လိုဝင်ပေါ့။ ပြန်ထိန်းသိမ်းပြီး လူထုအတွက် အကျိုးပြုလုပ်ငန်းလေး ဖော်ဆောင်ပေးရင် ကောင်းတာပေါ့”ဟု ဒီးမော့ဆိုမြို့မှ ဦးဆူရယ်က တာချီလိတ်သတင်းအေဂျင်စီသို့ ပြောသည်။

အဆိုပါ ပိုးစာခြံအားပြန်လည်ထိန်းသိမ်းရန်အစီအစဉ် ရှိ/မရှိကို ဖရူဆိုမြို့နယ် ပြည်နယ်လွှတ်တော် ကိုယ်စားလှယ် ဦးခင်မောင်ထွန်းက သြဂုတ်လ (၂၉)ရက်နေ့တွင် ကျင်းပသည့် ဒုတိယအကြိမ် ကယားပြည်နယ်လွှတ်တော် သတ္တမပုံမှန်အစည်းအဝေးတွင် မေးမြန်းခဲ့ခြင်းဖြစ်သည်။

သတင်း၊ဓါတ်ပုံ #ဆန်းဖြိုးထွန်း