တာချီလိတ်မြို့တွင် လက်နက် ခဲယမ်းများနှင့်အတူ ကျောက်စိမ်းအရိုင်းတုံးများ အပါအဝင် မူးယစ်ဆေးဝါးများ ဖမ်းဆီးရမိ

*****************

ရှမ်းပြည်နယ်(အရှေ့ပိုင်း)၊ မြန်မာ - ထိုင်းနယ်စပ်ဒေသမြို့ဖြစ်သည့် တာချီလိတ်မြို့တွင် လက်နက် ခဲယမ်းများနှင့်အတူ ကျောက်စိမ်းအရိုင်းတုံးများ အပါအဝင် မူးယစ်ဆေးဝါးများအား ဧပြီလ(၂၄)ရက်နေ့ နံနက်ပိုင်းက ဖမ်းဆီးရမိကြောင်း သိရသည်။

မူးယစ်တပ်ဖွဲ့စု(၃၀)တာချီလိတ် မှ တပ်ဖွဲ့ဝင်များ၊ တာချီလိတ်တပ်နယ်မှ တာဝန်ရှိသူများ နှင့် သက်ဆိုင်ရာ ရဲတပ်ဖွဲ့ဝင်များ ပါဝင်သည့် ပူးပေါင်းအဖွဲ့သည် မူးယစ်ဆေးဝါးသတင်းအရ တာချီလိတ်မြို့ ဝိန်းကျောက် ရပ်ကွက်ရှိ စိုင်းခမ်းကျောက်၏ နေအိမ်အား ဝင်ရောက် စစ်ဆေး ရှာဖွေရာမှ ဖမ်းဆီးရမိခြင်း ဖြစ်ကြောင်း သိရသည်။

စစ်ဆေး ရှာဖွေဖမ်းဆီးရမိသည့် မူးယစ်ဆေးဝါးများတွင် ကာလတန်ဖိုးငွေ ကျပ် (၃၂၂)သိန်းကျော် တန်ဖိုးရှိသည့် Wy စာတမ်းပါ စိတ်ကြွဆေးပြား ( ၂၁၄၄၃ )ပြားတို့ကို ရှာဖွေတွေ့ရှိရပြီး အလေးချိန် (၁.၅)ကီလိုရှိသည့် ဘိန်းစိမ်းအမဲရောင် နှင့် ပန်းရောင် စိတ်ကြွဆေးအမှုန့် (၂၈၀)ဂရမ်ခန့်အပြင် အလေးချိန် (၁၈၀)ဂရမ်ခန့်ရှိသည့် ICE(အိုက်စ်)တို့ကို တွေ့ရှိရကြောင်းနှင့် အဝါရောင်အနံ့အမှုန့် (၆)ကီလိုခွဲ နှင့် စိတ်ကြွဆေးပြား ရိုက်သည့် သံမှို (၅)ခု၊ စိတ်ကြွဆေးပြား ထည့်ရာတွင် အသုံးပြုသော အပြာရောင် ကပ်ခွာအိတ် (၁၅)ကီလိုခန့်ပါသည့် (၃)ထုပ်ကိုလည်း တွေ့ရှိရကြောင်း သိရသည်။

ဆက်လက်၍ ပြောင်းအရှည် (၆.၅)လက်မခန့်ရှိ ကိုးလုံးကျည်ထည့်၍ ပစ်ရသော လုပ်သေနတ်အတို(၁)လက်၊ လက်မ(၃၀)အရှည်ရှိ ပြုပြင်ထားသော လေသေနတ် (၁)လက်၊ အရှည် (၂၃)လက်မရှိသည့် စတီးပြောင်းတပ်ဆင်ထားသော ပြုလုပ်ဆဲ သေနတ်(၁)လက်၊ ကိုးလုံးကျည် (၃)တောင့်၊ (.38 )Special ကျည် (၄)တောင့် နှင့် (.45) Special ကျည် (၂)တောင့်စသည့် လက်နက်ခဲယမ်းများကိုလည်း တွေ့ရှိရကြောင်း သိရသည်။

ပူးပေါင်းအဖွဲ့မှ ဆက်လက်ရှာဖွေရာတွင် ကျောက်စိမ်းဟု ယူဆရသည့် (၁၂)ကီလိုခန့်ရှိ ကျောက်စိမ်း (၁)တုံး၊ (၁၀)ကီလိုခန့်ရှိ ကျောက်စိမ်း(၁)တုံး၊ (၅)ကီလိုခန့်ရှိ ကျောက်စိမ်း(၁)တုံး၊ (၄)ကီလိုခွဲခန့်ရှိ ကျောက်စိမ်း (၁)တုံး၊ (၄)ကီလိုခန့်ရှိ ကျောက်စိမ်း(၁)တုံး၊ (၃)ကီလိုခန့်ရှိ ကျောက်စိမ်း (၃)တုံး၊ (၂)ကီလိုခွဲခန့်ရှိ ကျောက်စိမ်း(၁)တုံး၊ (၁.၈)ကီလိုဝန်းကျင်ရှိ ကျောက်စိမ်း(၁)တုံး စုစုပေါင်း ကျောက်စိမ်းတုံး (၁၀)တုံးအား တွေ့ရှိရကြောင်းသိရသည်။

အဆိုပါ ဖြစ်စဉ်များနှင့် ပတ်သက်၍ မူးယစ်ဆေးဝါး၊ လက်နက်/ခဲယမ်းများနှင့်အတူ တွေ့ရှိရသည့် အသက်(၄၈)နှစ်အရွယ်ရှိ စိုင်းခမ်းကျောက်အား တာချီလိတ်မြို့မရဲစခန်းတွင် မယ(ပ)၁၇/၂၀၁၇၊ မူး/စိတ်ပုဒ်မ ၁၅/၁၉(က)/၁၆(ခ)/၂၂(ခ) တို့ဖြင့် အမှုဖွင့်အရေးယူဆောင်ရွက်ထားရှိကြောင်းနှင့် ကွင်းဆက်တရားခံများ ဖော်ထုတ်ရမိရေးအတွက် သက်ဆိုင်ရာရဲတပ်ဖွဲ့မှ စုံစမ်းနေလျက်ရှိကြောင်း သိရှိရသည်။