ရှမ်းပြည်နယ်(အရှေ့ပိုင်း)၊ တာချီလိတ်ခရိုင်အတွင်း မိုင်းယောင်းမြို့တွင် Covid-19 အတည်ပြုလူနာ (၁၀)ဦးအထိ တွေ့ရှိထားရသည့် အတွက် Covid-19 ရောဂါ ကာကွယ်၊ ထိန်းချုပ်ရေး အသိပေးမှုကို ဒေသတွင်းနေ ပြည်သူများ ကျယ်ကျယ်ပြန့်ပြန့် သိရှိနိုင်ရန် မြန်မာ - ရှမ်း နှစ်ဘာသာဖြင့် အသိပေးကြေညာပေးနေကြောင်း သိရသည်။

 

မြန်မာ - ရှမ်း နှစ်ဘာသာဖြင့် ဈေးတွင် ဈေးရောင်း ဈေးဝယ်သူများ အနေဖြင့် Mask နှင့် Face Shield တပ်ဆင်ရောင်းဝယ်ကြရန်၊ ရောဂါကူးစက် မခံရစေရန်အတွက် ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသော ဆောင်ရန်/ရှောင်ရန်များကို တိကျစွာ လိုက်နာရန်၊ ဤရောဂါသည် အန္တရာယ်ကြီးသဖြင့် Mask တပ်ခြင်းသည် အထူးထိရောက်စွာ ကာကွယ်နိုင်ပါကြောင်း၊ ပြည်သူများအနေဖြင့် Covid-19 ကာကွယ်ထိန်းချုပ်ရေးကို မိမိကိုယ်ရေးကိစ္စသဖွယ် သဘောထား၍ ပူးပေါင်းဆောင်ရွက်ပေးရန် စသည့် ကိုဗစ်-၁၉ ရောဂါ ကာကွယ်၊ ထိန်းချုပ်ရေးနှင့်ပတ်သက်၍ ပြည်သူများ သိရှိလိုက်နာဆောင်ရွက်နိုင်ရေး အချက်(၁၀)ချက်ကို  မြို့နယ်အထွေထွေအုပ်ချုပ်ရေးဦးစီးဌာန၊ ကျန်းမာရေးဌာန၊ စည်ပင်သာယာရေးဌာန၊ ပြန်/ဆက် နှင့် ကြက်ခြေနီသူနာပြုတပ်ဖွဲ့ စသည့် ပူးပေါင်းအဖွဲ့မှ ဒီဇင်ဘာလ(၁၈)ရက်နေ့က ထပ်မံ၍ အသံချဲ့စက်များဖြင့် လိုက်လံအသိပေးနေခြင်း ဖြစ်သည်။

 

မိုင်းယောင်းမြို့နယ်အတွင်း Covid-19 ကာကွယ်ရေးအတွက် အသိပေးမှုကို ယခင်ကလည်း မြန်မာ - ရှမ်း နှစ်ဘာသာဖြင့် အသိပေးခဲ့ပြီးဖြစ်ပြီး ယခုအခါမှာလည်း မြန်မာ - ရှမ်းဘာသာဖြင့် အသိပေးနေခြင်း ဖြစ်သည်။

 

မိုင်းယောင်းမြို့နယ်အတွင်းသို့ တာချီလိတ်က ပြန်လာသည့် အမျိုးသမီးများထဲက Covid-19 ကို ၂၀၂၀ခုနှစ် ဒီဇင်ဘာလ(၄)ရက်နေ့က စ၍  တွေ့ရှိခဲ့ခြင်းဖြစ်ပြီး ဒီဇင်ဘာ (၁၈) ရက်နေ့အထိ အတည်ပြုလူနာ (၁၀) ဦးရှိလာပြီ ဖြစ်သည်။