~~~~~~~~⊰❂ Unicode Version ❂⊱~~~~~~~~

Google အပါအဝင် အမေရိကန်ထိပ်တန်းလုပ်ငန်းကြီးများက ဟွာဝေးနှင့်ဆက်စပ်သည့် လုပ်ငန်းများ ရပ်ဆိုင်း
************
တရုတ်ထိပ်တန်းဆက်သွယ်ရေးလုပ်ငန်းကြီးတစ်ခုဖြစ်သည့်ဟွာဝေးနှင့် လုပ်ကိုင်နေသည့် လုပ်ငန်းများကို Google အပါအဝင် အမေရိကန်ထိပ်တန်းလုပ်ငန်းကြီးများက ရပ်ဆိုင်းလိုက်ကြပြီဖြစ်ရာ ဟွာဝေးစမတ်ဖုန်းအသုံးပြုသူများအနေဖြင့် Play Store ကဲ့သို့ Application များကို အသုံးပြု၍ရတော့မည်မဟုတ်ကြောင်း သိရသည်။

ဟွာဝေးကို အမေရိကန်ပြည်ထောင်စုက ပိတ်ပင်လိုက်ပြီးနောက် အဆိုပါလုပ်ငန်းနှင့် ဆက်စပ်နေသည့် လုပ်ငန်းများကို အမေရိကန်လုပ်ငန်းကြီးများက ရပ်ဆိုင်းလိုက်ကြရာ Google အပြင် မိုက်ခရိုချစ်(ပ်)ထုတ်လုပ်သည့် Intel Corp.၊ Qualcomm Inc.၊ Xilinx Inc နှင့် Broadcom Inc တို့လည်း ပါဝင်ကြောင်း သိရသည်။

အမေရိကန်သမ္မတ ဒေါ်နယ်ထရမ့်က ၂၀၁၉ ခုနှစ်၊ မေလ (၁၇)ရက်နေ့တွင် ဟွာဝေးဆက်သွယ်ရေးကုမ္ပဏီအား အမည်ပျက်စာရင်းသွင်းကြောင်း ကြေညာလိုက်ခြင်းဖြစ်သည်။
အဆိုပါကြေညာချက်ကြောင့် ဟွာဝေးဆက်သွယ်ရေးကုမ္ပဏီသာမက ဟွာဝေးနှင့်ဆက်စပ်လုပ်ကိုင်နေသည့် အမေရိကန်ကုမ္ပဏီများကိုလည်း ထိခိုက်မှုများ ရှိနေခြင်းဖြစ်သည်။

ယင်းသို့ရပ်ဆိုင်းလိုက်သည့်အတွက် နောက်ထပ်ထုတ်မည့် ဟွာဝေးဖုန်းများတွင် Play Store၊ Gmail စသည်တို့ကို သုံးစွဲ၍ရတော့မည်မဟုတ်ဘဲ လက်ရှိအသုံးပြုနေသည်များကိုလည်း Update ပြုလုပ်၍ရတော့မည်မဟုတ်ကြောင်းသိရပြီး Google က အသုံးပြုခွင့်ပေးခြင်းကို ပြန်လည်သုံးသပ်မည်ဖြစ်ကြောင်း ပြောကြားထားသည်။

Tachileik News Agency
Ref: Bloomberg