~~~~~~~~⊰❂ unicode ❂⊱~~~~~~~~

တာချီလိတ်မြို့လုံးကျွတ် စုပေါင်းမဟာဘုံကထိန်ပဒေသာပင်များကို နိုဝင်ဘာလ (၂၁)ရက်နေ့တွင် ဆုရွေးချယ်ချီးမြှင့်မည်
***********
ရှမ်းပြည်နယ်(အရှေ့ပိုင်း) တာချီလိတ်မြို့တွင် မြို့လုံးကျွတ်စုပေါင်းမဟာဘုံကထိန် ပဒေသာပင်များကို ၂၀၁၈ ခုနှစ် နိုဝင်ဘာလ (၂၁)ရက်နေ့တွင် ရှမ်းရိုးမကွင်းအတွင်း ညဘက်အလှပြထားရှိပြီး အလှဆုံးပဒေသာပင် (၃)ခုကို ရွေးချယ်ဆုချီးမြှင့်သွားမည်ဖြစ်ကြောင်း သိရသည်။

မြို့လုံးကျွတ်စုပေါင်းမဟာဘုံကထိန်ကျင်းပရေးအတွက် ၂၀၁၈ ခုနှစ်၊ နိုဝင်ဘာလ (၁၅)ရက်နေ့က ဌာနဆိုင်ရာများနှင့် လူမှုရေးအဖွဲ့များ အစည်းအဝေးကျင်းပပြီး လုပ်ငန်းဆောင်ရွက်ရန် ဆပ်ကော်မတီအသီးသီးကို ဖွဲ့စည်းထားကြောင်း သိရသည်။

“မြို့လုံးကျွတ် စုပေါင်းမဟာဘုံကထိန်ကျင်းပရေးအတွက် ခရိုင်အုပ်ချုပ်ရေးမှူးဦးဆောင်ပြီး ဌာနဆိုင်ရာတွေ၊ လူမှုရေးအဖွဲ့အစည်းတွေ အစည်းအဝေးလုပ်တယ်။ ခရိုင်အဆင့်ဌာနဆိုင်ရာတွေက ဦးဆောင်တဲ့ ဆပ်ကော်မတီအသီးသီး ဖွဲ့ထားတယ်။ ရန်ပုံငွေရှာဖွေရေး၊ မြို့တွင်းလှည့်လည်စသဖြင့် မဟာဘုံကထိန် အောင်အောင်မြင်မြင်ပြီးမြောက်အောင်လုပ်ဖို့ပေါ့။ လက်ရှိလိုအပ်နေတာကတော့ (၂၁)ရက်နေ့ည ပဒေသာပင်တွေ ထားတဲ့အချိန်နဲ့ နောက်နေ့မနက်အတွက် စတုဒီသာကျွေးမယ့်အလှူရှင်တွေတော့လိုတယ်။ မဇ္ဇျိမကတော့ ရေသန့်လှူမှာပါ”ဟု မဇ္ဇျိမလူမှုကူညီရေးအသင်းဥက္ကဌ ဦးတင့်ဆွေက တာချီလိတ်သတင်းအေဂျင်စီသို့ ပြောသည်။

ပဒေသာပင်များကို ရှမ်းရိုးမကွင်း နိုဝင်ဘာလ (၂၁)ရက်နေ့ ညနေ(၃)နာရီတွင် စတင်ပို့ဆောင်နိုင်ပြီဖြစ်ပြီး ည(၈)နာရီအချိန်တွင် အလှဆုံးပဒေသာပင်(၃)ခုအား ရွေးချယ်ဆုချီးမြှင့်မည်ဖြစ်ကြောင်း သိရသည်။

ညပိုင်းတွင်လည်း ပဒေသာပင်များကို မီးအလှဆင်ပြီး ပြသထားမည်ဖြစ်ကာ နိုဝင်ဘာလ (၂၂)ရက်နေ့ နံနက်  (၇)နာရီတွင် ရှမ်းရိုးမကွင်းမှ၊ ချစ်ကြည်ရေးတံတားအမှတ်(၁)ထိပ်ရှိ အဝိုင်းပတ်မှနေ၍ ချစ်ကြည်ရေးတံတားအမှတ်(၂)အထိ ပဒေသာပင်များလှည့်လည်ကြပြီးနောက် ကထိန်အလှူဆက်ကပ်လှူဒါန်းမည့်ကျောင်းသို့ ပို့ဆောင်ကြမည်ဖြစ်ကြောင်း သိရသည်။

လက်ရှိတွင် ကထိန်အလှူဆက်ကပ်လှူဒါန်းမည့်ကျောင်းကို ရွေးချယ်ရခြင်းမရှိသေးကြောင်း သိရသည်။
Tachileik News Agency