ထိုင်းနိုင်ငံမှ နေရပ်ပြန်လာလိုသည့် (၅၅)ဦးနှင့် ပြစ်ဒဏ်စေ့(၂၉)ဦးတို့ကို တာချီလိတ်ရှိ ချစ်ကြည်ရေးတံတား(၂)တွင် မေလ(၂၉)ရက်နေ့၌ လက်ခံပေးသွားမည်
ထိုင်း - မြန်မာ နယ်စပ်ဒေသ မယ်ဆိုင် - တာချီလိတ်နယ်စပ်ဂိတ်မှ ပြန်လာရန် စာရင်းပေးထားသူများထဲက မြန်မာလုပ်သား (၅၅)ဦးကို ၂၀၂၀ခုနှစ် မေလ(၂၉)ရက်နေ့တွင် တာချီလိတ်ရှိ မြန်မာ - ထိုင်း ချစ်ကြည်ရေး အမှတ်(၂)တံတားမှတဆင့် လက်ခံပေးသွားမည်ဖြစ်ပြီး တစ်ဆက်တည်းမှာပင် ထိုင်းနိုင်ငံအတွင်း ဖမ်းဆီးခံရပြီး ပြစ်ဒဏ်စေ့သည့် မြန်မာနိုင်ငံသား (၂၉)ဦးပါကို မြန်မာဘက်က နှစ်သုတ်ခွဲ၍ လက်ခံပေးသွားမည်ဖြစ်ကြောင်း သိရသည်။
ဒီကနေ ပြန်လိုတဲ့ (၅၅)ဦးရယ်၊ နောက် ပြစ်ဒဏ်ကျက (၂၉)ယောက်ရှိသေးတယ်၊ အဲ့ဒီတစ်ရက်တည်း နှစ်သုတ်ခွဲပြီး လက်ခံပေးသွားမယ်
ဟု တာချီလိတ်ခရိုင်စီမံခန့်ခွဲမှုကော်မတီ ဥက္ကဌ ၊ တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က ပြောသည်။
နေရပ်ပြန်လိုသည့် (၅၅)ဦးတွင် ကလေးငယ်များ အပါအဝင် အမျိုးသား (၂၅)ဦးနှင့် အမျိုးသမီး (၃၀)ဦးတို့ ပါဝင်ပြီး ပြစ်ဒဏ်စေ့ မြန်မာနိုင်ငံသား (၂၉)ဦးတွင် ပြီးခဲ့သည့် သင်္ကြန်ကာလအတွင်းက မယ်ဆိုင်မြို့တွင် အုပ်စုဖွဲ့ကာ အရက်သောက်၍ ဖမ်းခံရသူများ နှင့် လဝက ဥပဒေဖြင့် ဖမ်းခံရသူများ ပါဝင်ကြောင်း သိရသည်။
Tachileik News Agency
