တပ်မတော်ညှိနှိုင်းရေးအဖွဲ့နှင့် ကရင်အမျိုးသားအစည်းအရုံး (KNU) တို့ ၂၀၁၉ ခုနှစ်၊ ဒီဇင်ဘာလ (၁၀) ရက်နေ့တွင် နေပြည်တော်တိုင်းစစ်ဌာနချုပ်ရိပ်သာ၌ တပ်ပိုင်းဆိုင်ရာ ညှိနှိုင်းဆွေးနွေးကြမည်ဖြစ်ကြောင်း သိရသည်။
အဆိုပါ အစည်းအဝေးတွင် NCA ပါ အပစ်အခတ်ရပ်စဲရေးအကောင်အထည်ဖေါ်မှုဆိုင်ရာ ညှိနှိုင်းဆွေးနွေးရေးလုပ်ငန်းစဉ် ရေးဆွဲသဘောတူညီချက်ရယူနိုင်ရေး ကြိုးစားမည့်အပြင် အောက်ခြေတွင် ဖြစ်ပွားနေသည့် တင်းမာမှုများကို ဖြေရှင်းနိုင်ရန်လည်း မျှော်လင့်သည်ဟု KNU ၏ ထုတ်ပြန်ချက်တွင် ဖေါ်ပြထားသည်။
KNU အနေဖြင့် ၂၀၁၂ ခုနှစ်၊ ပဏာမအပစ်အခတ်ရပ်စဲရေးကာလမှ NCA လက်မှတ်ထိုးပြီးသည်အထိ ကာလအတွင်း နားလည်မှု လွဲမှားပြီးဖြစ်ပွားသည့် သာမန်ထိတွေ့မှု အနည်းငယ်မှလွဲ၍ အပစ်အခတ်ရပ်စဲရေး ထိန်းသိမ်းနိုင်ခဲ့သော်လည်း လက်ရှိတွင် အချို့ဒေသများ၌ တပ်မတော်က အင်အားတိုးချဲ့ခြင်း၊ KNU တပ်မဟာ (၃)နှင့် (၅) ဒေသများအတွင်း ကားလမ်းတိုးချဲ့ဖောက်လုပ်နေခြင်းများမှာ NCA ပါအချက်များနှင့် ကွဲလွဲနေသည်ဟု KNU က ထုတ်ပြန်ထားသည်ကို တွေ့ရသည်။
တပ်ပိုင်းဆိုင်ရာညှိနှိုင်းဆွေးနွေးကြည့် KNU ကိုယ်စားလှယ်အဖွဲ့သည် ဒီဇင်ဘာလ (၉)ရက်နေ့တွင် ဗဟိုဌာနချုပ်မှနေ၍ နေပြည်တော်သို့ သွားရောက်နေပြီဖြစ်ပြီး ဒုတိယဗိုလ်ချုပ်ကြီး ရာပြည့်ခေါင်းဆောင်သည့် တပ်မတော်ညှိနှိုင်းရေးအဖွဲ့နှင့် တွေ့ဆုံဆွေးနွေးမည်ဖြစ်သည်။
Tachileik News Agency
