ရှမ်းပြည်နယ် (အရှေ့ပိုင်း) တာချီလိတ်မြို့ NIEC ကျောင်းမှ ကျောင်းသူ မယဉ်မေကို ကာတာနိုင်ငံ ဒိုဟာမြို့တွင် ပြုလုပ်မည့် နိုင်ငံတကာအဆင့်ပညာရေးဆိုင်ရာပြိုင်ပွဲ၌ နိုင်ငံကိုယ်စားပြု ယှဉ်ပြိုင်ရန် ရွေးချယ်ခံရကြောင်း သိရသည်။

"ကျွန်မတို့ တာချီလိတ် NIEC ကျောင်းက ယဉ်မေလေးက အောက်တိုဘာ (၃၀) ရက်နေ့က နိုင်ငံလက်ရွေးစင်အဆင့် နောက်ဆုံးပြိုင်ပွဲယှဉ်ပြိုင်ခဲ့ပြီးတော့ နိုဝင်ဘာ (၁) ရက်နေ့က အရွေးခံခဲ့ရတယ်။ ကလေးအတွက် လေ့ကျင့်ချိန်က တစ်လပဲရခဲ့တာပေါ့။ သူရဲ့ကြိုးစားမှု၊ စိတ်အားထက်သန်မှုနဲ့ စိတ်ဝင်စားမှုတွေကြောင့် အခုလိုအရွေးခံခဲ့ရတာပေါ့။ ဒါကကျောင်းသူ၊ ကျောင်းသားတိုင်း အတုယူရမယ့် အချက်တွေပေါ့။ နောက်နှစ်တွေလည်း ကျွန်မတို့ ဆက်လက်ယှဉ်ပြိုင်သွားဦးမှာပါ။ ဒီဇင်ဘာ (၃) ရက်နေ့ကနေ (၁၂) ရက်နေ့အထိ ကာတာနိုင်ငံ ဒိုဟာမြို့မှာ သွားရောက်ယှဉ်ပြိုင်ရမှာပါ"ဟု တာချီလိတ်မြို့ NIEC ကျောင်းမှ စီမံခန့်ခွဲမှုဒါရိုက်တာ ဒေါ်မီဒေးက တာချီလိတ်သတင်းအေဂျင်စီသို့ ပြောသည်။
နိုင်ငံတကာအဆင့်ပညာရေးဆိုင်ရာ အဓိကပြိုင်ပွဲဖြစ်သည့် International Junior Science Olympiad (IJSO) ပြိုင်ပွဲတွင် နိုင်ငံပေါင်း (၅၀) မှ ကျောင်းသား၊ ကျောင်းသူများဝင်ရောက်ယှဉ်ပြိုင်ကြပြီး မြန်မာနိုင်ငံ ကိုယ်စားပြုအနေဖြင့် ကျောင်းသား၊ ကျောင်းသူ (၆) ဦးအနက်မှ တာချီလိတ်မြို့ NIEC ကျောင်းမှ ကျောင်းသူ မယဉ်မေကို နိုင်ငံကိုယ်စားပြု ယှဉ်ပြိုင်ရန် ရွေးချယ်ခံခဲ့ရခြင်းဖြစ်ကြောင်း သိရသည်။
International Junior Science Olympiad (IJSO) သည် သိပ္ပံပညာရပ်ဆိုင်ရာ တစ်ဦးချင်းနှင့် အဖွဲ့လိုက် ပြိုင်ပွဲများကို ၂၀၀၄ ခုနှစ်မှစပြီး နိုင်ငံများအလိုက် ကျင်းပခဲ့ရာ ၂၀၁၉ ခုနှစ်တွင် ကျင်းပမည့် (၁၆)ကြိမ်မြောက်ပြိုင်ပွဲကို အာရပ်စော်ဘွားများနိုင်ငံ ကာတာမြို့တွင် ကျင်းပမည်ဖြစ်သည်။

အဆိုပါပြိုင်ပွဲတွင် ဝင်ရောက်ယှဉ်ပြိုင်ကြသည့် နိုင်ငံပေါင်း (၈၃)နိုင်ငံရှိခဲ့ပြီး မြန်မာနိုင်ငံက ၂၀၀၇ ခုနှစ်တွင် ကျင်းပသည့် (၄)ကြိမ်မြောက်ပြိုင်ပွဲမှစ၍ နှစ်စဉ် ဝင်ရောက်ယှဉ်ပြိုင်ခဲ့ကြခြင်းဖြစ်သည်။

Tachileik News Agency
သတင်း #ဟန်စိုးထိုက်
ဓါတ်ပုံ - ကျော်ဇင်ဟိန်း