ရှမ်းပြည်နယ်(အရှေ့ပိုင်း) တာချီလိတ်မြို့တွင် ဌာနဆိုင်ရာများနှင့် လူထုပူးပေါင်းပြီး အပတ်စဉ် စုပေါင်းအမှိုက်ကောက်အစီအစဉ်အဖြစ် ၂၀၁၉ ခုနှစ်၊ အောက်တိုဘာလ (၁၉)ရက်နေ့ နံနက်ပိုင်းက ရန်အောင်မြေရပ်ကွက်တွင် စုပေါင်းအမှိုက်ကောက်ကြသည်။

စုပေါင်းအမှိုက်ကောက်သည့်အဖွဲ့က ရန်အောင်မြေရပ်ကွက်ရှိ အာခါဗုဒ္ဓကျောင်းမှစတင်ပြီး အနီးဝန်းကျင် အများပြည်သူ သွားလာရာနေရာများတွင် စည်းကမ်းမဲ့ စွန့်ပစ်ထားသည့်အမှိုက်များကို ရှင်းလင်းကြခြင်း ဖြစ်ပြီး အောက်တိုဘာလ (၂၆)ရက်နေ့တွင် ဆန်ဆိုင်း(က) မြို့ပတ်လမ်း၌ နံနက် (၇)နာရီမှစတင်၍ အမှိုက်ကောက်မည်ဖြစ်၍ ပူးပေါင်းပါဝင်နိုင်ကြမည်ဖြစ်သည်။

“လူထုပါဝင်လာမှုက လျော့လည်းမသွားဘူး။ တိုးလည်းမလာဘူး။ ပုံမှန်အတိုင်းတော့ ရှိနေပါတယ်”ဟု တာချီလိတ်မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။

တာချီလိတ်တွင် အပတ်စဉ် စနေနေ့တိုင်း စုပေါင်းအမှိုက်ကောက်အစီအစဉ်၏ တတိယ(၃)လပတ်ကာလတွင် ယခင်ကထက် စည်းကမ်းမဲ့အမှိုက်စွန့်ပစ်သူ နည်းလာသည်ဟု သိရသည်။

“အမှိုက်စကောက်တုန်းကထက်စာရင် စည်းကမ်းမဲ့ပစ်တာတော့ နည်းလာတယ်။ အိမ်ရှေ့တွေမှာ ခြင်းလေးတွေ ချထားတာ အဲဒီမှာ အမှိုက်ပစ်တာမျိုးတွေတော့ တွေ့လာရတယ်”ဟု စုပေါင်းအမှိုက်ကောက်အစီအစဉ်တွင် ပါဝင်ဆောင်ရွက်နေသည့် မဇ္ဇျိမလူမှုကူညီရေးအသင်း၏ ဥက္ကဌ ဦးတင့်ဆွေက ဆိုသည်။

မြို့သာယာလှပရေးအတွက် စုပေါင်းအမှိုက်ကောက်အစီအစဉ်များကို ဆက်လက် လုပ်ဆောင်သွားမည်ဖြစ်ပြီး အောက်တိုဘာလ(၂၆)ရက်နေ့တွင် ဆန်ဆိုင်း(က) မြို့ပတ်လမ်း၊ နိုဝင်ဘာလ (၂)ရက်နေ့တွင် ဆန်ဆိုင်း(ခ) မြတ်လေးလမ်း၊ နိုဝင်ဘာလ (၉)ရက်နေ့တွင် ပုံလို့ဘုန်းကြီးကျောင်း၊ နိုဝင်ဘာလ (၁၆)ရက်နေ့တွင် ဝမ်ကောင်းရပ်ကွက် ဓမ္မာရုံ၊ နိုဝင်ဘာလ (၂၃)ရက်နေ့တွင် မဟာမုနိဘုန်းကြီးကျောင်းနှင့် နိုဝင်ဘာလ (၃၀)ရက်နေ့တွင် မယ်ခေါင်ရပ်ကွက်ရုံး၌  လုပ်ဆောင်ကြမည်ဖြစ်ကြောင်း သိရသည်။

မြို့သန့်ရှင်းရေးစုပေါင်းသန့်ရှင်းရေး အမှိုက်ကောက်အစီအစဉ်နှင့်အတူ ကျန်းမာရေးဌာနမှ ဝန်ထမ်းများကလည်း လိုက်ပါပြီး သွေးလွန်တုပ်ကွေးကာကွယ်ရေး ဖုံးသွန်လဲစစ် လုပ်ငန်းများနှင့် အဘိတ်ဆေးခပ်ပေးခြင်းများကို ဆောင်ရွက်ပေးနေခြင်းဖြစ်သည်။

Tachileik News Agency
ဓါတ်ပုံ - ဟန်စိုးထိုက်၊ ကျော်ဇင်ဟိန်း