"လက်ရှိ ထုတ်ပြန်ထားတဲ့ စည်းကမ်းချက်တွေကို ဖိတ်စာနဲ့ပူးတွဲပြီး ပို့ပေးလိုက်မယ်။ နောက်တစ်ခေါက် အစည်းအဝေး မဖြစ်မနေ တက်ရောက်ပြီးတော့ ကော်မတီရွေးချယ်ဖို့ ဖြစ်ပါတယ်။ လစဉ် လစဉ်တိုင်းမှာ (၁၀) ရက်နေ့ (၁၀) နာရီမှာ အစည်းအဝေးပြုလုပ်ပါတယ်။ အမှန်ဆိုရင် ဖိတ်စာတောင် ဖိတ်စရာမလိုပါဘူး။ အားလုံးတက်ရမှာပါ"ဟု တာချီလိတ်မြို့နယ် ရေသန့်လုပ်ငန်းရှင်များအသင်း ဒုတိယ ဥက္ကဌ ဦးတင့်ဆွေက တာချီလိတ်သတင်းအေဂျင်စီသို့ ပြောသည်။

တာချီလိတ်မြို့အတွင်း ရေသန့်လုပ်ငန်း (၄၂) ခုရှိသည့်အနက် ရေသန့်လုပ်ငန်း (၁၉)ခုမှ လုပ်ငန်းရှင်များကသာ အစည်းအဝေး တက်ရောက်ခဲ့ကြခြင်းဖြစ်ပြီး အသင်းဝင်မစုံသည့်အတွက် အလုပ်အမှုဆောင်သစ် ရွေးချယ်ရေးကို ရွှေ့ဆိုင်းခြင်း ပြု၊မပြုကို မဲခွဲဆုံးဖြတ်ခဲ့ရာ ရွှေ့ဆိုင်းရန် (၁၃) မဲ၊ မရွှေ့ဆိုင်းရန် (၆) မဲ ရရှိခဲ့ခြင်းဖြစ်သည်။

တာချီလိတ်မြို့နယ် ရေသန့်လုပ်ငန်းရှင်များအသင်းအစည်းအဝေးကို စက်တင်ဘာလ (၁၀)ရက်နေ့က ကျင်းပစဉ်က အောက်တိုဘာလ အစည်းအဝေးတွင် အလုပ်အမှုဆောင်အဖွဲ့သစ် ပြန်လည်ရွေးချယ်ရန် ဆုံးဖြတ်ခဲ့ကြခြင်းဖြစ်သည်။

တာချီလိတ်မှ ရေသန့်လုပ်ငန်းရှင်များက ၂၀၁၇ ခုနှစ်၊ စက်တင်ဘာလ (၁၅) ရက်နေ့တွင်  တာချီလိတ်မြို့နယ် ရေသန့်လုပ်ငန်းရှင်များအသင်းကို အသစ်ပြန်လည်ဖွဲ့စည်းလိုက်ပြီးနောက် ဥက္ကဌအဖြစ် ဦးကြည်မြင့်၊ ဒုဥက္ကဌ(၁)အဖြစ် ဒေါ်မားမား၊ ဒုဥက္ကဌ(၂)အဖြစ် ဦးတင့်ဆွေ၊ အတွင်းရေးမှူးအဖြစ် ဦးမြင့်ဇော်၊ ဘဏ္ဍာရေးမှူးအဖြစ် ဦးအားလို၊ စာရင်းစစ်အဖြစ် ဦးစိုင်းခမ်ရှမ်၊ ပြန်ကြားရေးအဖြစ် ဒေါ်မားမားနှင့်အဖွဲ့၊ အမှုဆောင်များအဖြစ် ဦးဝင်းမြင့်၊ ဦးဇာနည်၊ ဒေါ်နန်းအောင်နှင့် ဦးညွန့်ဆွေတို့က တာဝန်ယူခဲ့ကြခြင်းဖြစ်သည်။

သတင်း၊ဓါတ်ပုံ #ဟန်စိုးထိုက်