ဒုတိယအကြိမ် ကယားပြည်နယ် လွှတ်တော် (၁၅)ကြိမ်မြောက်ပုံမှန်အစည်းအဝေး ပထမနေ့ဖြစ်သည့် ၂၀၁၉ ခုနှစ်၊ အောက်တိုဘာလ (၁) ရက်နေ့က ပြည်နယ်လူဝင်မှုကြီးကြပ်ရေးနှင့် လူ့စွမ်းအား အရင်းအမြစ်ဝန်ကြီးဌာန ဝန်ကြီးအဖြစ် ဦးတင်ဌေးအားခန့်အပ်ရန်  ပြည်နယ်ဝန်ကြီးချုပ်က လွှတ်တော်သို့ အဆိုပြုပေးပို့ခဲ့ခြင်းဖြစ်ပြီး အောက်တိုဘာလ (၂) ရက်နေ့ အစည်းအဝေးတွင် လွှတ်တော်ကိုယ်စားလှယ်များက ကန့်ကွက်လိုက်ကြခြင်း ဖြစ်သည်။

ပြည်နယ်ဝန်ကြီးချုပ်မှ အဆိုပြုပေးပို့ထားသော ဦးတင်ဌေးမှာ ပြည်နယ်ဥပဒေဆိုင်ရာ အထောက်အကူပေးရေး အဖွဲ့တွင် ဥက္ကဌအဖြစ် တာဝန်ယူထားသူဖြစ်ပြီး ၎င်းမှာ ဖွဲ့စည်းပုံအခြေခံဥပဒေ၊ တိုင်းဒေသကြီးနှင့်ပြည်နယ် အစိုးရအဖွဲ့ဥပဒေ၊ ရွေးကောက်ပွဲဥပဒေ ပါပြဌာန်းချက်များနှင့် ညီညွှတ်မှုမရှိကြောင်း ပြည်နယ်လွှတ်တော် ကိုယ်စားလှယ်များ ဖြစ်သည့် ဦးရန်နိုင်ဆွေ ၊ဦးအောင်နိုင်ဦး ၊ဦးခင်မောင်ထွန်း နှင့် ဦးသိန်းအောင်တို့က လွှတ်တော်အစည်းအဝေး ဒုတိယနေ့တွင် ကန့်ကွက်ဆွေးနွေးခဲ့ကြသည်။

“ကယားပြည်နယ်လွှတ်တော်ကိုယ်စားလှယ်များကိုသာ ပထမဦးစားပေး ထည့်သွင်းသင့်ကြောင်း တင်ပြလိုပါတယ်။ ပြည်နယ်လွှတ်တော်ကိုယ်စားလှယ်များ မဆောင်ရွက်နိုင်မှသာ ပြင်ပပုဂ္ဂိုလ်ကို ထည့်သွင်းစဉ်းစားရပါမယ်။ ယခုအမည်စာရင်း တင်သွင်းထားသော ဦးတင်ဌေးသည် ကယားဌာနေ တိုင်းရင်းသားမဟုတ်ပါဘူး ။ဝန်ကြီးတစ်ပါး ခန့်ထားဆောင်ရွက်မည်ဆိုပါက လွှတ်တော်ကိုယ်စားလှယ်များနှင့် အရင်ဆုံးဆွေးနွေးတိုင်ပင်သင့်ပါတယ် ”ဟု ဒီးမော့ဆိုမြို့နယ် မဲဆန္ဒနယ်မှ ပြည်နယ်လွှတ်တော်ကိုယ်စားလှယ် ဦးသိန်းအောင်က ကန့်ကွက်ဆွေးနွေးခဲ့သည်။

ဝန်ကြီးချုပ်မှ အမည်စာရင်းတင်သွင်းထားသူ ဦးတင်ဌေးမှာ လက်ရှိတွင် ချိကယ်ဝန်ကြီးအိမ်ယာ၌ လွန်ခဲ့သော ခြောက်လခန့်မှစ၍ နေထိုင်ခဲ့ပြီး ၎င်းလက်ရှိရာထူးနေရာဖြင့် အဆိုပါနေရာများတွင်နေထိုင်ခံစားခွင့် ရရှိသူတစ်ဦးမဟုတ်ကြောင်း သိရသည်။

ယင်းကဲ့သို့ နေထိုင်ခြင်းမှာ ဝန်ကြီးအဖြစ်အတည်မပြုမီတွင်လည်း ကြိုတင်နေထိုင်ခံစားခွင့် မရှိဘဲ နေထိုင်ခြင်းဖြစ်၍ ဥပဒေပာ အချက်များနှင့် ညှိစွန်းလျှက်ရှိပြီး ဆိုပါဝန်ကြီးနေရာအတွက် ရွေးကောက်ခံ ပြည်နယ်လွှတ်တော်ကိုယ် စာလှယ်များ ကိုသာရွေးချယ်သင့်ကြောင်း ပြည်နယ်လွှတ်တော်ကိုယ်စားလှယ်လေးဦးမှ ကန့်ကွက်ဆွေးနွေး ခဲ့ကြသည်။

“တိုင်းရင်းသားဒေသနေပြည်သူများက ရွေးချယ်တင်မြှောက်လို့သာ မိမိတို့ယခုလိုပြည်နယ်ရဲ့ ဦးဆောင်မှု အခန်းကဏ္ဍကိုရောက်ရှိလာတယ်ဆိုတာ ဦးစွာပထမထည့်သွင်းစဉ်းစားဖို့ လိုပါမယ်။ဌာနေတိုင်ရင်းသား မဲဆန္ဒရှင်  ပြည်သူတွေရဲ့ သဘောထားကို အလေးနက်ထားစေချင်ပါတယ်။ ဒေသနေပြည်သူသာလျှင် သင့်တော်မည် ဖြစ်ပါ၍ အလေးနက်ထား ဆောင်ရွက်စေလိုပါတယ် ”ဟု ဖားဆောင်းမြို့နယ် ပြည်နယ်လွှတ်တော်ကိုယ်စားလှယ် ဦးရန်နိုင်ဆွေက ဆွေးနွေးခဲ့သည်။

အောက်တိုဘာလ (၂) ရက်နေ့တွင်ကျင်းပသော ဒုတိယအကြိမ် ကယားပြည်နယ်လွှတ်တော် (၁၅) ကြိမ်မြောက် ပုံမှန်အစည်းအဝေး ဒုတိယနေ့တွင် ကယားပြည်နယ်ဝန်ကြီးချုပ်မှ ပြည်နယ်လူဝင်မှုကြီးကြပ်ရေးနှင့် လူ့စွမ်းအားအရင်းအမြစ်ဝန်ကြီးဌာန ဝန်ကြီးအဖြစ်အဆိုပြုထားသူအား ကန့်ကွက်သူများရှိသောကြောင့် လျှို့ဝှက်ဆန္ဒမဲပေး၍ အဆုံးအဖြတ်ရယူခဲ့သည်။

ဝန်ကြီးချုပ်မှ အဆိုပြုထားသူ အမည်စာရင်းအား  ပြည်နယ်လွှတ်တော်တွင်း ဆန္ဒမဲပေးခွင့်ရှိသော  လွှတ်တော်ကိုယ်စားလှယ် (၁၉)ဦးမှ လျှို့ဝှက်ဆန္ဒမဲပေးခဲ့ကြပြီး ကန့်ကွက်မဲ (၁၆)မဲ ၊ ထောက်ခံမဲ (၃) မဲ ဖြစ်သောကြောင့် ကယားပြည်နယ်ဝန်ကြီးချုပ်မှ ပြည်နယ်လူဝင်မှုကြီးကြပ်ရေးနှင့် လူ့စွမ်းအားအရင်း အမြစ်ဝန်ကြီးဌာန ဝန်ကြီးအဖြစ်အဆိုပြုထားသူ ဦးတင်ဌေးအား သဘောမတူကြောင်း ကယားပြည်နယ် လွှတ်တော်ဥက္ကဌမှ အတည်ပြုကြေညာခဲ့ခြင်းဖြစ်သည်။

သတင်း #ဆန်းဖြိုးထွန်း
ဓါတ်ပုံ - IPRD