မန္တလေးတိုင်းဒေသကြီး၊ ပြင်ဦးလွင်မြို့နယ်၊ ရေငယ်ကျေးရွာအနီး မန္တလေး - မူဆယ်ကားလမ်းတွင် ၂၀၁၉ ခုနှစ်၊ အောက်တိုဘာလ (၂၉)ရက်နေ့ နံနက် (၁)နာရီကျော်က Mobile X Ray စက်ဖြင့်စစ်ဆေးရာမှ ဖမ်းဆီးရမိထားသည့် ဒီတိုနေတာများနှင့် သယ်ဆောင်လာသည့်ယာဉ်ပိုင်ရှင်ဖြစ်သူမှာ လားရှိုးမြို့မှ ထွက်ပြေးတိမ်းရှောင်နေကြောင်း သိရသည်။

ပြင်ဦးလွင်မြို့နယ်၊ ရေငယ်ကျေးရွာအနီး မန္တလေး-မူဆယ်ကားလမ်းတွင် Mobile X-Ray စက်ဖြင့် စစ်ဆေးစဉ်အတွင်း နောင်ချိုမှ မန္တလေးသို့ မောင်းနှင်လာသည့် (၆)ဘီးယာဉ်တွင် ဒီတိုနေတာ (၁၄,၅၀၀)ကို ရဲတပ်ဖွဲ့က ဖမ်းဆီးရမိခဲ့ခြင်းဖြစ်သည်။

ဒီတိုနေတာများ တင်ဆောင်လာသည့် မော်တော်ယာဉ်အား မောင်းနှင်လာသည့် အသက်(၂၈)နှစ်အရွယ် ဖြိုးကိုကိုမောင်(ခ) မောင်ဖြိုးနှင့် အသက်(၂၁)နှစ်အရွယ် ဖြိုးကိုကိုငယ်(ခ)ပြူးလေးတို့ ညီအစ်ကို ဖမ်းဆီးလိုက်ပြီးနောက် အဆိုပါ ဒီတိုနေတာများအား သယ်ဆောင်ရန် ခိုင်းစေခဲ့သည့် မန္တလေးမြို့မှ အသက် (၄၂)နှစ်အရွယ် လေးမင်းကို ထပ်မံဖမ်းဆီးရမိခဲ့ခြင်းဖြစ်သည်။

ဒီတိုနေတာများကို လားရှိုးမြို့ရှောင်လမ်း၊ ဘုရားကြီးကုန်းဆင်းအနီး၌ အမျိုးသား ၃ ဦးက 4 Wheel ယာဉ်ဖြင့် လာရောက်တင်ဆောင်ပေးခဲ့ပြီး သယ်ဆောင်ခငွေကျပ် (၈၀,၀၀၀)ဖြင့် ဖြိုးကိုကိုမောင်တို့ ညီအစ်ကိုနှစ်ဦးက သယ်ဆောင်ပေးလာခဲ့ခြင်းဖြစ်သည်ဟု သိရသည်။

ဖြိုးကိုကိုမောင်(ခ)မောင်ဖြိုး၊ ဖြိုးကိုကိုငယ်(ခ) ပြူးလေးနှင့် လေးမင်းတို့ ၃ ဦးနှင့် ဖမ်းဆီးရမိခြင်းမရှိသေးသည့် ဒီတိုနေတာများ ပို့ဆောင်ပေးသော အမျိုးသား(၃)ဦးတို့ကို ပိတ်ချင်းမြောင် နယ်မြေရဲစခန်းတွင် (ပ)၂၃၈/၂၀၁၉၊ ပေါက်ကွဲစေတတ်သောဝတ္ထုပစ္စည်းများ ဥပဒေပုဒ်မ ၅/၆ ဖြင့် အမှုဖွင့် စစ်ဆေးနေခြင်းဖြစ်ကြောင်း သိရသည်။

ဖမ်းဆီးရမိထားသည့် ဒီတိုနေတာများနှင့် ဒီတိုနေတာများ တင်ဆောင်လာသည့် မော်တော်ယာဉ်၏ ပိုင်ရှင်ဖြစ်သည့် လားရှိုးမြို့မှ အားစိန်မှာ ထွက်ပြေးလွတ်မြောက်နေကြောင်း သိရသည်။

Tachileik News Agency
ဓါတ်ပုံ - MOHA