ရှမ်းပြည်နယ် (အရှေ့ပိုင်း)၊ တာချီလိတ်ခရိုင်၊ တာလေမြို့၊ နားယောင်းအုပ်စု၊ ရန်အောင်ရွာ၌ တောင်သူများကို စိုက်ပျိုးရေး အလေ့အထကောင်းများနှင့် ဈေးကွက်ခိုင်မာသည့်သီးနှံများ ရွေးချယ်စိုက်ပျိုးတတ်စေရေးအတွက် စိုက်ပျိုးရေးဦးစီးဌာနက ၂၀၁၉ ခုနှစ်၊ အောက်တိုဘာလ (၂၇)ရက်နေ့က သင်တန်းပို့ချရာ တောင်သူ (၁၀၈)ဦး တက်ရောက်ကြသည်။

ခေတ်နှင့်လျော်ညီသော စိုက်ပျိုးရေးဆိုင်ရာ အသိပညာဗဟုသုတများ တိုးပွားလာစေခြင်းဖြင့် ဆင်းရဲနွမ်းပါးမှု လျော့ကျလာစေရန် ရည်ရွယ်၍ သင်တန်းပေးခြင်းဖြစ်သည်ဟု သိရပြီး အဆိုပါသင်တန်းတွင် စိုက်ပျိုးရေးဆိုင်ရာ အလေ့အကျင့်ကောင်းများ GAP အသိအမှတ်ပြု လက်မှတ်ရရှိရေးနှင့် ဈေးကွက်ခိုင်မာသည့် သီးနှံများစိုက်ပျိုးစေရေး၊ မျိုးကောင်းမျိုးသန့်သုံးစွဲရေး၊ ပိုးသတ်ဆေး စနစ်တကျသုံးစွဲရေး၊ မြေသြဇာ အကျိုးရှိစွာ သုံးစွဲရေးတို့ကို တောင်သူများအား ရှင်းလင်းဆွေးနွေးကြသည်။

သင်တန်းတွင် ရှမ်းပြည်နယ် စိုက်ပျိုးရေးဦးစီးဌာန၊ ပြည်နယ်ဦးစီးမှူး ဦးတင်ဦးကြိုင်၊ ဒု-ပြည်နယ်ဦးစီးမှူး ဦးတင်ဦး၊ ခရိုင်ဦးစီးမှူး ဦးလှဝင်းနှင့် ခရိုင်မြေအသုံးချရေးဌာနခွဲ ဒေါ်မြဥမ္မာတို့က တောင်သူများအား ရှင်းလင်းဆွေးနွေးကြပြီးနောက် ရှမ်းပြည်နယ်စိုက်ပျိုးရေးဦးစီးဌာန စွန့်ဦးလူငယ်ပညာရှင်များ(Young Scienticts Initiative: YSI) အဖွဲ့က စိုက်ပျိုးရေးဆိုင်ရာ (Mobile Applications) အသုံးပြုပုံနည်းစနစ်များကို တောင်သူများအား လက်တွေ့ရှင်းလင်းပြသခဲ့ကြသည်။

သင်တန်းတက်ရောက်လာသည့် တောင်သူများကို တောင်သူပညာပေးလက်ကမ်းစာစောင်များ၊ ရွက်ဖျန်းအားဆေးများ၊ ပိုးသတ်ဆေးနှင့် ကြွက်သတ်ဆေးများကို တက်ရောက်လာသော တောင်သူပေါင်း (၁၀၈) ဦးအား အခမဲ့ဖြန့်ဝေပေးခဲ့သည်။

Tachileik News Agency