အဆိုတော် ဖြိုးပြည့်စုံ၊ တေးရေး ငြိမ်းချမ်းကိုနှင့် ရော်နီစန်းလွင်တို့ (၃)ဦးမှာ ၂၀၁၉ ခုနှစ်၊ အောက်တိုဘာလ (၇) ရက်နေ့ ညနေ (၅)နာရီခွဲအချိန်တွင် ဗဟန်းမြို့နယ်၊ မြန်မာပလာဇာရှိ ကော်ဖီဆိုင်၌ ထိုင်နေစဉ် မူးယစ်တပ်ဖွဲ့က သတင်းအရ စောင့်ဆိုင်းဖမ်းဆီးခံခဲ့ရခြင်း ဖြစ်သည်။

ဖမ်းဆီးမှုအတွင်း အဆိုတော် ဖြိုးပြည့်စုံ၏ မော်တော်ယာဉ်ပေါ်ရှိ ကျောပိုးအိတ်အတွင်းမှ Play စာတမ်းပါ ပလပ်စတစ်ဗူးဖြင့် ထည့်ထားသည့် ကတ်တမင်းဆေးပြားများနှင့် ပုံစံတူ (၁၀) ပြားကို စစ်ဆေးတွေ့ရသဖြင့် အဆိုတော်နှင့် သူငယ်ချင်းနှစ်ဦးအား မူးယစ်တပ်ဖွဲ့က ဗဟန်းမြို့မရဲစခန်းတွင် ပထမသတင်းပေး တိုင်တန်းချက် ဖွင့်လှစ်ကာ ထိန်းသိမ်းခဲ့ခြင်းဖြစ်သည်။

ယင်းနောက် ထိန်းသိမ်းထားသူများအား လိုအပ်သည့်စစ်ဆေးမှုများ ပြုလုပ်ပြီး ဆေးပြားများကိုလည်း ဓါတ်ခွဲစစ်ဆေးခဲ့ခြင်းဖြစ်ရာ ဓါတ်ခွဲအဖြေအရ မူးယစ်ဆေးမဟုတ်သဖြင့် ပြန်လည်လွတ်မြောက်လာခြင်း ဖြစ်သည်။

အဆိုပါ ဖမ်းဆီးမှုနှင့်ပတ်သက်ပြီး အဆိုတော်နှင့် သူငယ်ချင်းနှစ်ဦးအား ကတ်တမင်းဆေးပြား (၁၀)ပြားဖြင့် ဖမ်းမိသည်ဟု မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က အောက်တိုဘာလ (၈)ရက်နေ့တွင် သတင်းထုတ်ပြန်ခဲ့သော်လည်း နာရီအနည်းငယ် အကြာတွင် အဆိုပါသတင်းကို ပြန်လည်ဖြုတ်ချခဲ့သည်ကို တွေ့ရသည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ထုတ်ပြန်ထားခဲ့သည့်သတင်းဓါတ်ပုံတွင် ထိုင်းနိုင်ငံ၌ ရောင်းချလေ့ရှိသည့် Play More Candy ပူရှိန်းငုံဆေးပုလင်းနှင့် ပူရှိန်းငုံဆေးပြားများနှင့် တူသည့် ဆေးပြား (၁၁)ပြားကို တွေ့ရပြီး သတင်းထုတ်ပြန်ချက်တွင် ဆေးပြား (၁၀)ပြားဟု ဖေါ်ပြထားသည်ကိုလည်း တွေ့ရသည်။

ဖြိုးပြည့်စုံ၊ ရော်နီစန်းလွင်နှင့် ငြိမ်းချမ်းကိုတို့အား ဗဟန်းမြို့မရဲစခန်းတွင် မယ(ပ)၄၄/၂၀၁၉၊ မူး/စိတ်ပုဒ်မ ၁၉(က)/၂၁ ဖြင့် အောက်တိုဘာလ (၇)ရက်နေ့ ညပိုင်းတွင် အမှုဖွင့်ထိန်းသိမ်းထားခဲ့ခြင်းဖြစ်သည်။

Tachileik News Agency
ဓါတ်ပုံ - Phyo Pyae Sone Facebook Page