~~~~~~~~⊰❂ Unicode Version ❂⊱~~~~~~~~

မြန်မာ UMFCCI နှင့် တရုတ် CCCME တို့ကြား စက်ပစ္စည်းများနှင့် လျှပ်စစ်ထုတ်ကုန်များ တင်သွင်း၊တင်ပို့ခြင်းဆိုင်ရာ  ပူးပေါင်းဆောင်ရွက်မှု စာချွန်လွှာ လက်မှတ်ထိုး
***************
ကုန်သည်များနှင့် စက်မှုလက်မှု လုပ်ငန်းရှင်များအသင်းချုပ် (UMFCCI) နှင့် တရုတ်နိုင်ငံ စီးပွားရေးနှင့် ကူးသန်းရောင်းဝယ်ရေး အသင်းချုပ်(CCCME) တို့အကြား စက်ပစ္စည်းများနှင့် လျှပ်စစ်ထုတ်ကုန်များ တင်သွင်း/ တင်ပို့ခြင်း ပူးပေါင်းဆောင်ရွက်မှုစာချွန်လွှာကို ၂၀၁၉ ခုနှစ်၊ စက်တင်ဘာလ (၂၂)ရက်နေ့က လက်မှတ်ရေးထိုးကြောင်း သိရသည်။

ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးဌာန၊ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနနှင့် တရုတ် နိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ပြင်ပ ရင်းနှီးမြှုပ်နှံမှုနှင့် စီးပွားရေး ပူးပေါင်းဆောင်ရွက်ရေး ဦးစီးဌာနတို့ ပူးပေါင်း၍ ရင်းနှီးမြှုပ်နှံမှု မြှင့်တင်ရေးနှင့် စီမံကိန်းများ ချိတ်ဆက်မှု အခမ်းအနားကို စက်တင်ဘာလ (၂၂) ရက်နေ့က ရန်ကုန်မြို့ရှိ Sedona Hotel တွင် ကျင်းပစဉ် လက်မှတ်ရေးထိုးခဲ့ခြင်းဖြစ်ကြောင်း သိရသည်။

အဆိုပါအခမ်းအနားသို့ ပဲခူးတိုင်းဒေသကြီးဝန်ကြီး ဦးညွန့်ရွှေ၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီး မစ္စတာချန်ဟိုင်၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှ ညွှန်ကြားရေးမှူးချုပ် ဦးသန့်စင်လွင်၊ တရုတ်နိုင်ငံ၊ စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာန၊ ပြင်ပရင်းနှီးမြှုပ်နှံမှုနှင့် စီးပွားရေးပူးပေါင်းဆောင်ရွက်ရေး ဦးစီးဌာနမှ ညွှန်ကြားရေးမှူးချုပ် မစ္စတာဝမ်ရှမ်းဝမ် (Mr. Wang Shengwen)၊ အစိုးရဌာန ဆိုင်ရာများမှ အဆင့်မြင့် အရာရှိများ၊ UMFCCI နှင့် CCCME တို့မှ တာဝန်ရှိသူများ၊ ပြည်တွင်းပြည်ပ စီးပွားရေးလုပ်ငန်းရှင်များ စုစုပေါင်း (၂၀၀)ဦးခန့် တက်ရောက်ခဲ့ကြသည်ဟု သိရသည်။

Tachileik News Agency
Photo: DICA