~~~~~~~~⊰❂ Unicode Version ❂⊱~~~~~~~~

မွန်ပြည်နယ် သဲဖြူကုန်းရွာတွင် တောင်ပြို၍ မြေအောက်မြုပ်သွားသူများအား တတိယနေ့ ရှာဖွေမှုကို ကယ်ဆယ်ရေးအထူးတပ်ဖွဲ့နှင့် နည်းပညာများ ထပ်ဖြည့်ဆောင်ရွက်နေ
********
မွန်ပြည်နယ်၊ ပေါင်မြို့နယ်၊ သဲဖြူကုန်းကျေးရွာတွင် တောင်ပြိုကျ၍ မြေအောက်နစ်မြုပ်သွားသည့်နေရာတွင် ရှာဖွေကယ်ဆယ်ရေးတတိယမြောက်နေ့အဖြစ် ၂၀၁၉ ခုနှစ်၊ သြဂုတ်လ (၁၁)ရက်နေ့က ရှာဖွေကယ်ဆယ်ရေး အထူးတပ်ဖွဲ့နှင့် နည်းပညာအားဖြည့်ပြီး ဆောင်ရွက်နေရာ ညနေ (၆)နာရီ (၁၃)မိနစ်အထိ ရုပ်အလောင်း (၄)ခုထပ်တွေ့၍ သေဆုံးသူ (၅၂)ဦးအထိ တိုးလာပြီဖြစ်သည်။

မြန်မာနိုင်ငံမီးသတ်တပ်ဖွဲ့ဌာနချုပ်နှင့် ရန်ကုန်တိုင်းဒေသကြီးမီးသတ်ဦးစီးမှူးရုံးမှ ရှာဖွေကယ်ဆယ်ရေး အထူးတပ်ဖွဲ့ဝင်များသည် Thermal Imaging Camera (TIC) နှင့် LEADER Hasty နည်းပညာပစ္စည်းများအသုံးပြု၍ ဌာနဆိုင်ရာအဖွဲ့အစည်းများ၊ လူမှုကူညီရေးအသင်းအဖွဲ့များ၊ ဒေသခံပြည်သူများနှင့် ပူးပေါင်း၍ ရှာဖွေကယ်ဆယ်ရေးလုပ်ငန်းများကို တတိယမြောက်နေ့အဖြစ် ဆောင်ရွက်ခြင်းဖြစ်သည်။

အဆိုပါမြေပြိုမှုအတွင်းမှ အသက်ရှင်လျှက် (၂၉)ဦးကို ကယ်တင်ထားနိုင်ခဲ့ပြီး မြေအောက်မြုပ်နေသည်များကို ဆက်လက်ရှာဖွေနေခြင်းဖြစ်သည်။

သဲဖြူကုန်းကျေးရွာတွင် ၂၀၁၉ ခုနှစ်၊ သြဂုတ်လ (၉)ရက်နေ့ နံနက်(၇)နာရီဝန်းကျင်က မြေပြိုပြီး လူနေရပ်ကွက်အား ဖုံးလွှမ်းသွားသဖြင့် မြေဖုံးနေသည့်အောက်မှ အသက်ရှင်ကျန်ရစ်သူများနှင့် ရုပ်အလောင်းများကို ရှာဖွေကယ်ဆယ်နေရာသို့ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအဖွဲ့ ဥက္ကဌ ၊ ဒုတိယသမ္မတ(၂) ဦးဟင်နရီဗန်ထီးယူ၊ လူကယ်ပြန်ဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး၊ ပြည်နယ်ဝန်ကြီးချုပ်နှင့် သက်ဆိုင်ရာ တာဝန်ရှိသူများ ပါဝင်သောအဖွဲ့က သြဂုတ်လ (၁၀)ရက်နေ့တွင် သွားရောက်ပြီး ကယ်ဆယ်ရေးအတွက် လိုအပ်သည်များ ထပ်ဖြည့်ပေးထားခြင်းဖြစ်ကြောင်း သိရသည်။

Tachileik News Agency
Photo MFSD