တာချီလိတ်မြို့တွင်းရှိနေအိမ်တစ်လုံးမှ မူးယစ်ဆေးဝါးများနှင့် လက်နက်ခဲယမ်းမျိုးစုံ ဖမ်းဆီးရမိပြီး နေအိမ်ပိုင်ရှင် လွတ်မြောက်နေ
**************
မြန်မာ - ထိုင်းနယ်စပ် ရှမ်းပြည်နယ်အရှေ့ပိုင်း၊ တာချီလိတ်မြို့ရှိ နေအိမ်တစ်လုံးတွင်၂၀၁၉ ခုနှစ်၊ ဇွန်လ (၂၃)ရက်နေ့ နံနက်အစောပိုင်းက ဝင်ရောက်စစ်ဆေးရာ မူးယစ်ဆေးဝါးများနှင့် လက်နက်ခဲယမ်းများကို အိမ်စောင့်အမျိုးသားနှစ်ဦးနှင့် ဖမ်းမိပြီး အိမ်ရှင်မှာ လွတ်မြောက်နေကြောင်း သိရသည်။

ဆေခမ်းရပ်ကွက်၊ ဗိုလ်ချုပ်လမ်းရှိ ညီညီနိုင်၏နေအိမ်အား မူးယစ်တပ်ဖွဲ့စု(၃၀)ဦးစီးပြီး သက်ဆိုင်ရာရဲတပ်ဖွဲ့များပါဝင်သည့် ပူးပေါင်းအဖွဲ့ဖြင့် ဝင်ရောက်ရှာဖွေရာ နေအိမ်ပိုင်ရှင်အားမတွေ့ရဘဲ အိမ်စောင့်အမျိုးသားနှစ်ဦးဖြစ်သည့် စိုင်းဆိုင်မိုင်းနှင့် အိုက်ဝမ်းတို့အား တွေ့ရကြောင်း သိရသည်။

နေအိမ်အတွင်းရှာဖွေရာ စိတ်ကြွဆေးပြား (၁၄၀၀)ပြား၊ ဘိန်းဖြူ (၆၆၀)ဂရမ်၊ အိုက်စ်(၂၇၅)ဂရမ်ခန့်၊ ကဖင်း (၄၇၃)ဂရမ်ခန့်၊ 9 မမ Cal အမျိုးအစားသေနတ်(၁)လက်၊ M 22 အမျိုးအစား မှန်ဘီလူးပါသေနတ်(၁)လက်၊ HK 33 အမျိုးအစား သေနတ်(၁)လက်၊ ပွိုင့် 22 အမျိုးအစားမှန်ဘီလူးပါ သေနတ်(၂)လက်၊ စနိုက်ပါအမျိုးအစား မှန်ဘီလူးနှင့်ဒေါက်ပါသေနတ်(၁)လက်၊ Glock 19 အမျိုးအစား ပစ္စတိုသေနတ် (၂)လက်၊ KIMBER ULTRA 2 အမျိုးအစား ပစ္စတိုသေနတ် (၁)လက်၊SMITH & WESSON MP 9 အမျိုးအစားပစ္စတိုသေနတ်(၁)လက်၊ BERETTA 9 MM အမျိုးအစားပစ္စတိုသေနတ် (၁)လက်၊ AIFA COMBAT 9 MM အမျိုးအစား ပစ္စတိုသေနတ်(၁)လက်၊ ပွိုင့် 38 MM အမျိုးအစားပစ္စတိုသေနတ်(၁)လက်၊ 12 ဗို့ကျည် တစ်လုံးထိုးသေနတ်အတို (၁)လက်၊ပွိုင့် 45 ကျည် (၅၃)တောင့်၊ ပွိုင့် 22 ကျည် (၄၇၂)တောင့်၊ပွိုင့် (၃၈)ကျည် (၅၅)တောင့်၊စနိုက်ပါကျည်(၄၆)တောင့်၊ ၁၂ ဗို့ကျည် (၂၅)တောင့်၊ 9 M ကျည်(၂၂၁)တောင့်၊M 22 ကျည် (၉၅)တောင့်၊ 5.56 ကျည် (၃၁)တောင့်၊ 7.62 ကျည် (၄၀၀)တောင့်၊ ပွိုင့် ၂၂ ကျည်ဘောက် (၈)ခု၊ M 22 ကျည်ဘောက် (၄)ခု၊ အူဇီကျည်ဘောက် (၃)ခု၊ 9 M ကျည်ဘောက် (၁၆)ခု၊ 5.56 ကျည်ဘောက် (၁)ခု၊ Armacor ပွိုင့် ၄၅ သေနတ်တစ်လက်၊ ကျည်အိမ်(၂)ခုနှင့် ကျည် (၈)တောင့်ကို သိမ်းဆည်းရမိပြီး လက်နက်အများစုတွင် နံပါတ်များပါဝင်ကြောင်း သိရသည်။

မီးခံသေတ္တာအတွင်းမှ ရွှေရည်စိမ်နှင့် ငွေထည်လက်ဝတ်ရတနာများ၊ ကျောက်အရိုင်းရောရာမျိုးစုံ၊ ရွှေနှင့်ကျောက်ရောရာ ရွှေထည်အလေးချိန်စုစုပေါင်း (၈၅၈.၆)ဂရမ်ခန့်၊ စိုင်းညီညီနိုင်အမည်ဖြင့် ဟိုမိန်းပြည်သူ့စစ်ဌာနအဖွဲ့၏ ကဒ်တစ်ခု၊ ဒေါ်နန်းရှီးဖောင်းအမည်နှင့် ဘဏ်ငွေစုစာအုပ်နှင့် နေအိမ်ခြံဝန်းအတွင်းမှ Crown အမျိုးအစား ခဲရောင်မော်တော်ယာဉ် (၁)စီး၊ Canda အမျိုးအစား အနက်ရောင်ဆိုင်ကယ် (၁)စီး၊ Honda Wave 110 အမျိုးအစား ဖြူပြာရောင်ဆိုင်ကယ်(၁)စီးနှင့် Hummer H2 အမျိုးအစား အဖြူရောင်မော်တော်ယာဉ် (၁)စီးတို့ကိုလည်း သိမ်းဆည်းထားကြောင်း သိရသည်။

အဆိုပါနေအိမ်မှ မူးယစ်ဆေးဝါး၊ လက်နက်ခဲယမ်းများနှင့်အတူ ဖမ်းမိထားသူနှစ်ဦးကို စစ်ဆေးနေဆဲဖြစ်ပြီး လွတ်မြောက်နေသူများကို ဖမ်းဆီးရမိရေး ဆောင်ရွက်နေကြောင်း သိရသည်။

Tachileik News Agency