~~~~~~~~⊰❂ Unicode Version ❂⊱~~~~~~~~

တာလေမြို့ရှောင်လမ်းအတွက် လယ်မြေစွန့်လွှတ်လိုက်ရသည့် တောင်သူ (၉၄) ဦးအတွက် မြေယာလျော်ကြေး ကျပ်သိန်း (၅၉၀၀)ကျော်ပေးအပ်
************
ရှမ်းပြည်နယ်အရှေ့ပိုင်း၊ တာချီလိတ်မြို့နယ်၊ တာလေမြို့တွင် မြို့ရှောင်လမ်းဖောက်လုပ်ရန်အတွက် လယ်ယာမြေများစွန့်လွှတ်ပေးခဲ့သည့် ဒေသခံတောင်သူ (၉၄) ဦးကို မြေယာလျော်ကြေးငွေ ကျပ်သိန်း (၅၉၀၀) ကျော်အား ၂၀၁၉ ခုနှစ်၊ ဧပြီလ (၂၄) ရက်နေ့တွင် ပေးအပ်သည်။

မြေယာလျော်ကြေးပေးအပ်ခြင်းကို တာလေမြို့အထွေထွေအုပ်ချုပ်ရေးဦးစီးဌာနရုံးတွင် ပြုလုပ်ခဲ့ခြင်းဖြစ်သည်။

"ကုန်စည်ကူးသန်းရောင်းဝယ်မှုတွေလုပ်ရင် ကားကြီး၊ ကားငယ်တွေနဲ့ မြန်မြန်ဆန်ဆန်သွားလာနိုင်ဖို့အတွက် လူတွေရှုပ်ထွေးတဲ့၊ ယာဉ်တွေရှုပ်ထွေးတဲ့ မြို့ထဲကနေသွားလာမယ်ဆိုရင် ခက်ခဲတာပေါ့။ သွားလာနေတဲ့ ဒေသခံတွေအတွက်လည်း အနှောက်အယှက်ဖြစ်မယ်။ သွားနေတဲ့ကုန်ကားတွေအတွက်လည်း နှောင့်နှေးကြန့်ကြာမှုတွေဖြစ်မယ်။ ကုန်စည်ကူးသန်းသွားလာနိုင်တဲ့ လမ်းကြောင်းတစ်ခုရွေးတဲ့အခါမှာ ပြည်သူလူထုရဲ့ စိုက်ပျိုးမြေတွေ အနည်းဆုံးဖြစ်မယ့်နေရာကို ရွေးချယ်ရပါတယ်။ တောင်သူတွေဘက်ကလည်း မနစ်နာဖို့၊ နိုင်ငံတော်ဘက်ကလည်း ပေးနိုင်တဲ့နှုန်းထားတစ်ခုဖြစ်ဖို့၊ ဒေသမှာလည်း ထိုက်သင့်တဲ့ဈေးနှုန်းဖြစ်ဖို့ အဖွဲ့တွေက အကြိမ်ကြိမ်ကွင်းဆင်း၊ အကြိမ်ကြိမ်ညှိနှိုင်းပြီးတော့မှ လျော်ကြေးကိစ္စတွေ သက်မှတ်ရတာ ဖြစ်ပါတယ်။ ဒါကြောင့်မို့ လုပ်ငန်းစတင်တဲ့အချိန်ကစပြီး လျော်ကြေးပေးတဲ့အချိန်အထိ အချိန်ကာလ တစ်ခုကြာခဲ့တာပါ"ဟု တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က တာချီလိတ်သတင်းအေဂျင်စီသို့ ပြောသည်။

တာလေမြို့ရှောင်လမ်းဖောက်လုပ်ရန် ၂၀၁၅ ခုနှစ်မှစတင်ဆောင်ရွက်ခဲ့ခြင်းဖြစ်ပြီး (၈) မိုင် (၁) ဖာလုံကျော်ကို လမ်းအကျယ် ပေ (၁၅၀) သတ်မှတ်ဖောက်လုပ်မည်ဖြစ်ကြောင်း သိရသည်။

မြေယာစွန့်လွှတ်ခဲ့သည့် မိုင်းလင်း(အနောက်) ကျေးရွာမှ တောင်သူ (၇၂) ဦးအတွက် လျော်ကြေးငွေကျပ် (၄၅၅ ၆၂၉ ၀၀၀) နှင့် နားယောင်းကျေးရွာမှ တောင်သူ (၂၂) ဦးအတွက် လျော်ကြေးငွေကျပ် (၁၄၀ ၁၆၂ ၀၀၀) စုစုပေါင်း တောင်သူ (၉၄) ဦးအတွက် ငွေကျပ် (၅၉၅ ၇၉၁ ၀၀၀) ကို ပေးအပ်ခဲ့ကြောင်း သိရသည်။

သတင်း၊ဓါတ်ပုံ #ဟန်စိုးထိုက်