~~~~~~~~⊰❂ Unicode Version ❂⊱~~~~~~~~

UWSA ဌာနချုပ် ပန်ဆန်းတွင်ကျင်းပမည့် ငြိမ်းချမ်းရေး နှစ် (၃၀)ပြည့်အခမ်းအနားသို့ မည်သူမဆိုတက်ရောက်နိုင်
*****
အစိုးရနှင့် UWSP/UWSA တို့ ငြိမ်းချမ်းရေးနှစ်(၃၀)ပြည့်အခမ်းအနားကို ပန်ဆန်းမြို့ရှိ UWSA ဌာနချုပ် စစ်ရေးပြကွင်းတွင် ၂၀၁၉ ခုနှစ်၊ ဧပြီလ (၁၅)ရက်နေ့မှ (၁၇)ရက်နေ့အထိကျင်းပမည်ဖြစ်ရာ မည်သူမဆို တက်ရောက်နိုင်သော်လည်း နီးစပ်ရာ “ဝ”ပြည် ပြင်ပဆက်ဆံရေးရုံးများတွင် ခရီးသွားလာခွင့်ထောက်ခံစာ ရယူရန်လိုအပ်ကြောင်း သိရသည်။

“ဝ”ဒေသသို့ လာရောက်လည်ပတ်မည့်သူများ၏ မှတ်ပုံတင်မိတ္တူနှင့် မော်တော်ယာဉ်ပါဝင်ပါက မော်တော်ယာဉ်အချက်အလက်များအား “ဝ” ပြည် ပြင်ပဆက်ဆံရေးရုံး၌ တစ်ပါတည်း သတင်းပေးပို့ရမည်ဖြစ်ကြောင်း သိရသည်။

အဆိုပါ အခမ်းအနားသို့ ပြည်တွင်းပြည်ပမှ သံတမန်များ၊ ကုလသမဂ္ဂဆိုင်ရာအဖွဲ့အစည်းများ၊ INGO၊ NGO၊ LNGO များ၊ သတင်းမီဒီယာများနှင့် အများပြည်သူများလည်း တက်ရောက်နိုင်ကြောင်း ဖိတ်ကြားထားသည်။

ပန်ဆန်းမြို့သို့ သွားရောက်မည့်သူများအနေဖြင့် လားရှိုး - တန့်ယန်း - ပန်ဆန်းလမ်း၊ လားရှိုး - ဟိုပန် - မိုင်းမော - ပန်ဆန်းလမ်းကြောင်းနှင့် ကျိုင်းတုံ - မိုင်းခတ် - မိုင်းယန်း - မိုင်းဖျန် - ပန်ဆန်းလမ်းကြောင်းအတိုင်း လာရောက်နိုင်ကြောင်း “ဝ”ဒေသတာဝန်ရှိသူများက သတင်းထုတ်ပြန်ထားသည်။

အစိုးရနှင့် UWSP/UWSA အဖွဲ့သည် ၁၉၈၉ ခုနှစ် ဧပြီလ (၁၇)ရက်နေ့တွင် အပစ်ရပ်သဘောတူစာချုပ် လက်မှတ်ရေးထိုးပြီး ငြိမ်းချမ်းရေးယူခဲ့ကြခြင်းဖြစ်သည်။

ငြိမ်းချမ်းရေးနှစ်(၃၀)ပြည့်အထိမ်းအမှတ်အဖြစ် “ဝ”ပြည်အတွင်း ပြစ်ဒဏ်ကျခံနေရသူများအနက် မူးယစ်ဆေးဝါးနှင့်ပတ်သက်သည့်ပြစ်ဒဏ်မှလွဲ၍ ပြစ်ဒဏ် တစ်ဝက်လျှော့ခံစားခွင့်၊ ကူးစက်ရောဂါရှိသူများကို ပြစ်ဒဏ်မှလွတ်ငြိမ်းခွင့်ပေးသွားမည်ဖြစ်ကြောင်း သတင်းထုတ်ပြန်ထားသည်။

Tachileik News Agency