ကယားပြည်နယ်တွင် မကြာသေးမီက ထားရှိသည့်  ဗိုလ်ချုပ်အောင်ဆန်းကြေးရုပ်နှင့် ပတ်သက်၍  ဖျက်သိမ်း ပေးရန်၊ ဝန်ကြီးချုပ်နှင့် စီမံဘဏ္ဍာဝန်ကြီး နုတ်ထွက်ပေးရန်အတွက် ကရင်နီလူငယ် အင်အားစုများမှ ကယားပြည်နယ်လွှတ်တော်ဟစ်တိုင်ဝန်းတွင် ၂၀၁၉ခုနှစ် ဖေဖော်ဝါရီလ (၁၁)ရက်နေ့ ညနေပိုင်းက ဆန္ဒဖော်ထုတ်ခဲ့ကြသည်။

လွိုင်ကော်မြို့၊ ကန္ဓာဟေဝန်ပန်းခြံတွင်ထားရှိသည့် ဗိုလ်ချုပ်မြင်းစီးကြေးရုပ် ဖြစ်ပေါ်လာခြင်းမှာ အများပြည်သူ၏ ဆန္ဒမဟုတ်ပဲ ကယားပြည်နယ် ဝန်ကြီးချုပ်မှ စတင်ခဲ့ခြင်းဖြစ်ပြီး၊ အများပြည်သူပိုင်သော ပန်းခြံအတွင်း ပြည်သူများ၏ သဘောထားဆန္ဒမပါဘဲ တည်ထားသော ကြေးရုပ်အား ရွေ့ပြောင်းပေးရန် နှင့် တာဝန်ယူမှု တာဝန်ခံမှုရှိရှိ တွေ့ဆုံဆွေးနွေးဖြေရှင်းမှု မလုပ်ဆောင်နိုင်သောကြောင့် ကယားပြည်နယ် ဝန်ကြီးချုပ်နှင့် စီမံဘဏ္ဍာဝန်ကြီးတို့ နှုတ်ထွက်ပေးရန် တောင်းဆိုရခြင်းဖြစ်ကြောင်း ဆန္ဒဖော်ထုတ်ရာတွင် ဦးဆောင်သူ တစ်ဦးဖြစ်သည့် ကိုကျော်ထင်အောင်က ပြောသည်။

“ညှိနှိုင်းဖြေရှင်းဖို့အတွက် ဇန်နဝါရီလ(၃၁)ရက်နေ့ ကတည်းက လူငယ်တွေ တောင်းဆိုတယ် မထွက်လာ သေးဘဲနဲ့၊ ရဲတွေ ထွေအုပ်တွေ မြို့နယ်စီမံခန့်ခွဲရေးတွေနဲ့ပဲ ကျွန်တော်တို့တွေကို ကန့်သတ်ဖိနှိပ်နေတာ တွေ့ရှိရတယ်။ တာဝန်ယူမှု ရှိရှိ တာဝန်ခံမှုရှိရှိ ဒီမိုကရေစီနည်းအရ  စေ့စပ်ဆွေးနွေးမရှိနိုင်ဘူး ဆိုရင်တော့ မိမိယူထားတဲ့ တာဝန်ကနေ နုတ်ထွက်ပေးပါ ။  ရုပ်တုတည်ထားလိုတယ်ဆိုရင်တော့ ခင်ဗျားတို့နဲ့သက်ဆိုင်တဲ့ ရုံးတွေနေရာတွေမှာ တည်ထားပါ။ အများနဲ့ သက်ဆိုင်တဲ့နေရာမှာ တည်ထား လိုရင်တော့ အများပြည်သူ ဆန္ဒကို ရယူပါ မဲပုံးထောင်လိုက်ပါ အများပြည်သူက လက်ခံရင်တည်ပါ ဒါဟာ ဒီမိုကရေစီပါ “ ဟုဆန္ဒဖော်ထုတ်ရာတွင် ၎င်းမှပြောဆိုခဲ့သည်။

ဗိုလ်ချုပ်အောင်ဆန်းကြေးရုပ် ထားရှိခြင်းနှင့်ပက်သက်၍ လူငယ်များတောင်းဆိုထားသော အချက်များအား ကယားပြည်နယ်အစိုးရ တာဝန်ရှိသူများမှ ညှိနှိုင်းဆွေးနွေးမှုများ မရှိသေးသောကြောင့် ကယားပြည်နယ် လွှတ်တော်ဟစ်တိုင်ဝန်းတွင် ဆန္ဒဖော်ထုတ် တောင်းဆိုရန် ဖေဖော်ဝါရီလ (၈)ရက်နေ့က လွှတ်တော်ရုံးသို့ ကရင်နီလူငယ်အင်အားစု သပိတ်ကော်မတီမှ စာတင်၍ ခွင့်ပြုချက် တောင်းခံခဲ့ပြီး သက်ဆိုင်ရာဥပဒေ ၊နည်းဥပဒေ စည်းမျဉ်းစည်းကမ်းများနှင့် ညီညွတ်ပါက ကန့်ကွက်ရန်မရှိဘဲ ဟစ်တိုင်အား အသုံးပြုရန်  ဖေဖော်ဝါရီလ (၉)ရက်နေ့က  လွှတ်တော်ရုံးမှ ခွင့်ပြုခဲ့ကြောင်း သိရသည်။

ဖေဖော်ဝါရီလ (၁၁)ရက်နေ့ ညနေ(၃)နာရီမှ(၅)နာရီအထိ ကယားပြည်နယ်လွှတ်တော် ဟစ်တိုင်ဝန်းတွင် ကရင်နီလူငယ်များနှင့် ပြည်မမှ ဝန်းရံသူ လူငယ်များ မှ ဗိုလ်ချုပ်ကြေး ရုပ်ဖျက်သိမ်းပေးရန် ၊ ဝန်ကြီးချုပ်နှင့် စီမံဘဏ္ဍာဝန်ကြီး နုတ်ထွက်ပေးရန်၊ လူငယ်များအား တရား စွဲဆို ထားမှုများအား ဖျက်သိမ်းပေးရန် ၊ တိုင်းရင်သား အခွင့်အရေးများအား အသိအမှတ်ပြုပေးရန် စသည့် တောင်းဆိုချက်များဖြင့် ဆန္ဒဖော်ထုတ်ခဲ့ကြပြီး လက်ရှိတွင် ဗိုလ်ချုပ်ကြေးရုပ်နှင့်ပက်သက်၍ ကရင်နီ လူငယ်များအား ငြိမ်းစုစီပုဒ်မ ၁၉၊၂၀ နှင့် ရာဇသတ်ကြီးပုဒ်မ  ၅၀၅(ခ)(ဃ) တို့ဖြင့် တရားစွဲဆိုခံထားရသူ (၅၅) ဦး ရှိပြီဖြစ်ကြောင်း သိရှိရသည်။

သတင်း/ဓါတ်ပုံ - ဆန်းဖြိုးထွန်း

~~~~~~~~⊰❂ Unicode Version ❂⊱~~~~~~~~

⊰❂ #TachileikNewsAgency #TNA #TachileikOnlineNews  #တာချီလိတ်သတင်းအေဂျင်စီ www.tachileik.net  ❂⊱

~~~~~~~~~~~~~~~~~~ ကြော်ငြာ ~~~~~~~~~~~~~~~~~~~~