~~~~~~~~⊰❂ Unicode Version ❂⊱~~~~~~~~

မြန်မာ - ထိုင်းနယ်စပ်ဒေသ၊ တာချီလိတ်မြို့တွင် ဒေသခံများနှင့် ရွှေပြောင်းလုပ်သားများအား အခမဲ့ ကျန်းမာရေး စောင့်ရှောက်မှု ပေးနိုင်ရန် ရည်ရွယ် ဖွင့်လှစ်ထားသည့် ဇီဝက အခမဲ့ဒါနဆေးကုသခန်းတွင်
(၆)နှစ်တာ ကာလအတွင်း လူနာပေါင်း ( ၄၇,ဝဝဝ )နီးပါးကို ကုသပေးထားကြောင်း သိရသည်။

ဇီဝက အခမဲ့ ဒါနဆေးကုသခန်းကို ၂၀၁၃ ခုနှစ် မတ်လ (၃၀) ရက်နေ့တွင် ဖွင့်လှစ်ခဲ့ပြီး လူမျိုးဘာသာ မခွဲခြားဘဲ ကုသပေးကာ တောင်ပေါ်ဒေသများသို့လည်း သွားရောက်ကုသပေးနေကြောင်း သိရသည်။

“တာချီလိတ်မြို့မှာ အခမဲ့ပရဟိတဆေးခန်းဆိုတာ တစ်ခုပဲရှိတာ။ ဒီထက်ပိုပြီးတော့ ပရဟိတဆေးခန်းတွေ အများကြီး ဖြစ်လာစေချင်တယ်။ ကျွန်တော်တို့ ဆေးခန်းမှာလည်း ပိုမိုတောင့်တင်းတဲ့ ဆရာဝန်အင်အား၊ ငွေကြေး အင်အား၊ အလုပ်သမား အင်အား ပိုပြီးဖြစ်စေချင်တယ်။ ပိုပြီးလုပ်သွားချင်တဲ့အတွက် တာချီလိတ်မြို့ မြို့သူမြို့သားတွေရော အခြားမြို့ရွာ တွေကရော ဒီဆေးခန်းလေးကို ကူညီချင်တဲ့ သူတွေအားလုံးကရော ဝိုင်းဝန်းကူညီပေးကြပါလို့ တောင်းဆိုချင်ပါတယ်”ဟု ဇီဝက အခမဲ့ ဒါနဆေးကုသခန်းမှ ဒေါက်တာပြည့်မြင့်မြတ်က တာချီလိတ်သတင်းအေဂျင်စီသို့ ပြောသည်။

ဇီဝက အခမဲ့ဆေးခန်းကို တနင်္ဂေနွနေ့နှင့် အခါကြီးရက်ကြီးများမှအပ နေ့စဉ် နံနက်(၉) နာရီမှ (၁၂) နာရီအထိ နေ့စဉ် တစ်ရက်လျှင်လူနာ (၃၀)ဦးကို စမ်းသပ်ကုသပေးနေကြောင်းနှင့် တစ်ရက်ကြိုတင် နာမည်စာရင်း ပေးရန်လိုအပ်ပြီး သံဃာတော်များ၊ ဘိုးဘွားရိပ်သာမှ အဘိုးအဘွားများနှင့် သက်ကြီးရွယ်အိုများ အပါအဝင် ရပေ်ဝးဒေသမှ လာရောက်ကုသသူများ ကို ဦးစားပေး ကုသပေးနေကြောင်း သိရသည်။

ဇီဝက အခမဲ့ဒါနဆေးကုသခန်းကို တာချီလိတ်မြို့ ဝမ်ကောင်းရပ်ကွက်၊ ဘိုးဘွားရိပ်သာအနီး ဟိုတယ်တာချီလိတ်လမ်းတွင် ဖွင့်လှစ်ထားရှိပြီး ဖုန်း09250839940၊ 09456490570 နှင့် 09445215210 တို့ကိုလည်း ဆက်သွယ်နိုင်ကြောင်း သိရသည်။

Tachileik News Agency
ဓာတ်ပုံ - ဟန်စိုးထိုက်၊ ကျော်ဇင်ဟိန်း