~~~~~~~~⊰❂ Unicode Version ❂⊱~~~~~~~~

"သေနတ်သံကြားလို့ ထွက်ကြည့်လိုက်တော့ မီးပွိုင့်ရှေ့မှာ ကားတစ်စီးထဲမှာ လူသေနေတာကို တွေ့ရတယ်။ ပစ်သတ်သွားသူက ဆိုင်ကယ်နဲ့ အမျိုးသားနှစ်ဦးလို့ ပြောသံတွကြေားရတယ်။"ဟု အခင်းဖြစ်ပွားရာ နေရာသို့ သွားရောက်ကြည့်သည့် အမျိုးသားတစ်ဦးက တာချီလိတ်သတင်းအေဂျင်စီသို့ ဇန်နဝါရီလ(၂၉)ရက်နေ့ နေ့လည်(၂)နာရီကျော်က ပြောသည်။

သေနတ်ဖြင့် ပစ်သတ်ခံရသူမှာ တာချီလိတ်မြို့ ဆေးခမ်းရပ်ကွက်နေထိုင်သူ အသက်(၅၁)နှစ်ဝန်းကျင်ရှိ ဦးအားဖာ(တပင်ရွှေထီး)ဆိုသူ တပင်ရွှေထီးဆီပန့်ပိုင်ရှင် ဖြစ်ပြီး ယာဉ်အား ဦးအားဖာမှ ကိုယ်တိုင်မောင်းကာ ယာဉ်ပေါ်တွင် ဦးအားဖာ အပါအဝင် (၅)ဦး ပါဝင်ကြောင်းနှင့်၎င်းတို့သည် ပုံလို့မီးသင်္ဂြိုလ်စက်ပြုလုပ်နေသည့် နေရာသို့ သွားရောက်ကြည့်ပြီး နေအိမ်သို့ ပြန်ရန် ကားမောင်းလာစဉ် အာခါဈေးရှေ့ရှိ မီးပွိုင်လမ်းဆုံအရောက်တွင် မီးပွိုင့်နီနေရာမှ ယာဉ်ရပ်ထားစဉ် အမည်မသိ အမျိုးသားနှစ်ဦးမှ ဆိုင်ကယ်ဖြင့် ရောက်ရှိလာပြီး သေနတ်ဖြင့် (၅)ချက်ထက် မနည်း ပစ်ခတ်သွားခြင်း ဖြစ်ကြောင်း သိရသည်။

သေဆုံးသူ ဦးအားဖာ၏ ရုပ်အလောင်းအား တာချီလိတ်ပြည်သူ့ဆေးရုံရှိ ရင်ခွဲရုံသို့ ပို့ဆောင်ထားကာ စစ်ဆေးမှုများ ပြုလုပ်နေရာတွင် ခန္ဓာကိုယ်၌ ယာနားထင်တွင် ကျည်ဖောက်ဝင်ဒဏ်ရာ(၁)ချက်၊ ယာနံစောင်းတွင် ကျည်ဖောက်ဝင်ဒဏ်ရာ (၃)ချက်၊ ယာဘက်ဝမ်းဗိုက်တွင် ကျည်ဖောက်ဝင် ဒဏ်ရာ(၁)ချက်၊ ယာဘက် လက်မောင်းတွင် ကျည်ဖောက်ဝင်ဒဏ်ရာ (၁)ချက် စုစုပေါင် ကျည်ဖောက်ဒဏ်ရာ (၆)ချက်ရရှိထားသည်ကို စစ်ဆေးတွေ့ရှိရကြောင်း သိရသည်။

အဆိုပါ ပစ်ခတ်လူသတ်မှုနှင့် ပတ်သက်၍ ထွက်ပြေးသွားသူ လူသတ်တရားခံများအား ဖမ်းဆီးရမိရေး အတွက် သက်ဆိုင်ရာ ရဲတပ်ဖွဲ့မှ စုံစမ်းမှုများ ပြုလုပ်နေလျက်ရှိပြီး တာချီလိတ်မြို့မရဲစခန်းတွင် (ပ)၅၀/၂၀၁၉ ရာဇသတ်ကြီးပုဒ်မ ၃၀၂/၁၁၄ ဖြင့် အမှုဖွင့်ဆောင်ရွက်ထားရှိကြောင်း သိရှိရသည်။

Tachileik News Agency
Photo: Tachileik News Agency၊ Sai Kham Boo