မြန်မာ - ထိုင်းနယ်စပ် ရှမ်းပြည်နယ်အရှေ့ပိုင်း၊ တာချီလိတ်မြို့တွင် ထိုင်းနိုင်ငံမှ လျှပ်စစ်ဓာတ်အား ဝယ်ယူ ဖြန့်ဖြူးခြင်းကို မီးလင်းရေးကော်မတီဖြင့် ဆောင်ရွက်ခြင်းအစား အစိုးရချင်း ချိတ်ဆက်ဆောင်ရွက်သည့် စနစ် ပြောင်းလဲကျင့်သုံးရန် ပြည်နယ်လွှတ်တော်တွင် အဆိုတင်ပြသွားမည်ဖြစ်ကြောင်း သိရသည်။
ထိုင်းနိုင်ငံမှ လျှပ်စစ်ဓာတ်အားဝယ်ယူ၍ ဖြန့်ဖြူးခွင့်အတွက် မြို့မီးလင်းရေးကော်မတီသည် လိုက်နာ လုပ်ဆောင်ရမည့် သဘောတူညီချက်များဖြင့် လျှပ်စစ်စွမ်းအားဝန်ကြီးဌာန၊ လျှပ်စစ်ဓာတ်အား ဖြန့်ဖြူးရေး လုပ်ငန်းထံမှ ခွင့်ပြုချက်စာချုပ်ဖြင့် နှစ်စဉ်စာချုပ်သက်တမ်းတိုး လုပ်ကိုင်နခြေင်းဖြစ်သည်။
ဒီတစ်ပတ်လွှတ်တော်မှာ ကျွန်တော်တို့တင်ဖို့ လုပ်ထားတယ်။ ပြင်ဆင်နေတယ်
ဟု တာချီလိတ်မြို့မှ ပြည်နယ်လွှတ်တော်ကိုယ်စားလှယ် ဦးခင်မောင်တင့်က တာချီလိတ်သတင်းအေဂျင်စီသို့ ပြောသည်။
ဓာတ်အားဖြန့်ဖြူးရောင်းချခွင့်ရရှိထားသည့် မီးလင်းရေးကော်မတီသည် ဓာတ်အားသုံးစွဲသူများ၏ မကျေနပ်ချက်၊ တိုင်ကြားချက်များကို အကျေအလည် ဖြေရှင်းဆောင်ရွက်ရန် တာဝန်ရှိသည်ဟု စာချုပ်တွင် ထည့်သွင်း ချုပ်ဆိုထားခြင်းဖြစ်သော်လည်း ကော်မတီအနဖြေင့် ပြည်သူများ၏လိုအပ်ချက်များကို ဖြည့်ဆည်း ပေးနိုင်ခြင်း မရှိဘဲ အကျိုးအမြတ်ကိုသာ ရယူနေသည့် အဖွဲ့အစည်း ပုံစံဖြစ်နေသဖြင့် ပြောင်းလဲရန် လိုအပ်သဖြင့် အဆိုတင်သွင်းရခြင်းဖြစ်သည်ဟု ပြည်နယ်လွှတ်တော်ကိုယ်စားလှယ် ဦးခင်မောင်တင့်က ဆိုသည်။
သူတို့က ဒီအတိုင်းပဲ ဆက်သွားမယ်ဆိုရင် ကျွန်တော်တို့က နိုင်ငံတော်အစိုးရနဲ့ G to G (အစိုးရချင်း ချိတ်ဆက်ဆောင်ရွက်မှု) မလုပ်ပေးနိုင်ဘူးဆိုရင်တောင်မှ ဒီဟာကို ကျွန်တော်တို့က မြို့ကိုယ်စား လုပ်နိုင်တဲ့ ကုမ္ပဏီကို ကျွန်တော်တို့က လေလံပစ်မှာ။ တင်ဒါဆွဲဖို့ ကျွန်တော်တို့ ကြိုးစားရလိမ့်မယ်
ဟု တာချီလိတ်မြို့မှ ပြည်နယ်လွှတ်တော်ကိုယ်စားလှယ် ဦးခင်မောင်တင့်က တာချီလိတ်သတင်းအေဂျင်စီသို့ ပြောသည်။
လက်ရှိတွင် မီးလင်းရေးကော်မတီ၏ဖွဲ့စည်းပုံအရ ခရိုင်အုပ်ချုပ်ရေးမှူးသည် ကော်မတီ၏ ဥက္ကဌအဖြစ် တာဝန်ယူပြီး မြို့လူထုက ပါဝင်ရွေးချယ်ခွင့် မရှိသော ကော်မတီ ဖြစ်ကြောင်းလည်း လွှတ်တော် ကိုယ်စားလှယ်က ထောက်ပြသည်။
လက်ရှိ ဖွဲ့စည်းထားသည့် ကော်မတီသစ်သည် ကျေးရွာအုပ်ချုပ်ရေးမှူးများမှ အဆင့်ဆင့် ရွေးချယ် ထားသော ကော်မတီဝင်များဖြင့် ဖွဲ့စည်းထားကြောင်း တာချီလိတ်မြို့မီးလင်းရေးကော်မတီ တွဲဖက်အတွင်းရေးမှူး ဦးကျော်စွာလွင်က တာချီလိတ်သတင်းအေဂျင်စီသို့ ၂၀၁၉ ခုနှစ်၊ ဇန်နဝါရီ( ၉ )ရက်နေ့က ပြောကြားသည်။
စာချုပ်ပါ သဘောတူညီချက်အရ တာချီလိတ်မြို့နယ်နှင့် (၂၂)မိုင်အတွင်း ကျေးရွာများ၌ မီးလင်းရေး ကော်မတီက မိမိပိုင်ငွဖြေင့် အသုံးစရိတ်အားလုံးကျခံ၍ လျှပ်စစ်ဓာတ်အားဖြန့်ဖြူးနိုင်ပြီး ဓာတ်အား သုံးစွဲသူများနှင့် ညှိနှိုင်းထားသည့် လျှပ်စစ်ဓာတ်အားခနှုန်းထားကို သက်ဆိုင်ရာ ဒေသ အာဏာပိုင်များထံ တင်ပြပြီး အတည်ပြုကောက်ခံရမည်ဖြစ်ကာ ဓာတ်အားသုံးစွဲသူများ၏ မကျေနပ်ချက်၊ တိုင်ကြားချက်များကို အကျေအလည် ဖြေရှင်းဆောင်ရွက်ရန် တာဝန်ရှိခြင်းဖြစ်သည်။
လစဉ် မီတာယူနစ်ဖတ်ခြင်းနှင့် မှတ်တမ်းတင်ခြင်းအား လျှပ်စစ်ဖြန့်ဖြူးနှင့် မီးလင်းရေးကော်မတီတို့က ပူးတွဲဆောင်ရွက်ခြင်းဖြစ်ပြီး မီတာယူနစ်မှားယွင်းကောက်ခံခြင်းရှိနေကြောင်း သိရသည်။
ကျွန်တော့်မှာ လုပ်ငန်း(၂)ခုက မီတာခ တစ်လကို ဘတ်သုံးသောင်းနီးပါးကျတာမှာ အဲဒီလက နှစ်ဆဖြစ်သွားတယ်။ ဒီတော့ ကျွန်တော့်မန်နေဂျာက သွားမေးတော့ ဒါက သူတို့ဘက်က အမှားမဟုတ်ဘူး။ မီးရှော့ဖြစ်လို့ဖြစ်တာလို့ ပြန်ပြောလွှတ်လိုက်တယ်။ ဒါနဲ့ ကျွန်တော်ကိုယ်တိုင်လိုက်သွားမေးတော့ နှစ်ခေါက်တော့ ပြန်သွားရတယ်။ သူတို့တာဝန်ရှိသူနဲ့တွေ့မှ သူတို့ပြန်စစ်ပေးမယ် (၂)ရက်လောက် စောင့်ပါပြောတယ်။ နှစ်ရက်စောင့်ပြီးတော့ သူတို့ဘက်က မှားတာဆိုပြီး ပိုက်ဆံပြန်ပေးတယ်။ အဲဒီမှာ ကျွန်တော်တို့သာ အဲဒီလို သွားမမေးရင်၊ မရှင်းခိုင်းရင် ဒီပိုက်ဆံက ပြန်ရမှာမဟုတ်ဘူး။ ကျွန်တော်တို့လို အလားတူ လုပ်ငန်းရှင်တွေ ဘယ်လောက်ရှိနေမလဲမသိဘူး။ တစ်ခုက ကျွန်တော်တို့တွေက ကိုယ့်မီတာကိုယ် မမြင်ရဘူး။ မီတာယူနစ်က သူတို့ရေးလာတဲ့အတိုင်းပဲ ဆောင်ပေးရတာ
ဟု တာချီလိတ်မြို့မှ လုပ်ငန်းရှင် တစ်ဦးဖြစ်သည့် ကိုဖြိုးက ပြောသည်။
လက်ရှိတွင် ဒေသတွင်း လျှပ်စစ်မီတာခ ကောက်ခံမှုတွင် မိမိတို့အသုံးပြုသည့် မီတာယူနစ်အား အိမ်ရှင်များက ကိုယ်တိုင်ကြည့်ရှုခွင့် မရှိသည့်အပြင် အိမ်ငှါးပိုင်ရှင်များက အိမ်ငှါးများထံ သတ်မှတ် မီတာခ နှုန်းထားထက် ပိုမိုကောက်ခံခြင်းများရှိနေကြောင်း သိရသည်။
ဒီမှာ နောက်တစ်ခုရှိတာက ကျွန်တော်တို့ ဒေသခံတွေက မီတာခကို ဈေးကြီးပေးသုံးနေရပါတဲ့အပြင် အိမ်ငှါးတွေကို မီတာခ တစ်ယူနစ် (၁၀)ဘတ်နှုန်းကောက်နေတယ်။ ဒါက ဘယ်သူ့သတ်မှတ်ချက်နဲ့ ကောက်နေလဲဆိုတာ ကျွန်တော်တို့ မေးထားပေမဲ့ ပြန်ဖြေထားတာမရှိသေးဘူး
ဟု ပြည်နယ်လွှတ်တော် ကိုယ်စားလှယ် ဦးခင်မောင်တင့်က ပြောသည်။
မြို့မီးလင်းရေးကော်မတီက ၂၀၁၈ ခုနှစ်အထိ (၁၅)နှစ်တာကာလအတွင်း နှစ်စဉ်ချုပ်ဆိုခဲ့သည့် ထိုင်းနိုင်ငံမှ လျှပ်စစ်ဓာတ်အား ဝယ်ယူရေးစာချုပ်ချုပ်ဆိုရာတွင် Myanmar Allure Group Co.,Ltd က ထိုင်းနိုင်ငံမှ ဝယ်ယူသည့် မီတာတစ်ယူနစ်လျှင် တစ်ဘတ်နှုန်း အကျိုးဆောင်ခယူ၍ စာချုပ် ချုပ်ဆို ခဲ့ခြင်းဖြစ်ရာ ထိုင်းနိုင်ငံမှ တစ်ယူနစ်လျှင် ထိုင်းဘတ် (၃)ဘတ် (၇၅)ပြားဖြင့် ဝယ်ယူသည့် လျှပ်စစ်မီးကို ဒေသခံများက အိမ်သုံးမီတာအတွက် တစ်ယူနစ်လျှင် (၆)ဘတ်၊ လုပ်ငန်းသုံး မီတာများအတွက် တစ်ယူနစ်လျှင် (၇.၂၅)ဘတ် နှုန်းဖြင့် ပေးဆောင်နေရခြင်းဖြစ်သည်။
ဒေသတွင်း လျှပ်စစ်မီးရယူသုံးစွဲရာတွင် ကြုံတွေ့နေရသည့်အခက်အခဲများနှင့်ပတ်သက်၍ ပြည်သူလူထု၏ တိုင်ကြားစာများ၊ မီးလင်းရေးကော်မတီမှ ဖြေရှင်းချက်များဖြင့် လွှတ်တော်သို့ တင်ပြသွားမည်ဖြစ်ကြောင်း သိရသည်။
