~~~~~~~~⊰❂ unicode ❂⊱~~~~~~~~

မင်းလှမြို့နယ်အတွင်း ခိုးဝင်လာသည့် ဘင်္ဂါလီ (၆)ဦးကို ကူညီပေးသူ (၄)ဦးနှင့်အတူ ဖမ်းမိ
************
မကွေးတိုင်းဒေသကြီး၊ မင်းလှမြို့နယ်အတွင်း ခိုးဝင်လာသည့် ဘင်္ဂါလီ (၆)ဦးနှင့် ခိုးဝင်ရန်ကူညီသူ(၄)ဦးတို့ကို ဖမ်းဆီးရမိသဖြင့် ၂၀၁၈ ခုနှစ်အတွင်း ဖမ်းဆီးရမိထားသည့် ဘင်္ဂါလီ (၁၂၀)ရှိသွားပြီဖြစ်ကြောင်း သိရသည်။

ရဲတပ်ဖွဲ့နှင့်ပူးပေါင်းအဖွဲ့သည် ၂၀၁၈ ခုနှစ် အောက်တိုဘာလ (၂၅)ရက်နေ့ နံနက်(၃)နာရီ(၁၅)မိနစ်အချိန်ခန့်တွင် ရွှေချောင်းတံတား တောင်ဘက် မိုင်တိုင်(၂၃၇/၃)အနီး၌ လူတင်နေသည့် CALDINA အဖြူရောင်ယာဉ်တစ်စီးကို မသင်္ကာသဖြင့် တားဆီးစစ်ဆေးရန်ကြိုးစားစဉ် ပုသိမ်-မုံရွာကားလမ်းအတိုင်း မောင်းနှင်ထွက်ပြေးသွားခဲ့ခြင်း ဖြစ်ကြောင်း သိရသည်။

အဆိုပါယာဉ်ရပ်တန့်ခဲ့သည့်နေရာကိုရှာဖွေရာ ဘင်္ဂါလီ(၆)ဦးအား ယာဉ်ပေါ်တင်ပေးလိုက်သည့် အောင်ဆန်းနှင့် မောင်ဖိုးတို့ကို ဖမ်းဆီးရမိခဲ့ပြီးနောက် ထွက်ပြေးမောင်းနှင်သွားသည့်မော်တော်ယာဉ်ကို တိုင်တားကျေးရွာအနီးတွင် ယာဉ်မောင်း မျိုးဝင်းနှင့် ယာဉ်နောက်လိုက် သူရဇော်တို့နှင့်အတူ ဖမ်းဆီးရမိခြင်းဖြစ်ကြောင်း သိရသည်။

ယင်းနောက် တောထဲတွင်ဖွက်ထားသည့် ဘင်္ဂါလီ(၆)ဦးကို နံနက်(၇)နာရီအချိန်ခန့်တွင် ပုသိမ်-မုံရွာကားလမ်း မိုင်တိုင်အမှတ် (၂၂၇/၁)အနီး၌ ရှာဖွေတွေ့ရှိရကြောင်း သိရသည်။

တရားမဝင် ဝင်ရောက်လာသည့် ဘင်္ဂါလီ (၆)ဦးနှင့် ကူညီပေးသူ (၄)ဦးတို့ကို မင်းတုန်းမြို့မရဲစခန်းတွင် အမှုဖွင့်စစ်ဆေးနေကြောင်း သိရသည်။

ဘင်္ဂလားဒေ့ရှ်နှင့်နယ်စပ် ရခိုင်ပြည်နယ်မှနေ၍ နိုင်ငံသားမဟုတ်သည့် ဘင်္ဂါလီများသည် ငွေကြေးရယူပြီး နိုင်ငံတွင်း ခိုးသွင်းပေးနေသူများအကူအညီဖြင့် လည်းကောင်း၊ တောလမ်းများမှလည်းကောင်း ခိုးဝင်မှုများရှိနေရာ ဒေသတွင်း မသင်္ကာဖွယ် လူစိမ်းတွေ့ရှိပါက ရဲတပ်ဖွဲ့ထံ သတင်းပေးရန် ဒေသခံများအား အသိပေးထားရာ မကွေးတိုင်းအတွင်း လူထု၏သတင်းပေးကူညီမှုများ ရရှိနေကြောင်း ရဲတပ်ဖွဲ့ထံမှ သိရသည်။

သတင်း #ဖီးနစ်
ဓာတ်ပုံ -ရဲစခန်း