~~~~~~~~⊰❂ unicode ❂⊱~~~~~~~~

တာချီလိတ်မြို့တွင် လက်နက်ခဲယမ်းများဖြင့် ဖမ်းဆီးရမိသည့်အမျိုးသား(၂)ဦးအား ဖမ်းဆီးရမိပြီး (၈)ရက်မြောက်နေ့တွင် အမှုဖွင့်ထား
**************
ရှမ်းပြည်နယ်(အရှေ့ပိုင်း) တာချီလိတ်မြို့နယ် လွယ်တော်ခမ်းကျေးရွာအုပ်စုအတွင်း ၂၀၁၈ ခုနှစ်၊ နိုဝင်ဘာလ (၄)ရက်နေ့ နံနက်ပိုင်းက မူးယစ်တပ်ဖွဲ့စုနှင့် တပ်မတော်တို့ ပိတ်ဆို့စစ်ဆေးရေးဆောင်ရွက်စဉ် လက်နက်ခဲယမ်းများနှင့်အတူ ဖမ်းမိသူ(၂)ဦးထံမှ ခဲယမ်းများကို တပ်မတော်က ထပ်မံဖေါ်ထုတ်ဖမ်းဆီးပြီး နိုဝင်ဘာလ(၁၃)ရက်နေ့တွင် ရဲတပ်ဖွဲ့ထံ လွှဲပြောင်းအမှုဖွင့်လိုက်ကြောင်း သိရသည်။

အဆိုပါပူးပေါင်းအဖွဲ့သည် လွယ်တော်ခမ်းကျေးရွာအုပ်စု၊ အာဒီး၊နားကျဲ၊ ပါလ၊ ပါခါးကျေးရွာ လမ်းကြောင်း တစ်လျှောက်တွင် ၂၀၁၈ ခုနှစ်၊ နိုဝင်ဘာလ (၄)ရက်နေ့က ပိတ်ဆို့စစ်ဆေးရေးဆောင်ရွက်နေစဉ်   နံနက်(၈)နာရီအချိန်၌ ပါခါးကျေးရွာဘက်သို့ ယေရှဲဆိုသူ မောင်းနှင်လာပြီး အနောက်တွင် ယာကုပ်ဆိုသူ စီးနင်းလိုက်ပါလာသည့် ဆိုင်ကယ်အား တားဆီးစစ်ဆေးခဲ့ရာမှာ လက်နက်ခဲယမ်းများ ဖမ်းမိခဲ့ခြင်းဖြစ်ကြောင်း သိရသည်။

ယေရှဲ၏ဆိုင်ကယ်နောက်တွင်ထိုင်၍ လိုက်ပါလာသည့် ယာကုပ်၏ ခါးကြားတွင် (၉) မမကျည် (၇)တောင့်ပါသည့် SPORTARMS MSANML FL စာတမ်းပါ ပစ္စတိုသေနတ်တစ်လက်၊ (၁၂)ဗို့ကျည် (၆)တောင့် အသင့်ထည့်ထားသည့် WINCHESTER တံဆိပ် အမေရိကန်နိုင်ငံထုတ် အရှည် (၃၇)လက်မခန့်ရှိ ပြောင်းချောသေနတ်ကို ကျောတွင်လွယ်ထားသည်ကို တွေ့ရပြီး လွယ်အိတ်အတွင်းမှ (၉)မမကျည် (၁၆)တောင့်၊ (၁၂)ဗို့ကျည် (၅)တောင့်တို့ကို သိမ်းဆည်းရမိခဲ့ခြင်းဖြစ်ကြောင်း သိရသည်။

စစ်ဆင်ရေးနယ်မြေအတွင်း လက်နက်များဖမ်းဆီးရမိခြင်းဖြစ်သဖြင့် ဖမ်းဆီးရမိသူ(၂)ဦးအား တပ်မတော်က နယ်မြေခံတပ်ရင်းတွင် ခေါ်ယူစစ်ဆေးရာ ယင်းနေ့ ညနေ(၅)နာရီခွဲအချိန်တွင် ပါခါးကျေးရွာရှိ ယာကုပ်၏နေအိမ်မှ ၉ မမကျည်တောင့် (၇၀)၊ ည (၆)နာရီခွဲအချိန်တွင် ၎င်း၏တောင်ယာတဲအတွင်းမှ  ၉ မမ ကျည်တောင့် (၅၀)၊ ၁၂ ဗို့ကျည် (၂၁)တောင့်တို့ကို ထပ်မံဖမ်းဆီးရမိခြင်းဖြစ်ကြောင်း သိရသည်။

လက်နက်ခဲယမ်းများနှင့်အတူ ဖမ်းဆီးရမိသည့် အသက်(၄၃)နှစ်အရွယ် ယာကုပ်နှင့် အသက်(၂၂)နှစ် အရွယ် ယေရှဲတို့အား နိုဝင်ဘာလ(၁၃)ရက်နေ့တွင် တပ်မတော်က ရဲတပ်ဖွဲ့ထံ ပြန်လည်လွှဲပြောင်းပေးလိုက်ပြီး တာချီလိတ်မြို့မရဲစခန်းတွင် (ပ)၃၉၇/၂၀၁၈၊ ရှမ်းပြည်နယ်လက်နက်အမိန့်အပိုဒ် ၁၂(က)ဖြင့် အမှုဖွင့်ဆောင်ရွက်ထားကြောင်း သိရသည်။

Tachileik News Agency
ဓါတ်ပုံ - ရဲတပ်ဖွဲ့