~~~~~~~~⊰❂ unicode ❂⊱~~~~~~~~

"သုံးရက်တာ အလွတ်သဘော တွေ့ဆုံဆွေးနွေးမှုက ကျွန်တော်တို့ ညီလာခံပြီးတဲ့နောက်ပိုင်းမှာ NCA လက်မှတ်ထိုးထားတဲ့ တိုင်းရင်းသားလက်နက်ကိုင်အဖွဲ့အစည်းအချို့က တရားဝင်ဆွေးနွေးမှုတွေ ခေတ္တ ဆိုင်းငံ့ထားမယ်ဆိုတာကြောင့် အလွတ်သဘော လာရောက်တွေ့ဆုံဆွေးနွေးတာပါ။ တရားဝင် တွေ့ဆုံ ဆွေးနွေးမှုတွေ ပြန်စနိုင်ဖို့ပေါ့။ ကျွန်တော်တို့ RCSS ရော၊ KNU ရောနှစ်ဖွဲ့စလုံးနဲ့ တွေ့ပါတယ်။ တွေ့တဲ့ အချိန်မှာ သူတို့စိုးရိမ်မှုတွေအပေါ် ကျွန်တော်တို့ဘက်က ရှင်းပြတယ်။ ဒီအတွက်သူတို့ဘက်ကလည်း ထိုက်သင့်တဲ့ နားလည်မှုရှိတယ်။ နောက် NCA လက်မှတ်မထိုးထားတဲ့ အဖွဲ့နှစ်ဖွဲ့ဖြစ်တဲ့ KNPP၊ KIO အဖွဲ့တွေနဲ့လည်းတွေ့တယ်။ KNPP နဲ့က ယုံကြည်မှုတည်ဆောက်တဲ့နေရာမှာ အောက်ခြေမှာ ရှိနေသူအချို့ ဆောင်ရွက်ချက်ကြောင့် လိုအပ်မှုရှိတာတွေ ဆွေးနွေးဖြစ်တယ်။ NCA လက်မှတ် ရေးထိုးနိုင်ရေး အတွက် ညှိနှိုင်းစရာအချက် မကျန်တော့ဘူး။ လက်မှတ်ရေးထိုးဖို့စဉ်းစားဆုံးဖြတ်ဖို့ ကျန်နေတာပဲ ရှိနေတဲ့အချိန်မှာ ကျွန်တော်တို့ကိုယ်စားလှယ်အဖွဲ့ရဲ့ ရှင်းပြမှုကြောင့် NCA စာချုပ်ကို မြန်မြန်လက်မှတ်ရေးထိုးနိုင်မယ်လို့ မျှော်လင့်ပါတယ်။ KIO ကတော့ ဆွေးနွေးတဲ့ပုံစံထက် သူတို့ ဘက်ကရှိတဲ့ သဘောထားကို လာရှင်းပြတဲ့သဘောပါ” ဟု အလွတ်သဘော တွေ့ဆုံဆွေးနွေးခဲ့သည့် အခြေအနေနှင့် ပတ်သက်၍ UPDJC အတွင်းရေးမှူးအဖွဲ့ဝင် ဦးလှမောင်ရွှေက ပြောသည်။

NCA လက်မှတ်ရေးထိုးခြင်း (၃) နှစ်ပြည့်အဖြစ် ၂၀၁၈ ခုနှစ် အောက်တိုဘာလ (၁၅) ရက်နေ့က NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့များ၊ အစိုးရ၊ တပ်မတော်နှင့် လွှတ်တော် အဖွဲ့အစည်းတို့ နပြေည်တော်တွင် အလွတ်သဘောတွေ့ဆုံဆွေးနွေးကြပြီးနောက် KNU က ငြိမ်းချမ်းရေးဆွေးနွေးပွဲများတွင် တရားဝင် ပါဝင်ခြင်းအား ရပ်ဆိုင်းထားမည်ဖြစ်ကြောင်းနှင့် RCSS ကလည်း ပြည်နယ် ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးသဘော တူညီချက်များနှင့် ပတ်သက်၍ တပ်မတော်နှင့် သီးသန့်ပြန်လည်ဆွေးနွေး ညှိနှိုင်းမည်ဟု နိုဝင်ဘာလအတွင်း ထုတ်ပြန်ထားကြခြင်းဖြစ်သည်။

ငြိမ်းချမ်းရေး ကော်မရှင်နှင့် NCA စာချုပ် လက်မှတ်ရေးထိုးထားသည့် KNU နှင့် RCSS၊ NCA စာချုပ် လက်မှတ်မထိုးရသေးသည့် KNPP နှင့် KIO တို့ အလွတ်သဘောတွေ့ဆုံဆွေးနွေးကြခြင်းဖြစ်ကြောင်း သိရသည်။

"နှစ်ဖက်စလုံးရဲ့ သဘောထားတွေက အခုသွားနေတဲ့ NCAလမ်းကြောင်းကနေ မသွေဖည်ဘူးဆိုတာ နှစ်ဖက်စလုံးရဲ့ သဘောထားကခိုင်ခိုင်မာမာရှိတယ်။ ဒီလမ်းကြောင်းမှာ ဖြစ်နေတဲ့ အခက်အခဲတွေ ဆွေးနွေးတယ်။ (၁) NCAကိုတန်ဖိုးထားတယ်။ အလေးထားတယ်။ နှစ်ဦး နှစ်ဖက်စလုံး ဒါကို မပျောက်ပျက်စေချင်ဘူး။ (၂)သူ့ဘက်ကိုယ့်ဘက် သက်ဆိုင်ရာ ခေါင်းဆောင်တွေကို ကျွန်တော်တို့ရဲ့ ဆွေးနွေးမှု အခြေအနေကို ပြန်တင်ပြပြီးရင် အမြန်ဆုံးပြန်တွေ့ပါမယ်။ (၃) ခဏရပ်ဆိုင်းသွားတဲ့ အနေအထားကနေ ပုံမှန်အတိုင်းဖြစ်ဖို့ အမြန်ဆုံး ကြိုးစားမယ်။ နှစ်လသုံးလ အတွင်းလည်း ဖြစ်သွားနိုင်တယ်။ ဒီထက်မြန်အောင်လည်း ကြိုးပမ်းသွားမယ်”ဟု KNU နှင့် တွေ့ဆုံဆွေးနွေးမှုများနှင့် ပတ်သက်၍ နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ်ဦးဇော်ဌေးက ပြောသည်။

NCA လက်မှတ်ရေးထိုးထားသည့် RCSS နှင့်အလွတ်သဘောဆွေးနွေးရာတွင် ပစ်ခတ်တိုက်ခိုက်မှုရပ်စဲရေး ဆိုင်ရာ ပူးတွဲစောင့်ကြည့်ရေးကော်မတီ(JMC)ကိစ္စရပ်များကိုဆွေးနွေးခဲ့ကာ KNUနှင့် တရားဝင် အစည်းအဝေးများ ပြန်လည်စတင်နိုင်ရေးတို့ကို ဆွေးနွေးခဲ့ခြင်းဖြစ်ကြောင်း သိရသည်။

“KNU အနေနဲ့ နိုင်ငံရေးပြဿနာကို နိုင်ငံရေးနည်းလမ်းနဲ့ အဖြေရှာသွားမယ်လို့ တောက်လျှောက် ပြောထားတယ်။ NCA ကနဖြေစ်လာတဲ့ နိုင်ငံရေးဆွေးနွေးပွဲ လမ်းကြောင်းဆိုတာ နိုင်ငံရေးဆွေးနွေးမှုတွေ စနိုင်ဖို့ ပထမဆုံးခြေလှမ်းလို့ မြင်တယ်။ အကျေအလည် ညှိနှိုင်းဆွေးနွေးခြင်းနဲ့ မကျေလည်မှုတွေ၊ မတူညီမှုတွေကို အင်အားသုံးဖြေရှင်းခြင်း မပြုရဆိုတဲ့ အရာမျိုးတွေကလည်း ပါနေတဲ့အတွက် ရေရှည်တည်တံ့ခိုင်မြဲတဲ့ ငြိမ်းချမ်းရေးကို ရှေးရှုနေပါတယ်။ ကျွန်တော်တို့ ပြည်သူလူထုကို ပြောချင် တာကတော့ ကျွန်တော်တို့ လက်မှတ်ထိုးထားတဲ့ NCA လမ်းကြောင်းသည် အသင့်တော်ဆုံး လမ်းကြောင်း တစ်ခုဖြစ်ပြီးတော့ ဒီအခြေခံကနေ တစိုက်မတ်မတ် ဆက်သွားမယ်။ ဆက်သွား တဲ့နေရာမှာ NCA လမ်းကြောင်းသည် မှန်ကန်ပြီး တရားမျှတတဲ့လမ်းကြောင်းဖြစ်အောင် ဆက်ပြီးကြိုးစား သွားမယ်”ဟု KNU အထွေထွေ အတွင်းရေးမှူး ပဒိုစောတာဒိုမှူးက ပြောသည်။

အလွတ်သဘော တွေ့ဆုံဆွေးနွေးမှုတွင် ငြိမ်းချမ်းရေး ကော်မရှင်အတွင်းရေးမှူး ဦးခင်ဇော်ဦး၊ အဖွဲ့ဝင် ဦးအောင်စိုး၊ နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ်ဦးဇော်ဌေး၊ ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ(UPDJC) အတွင်းရေးမှူးအဖွဲ့ဝင် ဦးလှမောင်ရွှေ၊ နည်းပညာ အထောက်အကူပြုအဖြစ် ဦးကျော်လင်းဦးတို့ ပါဝင်သည့် အစိုးရကိုယ်စားလှယ်အဖွဲ့နှင့် ရှမ်းပြည်ပြန်လည် ထူထောင်ရေးကောင်စီ (RCSS) ဥက္ကဋ္ဌ ဦးယွက်ဆစ် ခေါင်းဆောင်သည့် ကိုယ်စားလှယ်အဖွဲ့၊ ကရင်အမျိုးသား အစည်းအရုံး (KNU) အထွေထွေအတွင်းရေးမှူး ပဒိုစောတာဒိုမှူး ဦးဆောင်သည့် ကိုယ်စားလှယ်အဖွဲ့၊ ကရင်နီအမျိုးသားတိုးတက်ရေးပါတီ (KNPP) ဒုတိယ ဥက္ကဋ္ဌခူဦးရယ် ဦးဆောင်သည့် ကိုယ်စားလှယ်အဖွဲ့နှင့် ကချင်လွတ်လပ်ရေးအဖွဲ့(KIO)ကိုယ်စားလှယ်တို့ တွေ့ဆုံ ဆွေးနွေးကြခြင်း ဖြစ်ကြောင်း သိရသည်။

တိုင်းရင်းသားလက်နက်ကိုင်အဖွဲ့(၈)ဖွဲ့နှင့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (Nationwide Ceasefire Agreement - NCA)ကို ၂၀၁၅ ခုနှစ်၊ အောက်တိုဘာလ (၁၅)ရက်နေ့တွင် ကနဦး လက်မှတ်ရေးထိုးနိုင်ခဲ့ပြီး လက်ရှိတွင် NCA လက်မှတ်ရေးထိုးထားသည့် တိုင်းရင်းသား လက်နက်ကိုင် (၁၀)ဖွဲ့ရှိနခြေင်းဖြစ်သည်။

Tachileik News Agency
ဓာတ်ပုံ - NRPC