~~~~~~~~⊰❂ unicode ❂⊱~~~~~~~~

DOLE Thailand အလုပ်ရုံမှ မြန်မာလုပ်သား (၁၀၀)ကျော်ကို အလုပ်ထုတ်လိုက်ကာ အလုပ်ပြန်ဝင်လိုပါက တစ်ဦးလျှင် ဘတ်(၃၅၀၀) ပေးရန်တောင်းခံနေကြောင်း မြန်မာလုပ်သားများက ၂၀၁၈ ခုနှစ် သြဂုတ်လ (၂၈)ရက်နေ့တွင် ထိုင်းနိုင်ငံရှိ အလုပ်သမားသံအရာရှိရုံးသို့ ဆက်သွယ် အကူအညီတောင်းခံလာခြင်း ဖြစ်ကြောင်း သိရသည်။

အဆိုပါ ဖြစ်စဉ်နှင့် ပတ်သက်၍ အလုပ်သမားသံအရာရှိရုံးက စက်ရုံတာဝန်ရှိသူများအား ဆက်သွယ်ပြီး MOEAF မှ တာဝန်မှူးဦးဆောင်သည့်အဖွဲ့ကို သြဂုတ်လ (၂၉)ရက်နေ့တွင် စေလွှတ်ညှိနှိုင်းစေခဲ့ရာ ညှိနှိုင်းမှု အဆင်မပြေသဖြင့် စက်တင်ဘာလ (၁)ရက်နေ့၌ အလုပ်သမားသံအရာရှိရုံးမှ ဆဝါဒီကန် (ရုံးချုပ်)၊ DOE (ရုံးချုပ်) ဒေသအာဏာပိုင်တို့ဖြင့် ဆက်သွယ်ပြီး ညှိနှိုင်းဆောင်ရွက်ခဲ့ခြင်းဖြစ်ကြောင်း သိရသည်။

ထိုင်းနိုင်ငံအလုပ်သမားဝန်ကြီးဌာနလက်အောက်ရှိ ခရိုင်အဆင့်တာဝန်ရှိသူများ၊ ဒေသအာဏာပိုင်များ၊ အလုပ်သမားသံအရာရှိနှင့် MOEAF မှ တာဝန်ရှိသူများသည် စက်ရုံတာဝန်ရှိသူများနှင့် အောက်တိုဘာလ (၂)ရက်နေ့တွင် တွေ့ဆုံဆွေးနွေးမှုများ လုပ်ဆောင်နိုင်ခဲ့ခြင်းဖြစ်ကြောင်း သိရသည်။

အလုပ်သမားသံအရာရှိရုံးအနဖြေင့် စက်ရုံတာဝန်ရှိသူများ၊ မြန်မာလုပ်သားများနှင့် တွေ့ဆုံညှိနှိုင်းမှုများမှ လေ့လာတွေ့ရှိချက်များအရ အဆိုပါစက်ရုံသည် ယခင်ကတရားမဝင် အလုပ်သမားများဖြင့် လုပ်ငန်း လည်ပတ်နေရာမှ ၂၀၁၇ ခုနှစ်တွင် အလုပ်သမားများအား CI စာအုပ်များ ပြုလုပ်ပေးခြင်း၊ MOU –U turn စနစ်ဖြင့် ပြန်လည်ဆောင်ရွက်ပေးခြင်းများကို ဆောင်ရွက်ပေးထားကာ ၂၀၁၇ ခုနှစ် အတွင်း MOU ဖြင့် လူသစ် (၂)ကြိမ် ခေါ်ယူထားကြောင်း သိရသည်။

အဆိုပါ စက်ရုံသည် သစ်သီးမျိုးစုံမှစားသောက်ကုန်ထုတ် နိုင်ငံတကာအဆင့်မီလုပ်ငန်းတစ်ခုဖြစ်ပြီး တစ်နှစ်လျှင် ရက် (၃၀) ခန့် အလုပ်နားသည့်အချိန်များတွင် နှစ်စဉ် အလုပ်သမားများက အဆိုပါကာလ၌ ခွင့်ပြန်လေ့ရှိကြောင်း သိရသည်။

ယခုနှစ်တွင် အလုပ်နားချိန်ခွင့်ပြန်သည့် အလုပ်သမားများအား ခွင့်ပြန် ( Reentry တုံး ထုပေးရမည့်အစား) ဆောင်ရွက်ပေးရမည့် အစား ထိုင်းနိုင်ငံ အလုပ်အကိုင်ဌာန ပုဒ်မ ၁၃ အရ (၁၅) ရက်ထက်ကျော်လွန်၍ အလုပ်ရုံမှ ကင်းကွာသော အလုပ်သမားများအား အလုပ်ထုတ်စာ (ဘိုင်ကျန့်အော်)ထုတ်ပေးလိုက်ပြီး အလုပ်သမားများ ပြန်လည် ရောက်ရှိချိန်တွင် နောက်တစ်ကြိမ် ထပ်မံ၍ အလုပ်အသစ်လျှောက်ခြင်းကဲ့သို့ ဆောင်ရွက်စခြေင်းဖြစ်ကြောင်း စစ်ဆေးတွေ့ရှိရသည်ဟု သိရသည်။

ယင်းကဲ့သို့ အလုပ်ထုတ်ခံရသည့် မြန်မာလုပ်သား (၁၀၀)ကျော်မှာ အဆိုပါစက်ရုံတွင် အနည်းဆုံး လုပ်သက် (၄)နှစ်အထိ ရှိသူများဖြစ်ပြီး အများစုမှာ CI ဖြင့် နေထိုင်သူများဖြစ်ကြောင်း သိရသည်။

အလုပ်သမားများအား အလုပ်ထုတ်ပစ်ခြင်းမှာ အလုပ်ရုံ၏ မန်နေဂျာအသစ်ဖြစ်သူက အလုပ်သမား အဟောင်းများထံမှ စမတ်ခအား တရားမဝင်သော နည်းလမ်းဖြင့် ရရှိနိုင်ရန် စီမံခန့်ခွဲမှုအပိုင်းမှ ပူးပေါင်းကြံစည်ခြင်းဖြစ်နိုင်သည်ဟု အလုပ်သမားသံအရာရှိရုံးက သုံးသပ်ထားသည်။

အလုပ်သမား အခွင့်အရေးချိုးဖောက်သည့် အဆိုပါ စက်ရုံအား အမည်ပျက်စာရင်း ထည့်သွင်း ဆောင်ရွက်သွားရန် ထိုင်းနိုင်ငံရှိ အလုပ်သမားဝန်ကြီးဌာနမှ ဆက်လက်အရေးယူနိုင်ရေး ပေးပို့ ဆောင်ရွက်နိုင်ကြောင်း သိရသည်။

ယင်းကဲ့သို့ ဆဝါဒီကန်နှင့် တရားစွဲဆိုထားစဉ် ကာလအတွင်း အလုပ်သမားများ အခက်အခဲ မရှိစေရေး အတွက် ပကျွတ်ခရိုင်ရှိ QPP နှင့် လပ်ပူရီ Thaitan စက်ရုံများသို့ အလုပ်ပြောင်းရွှေ့နိုင်ရေး စီစဉ်ဆောင်ရွက်ပေးနေကြောင်း သိရသည်။

Tachileik News Agency
ဓာတ်ပုံ - LA Thailand