~~~~~~~~⊰❂ unicode ❂⊱~~~~~~~~

အလွတ်တန်းဓာတ်ပုံပြိုင်ပွဲအား စည်းကမ်းချက်(၁၃) ချက်သတ်မှတ်ထားပြီး မြို့လုံးကျွတ်ဘုံကထိန် ပဒေသာပင်လှည့်လည်ပွဲ၊ မသိုးသင်္ကန်း ယှဉ်ပြိုင် ရက်လုပ်ကပ်လှူပွဲ၊ မီးပဒေသာပင်လှည့်လည်ပူဇော်ပွဲ (၂) နေ့လွှတ်၊ တစ်ကောင်ချင်း၊ အုပ်စုအရုပ် (၃)ယမ်းမီးကြီးညလွှတ် (၄) စိန်နားပန်၊ပွဲတော်ရှုခင်း၊ ကွင်းဖွင့်ပွဲရှုခင်း ခေါင်းစဉ်လေးခုဖြင့် ပြိုင်ပွဲဝင်နိုင်မည်ဖြစ်ကြောင်း သိရသည်။

“ပြိုင်ပွဲပုံတွေကိုတေ တောင်ကြီး ပြန်ကြားရေးနဲ့ ပြည်သူ့ဆက်ဆံရေးရုံးမှာ ပို့ရမယ် တန်ဆောင်မုန်းလပြည့်ကျော် (၁)ရက်နေ့ နောက်ဆုံးပေါ့။ အရင်နှစ်တွေကတော့ ဓာတ်ပုံ ပြိုင်ပွဲတော့ လုပ်ဖြစ်ပေမဲ့ ပြပွဲတော့ မလုပ်ဖြစ်သေးဘူးပေါ့။ ဒီနှစ်ကျတော့ ဓာတ်ပုံပြပွဲပါ ထည့်သွင်းသွားဖို့ ကျွန်တော်တို့ အစည်းအဝေးမှာ ပြန်ဆက်ဦးစီးမှူးနဲ့ ဆွေးနွေးတယ် တင်ပြထားတာ ရှိတယ် လုပ်ဖြစ်ဖို့ မလုပ်ဖြစ်ဖို့က သက်ဆိုင်ရာတွေဘက်က အကြောင်းမပြန်သေးဘူး။ ပြိုင်ပွဲကိုတော့ လုပ်သွားမှာ ဖြစ်ပါတယ်̎ ဟု ရှမ်းပြည်နယ်ဓာတ်ပုံအသင်း ဥက္ကဌ ဦးမောင်ကြီးက တာချီလိတ်သတင်းအေဂျင်စီသို့ ပြောသည်။

ပြိုင်ပွဲ ဝင်ရောက်ယှဉ်ပြိုင်မည့် သူများအနဖြေင့် ၂၀၁၈ ခုနှစ်၊ နိုဝင်ဘာလ (၂၃) ရက်နေ့ နံနက် (၁၀)နာရီ နောက်ဆုံးထား၍ တောင်ကြီးမြို့ရှိ ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံးသို့ ပြိုင်ပွဲဝင် ဓာတ်ပုံအရေအတွက်နှင့် အတူ ပေးပို့ရမည် ဖြစ်ကြောင်း သိရသည်။

ပြိုင်ပွဲဝင် ဆုရဓာတ်ပုံများကို ခေါင်းစဉ်အလိုက် ပထမဆု (၄၀၀,ဝဝဝ) ကျပ်၊ ဒုတိယဆု(၃၀၀,ဝဝဝ)ကျပ်၊ တတိယဆု (၂၀၀,ဝဝဝ) ကျပ်နှင့် နှစ်သိမ့်ဆု (၁၀၀,ဝဝဝ) ကျပ်နှုန်းဖြင့် ချီးမြှင့်ပေးသွားမည်ဖြစ်ကြောင်း သိရသည်။

ယခုနှစ်တောင်ကြီး တန်ဆောင်တိုင်ပွဲတော်အား မူလက (၉)ရက်သာ ကျင်းပသွားရန် စီစဉ် ထားသော်လည်း ဒေသခံများ၏ တောင်းဆိုချက်အရ (၁၀) ရက် ကျင်းပသွားရန် ပွဲကျင်းပရေးကော်မတီက အတည်ပြုလိုက်ရာ နိုဝင်ဘာလ (၁၄) ရက်နေ့မှ (၂၃) ရက်နေ့အထိ ကျင်းပမည်ဖြစ်ကာ ရိုးရာမီးပုံးပျံပြိုင်ပွဲ၊မသိုးသင်္ကန်း ယက်လုပ် ပူဇော် ပြိုင်ပွဲ၊ မီးပဒေသာ လှည့်လည်ပူဇော်ပွဲ၊ မြို့လုံးကျွတ် ဘုံကထိန် လှည့်လည် ပူဇော်ပွဲ နှင့် ဓာတ်ပုံပြိုင်ပွဲများပါ ထည့်သွင်းကျင်းပသွားမည် ဖြစ်ကြောင်း သိရသည်။

ယခုနှစ်ပြိုင်ပွဲဝင်မည့် မီးပုံးများတွင် အသုံးပြုသည့် ပစ္စည်းများကို တရုတ်နိုင်ငံမှတင်သွင်းသည့် အသင့်လုပ် ပစ္စည်းများ အသုံးပြုခွင့် ပေးမထားဘဲ ဒေသထွက်ပစ္စည်းများဖြင့်သာ ပြုလုပ်ရန် စည်းကမ်းချက် ထုတ်ပြန်ထားသည်ကိုလည်း တွေ့ရသည်။

ဓါတ်ပုံပြိုင်ပွဲနှင့်ပတ်သက်၍ ရှမ်းပြည်နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံး တောင်ကြီး 081-2121136၊ 09440081318 နှင့် ရှမ်းပြည်နယ်ဓါတ်ပုံသင်း  09795124470 တို့သို့ ဆက်သွယ်နိုင်ကြောင်း သိရသည်။

သတင်း - ဆန်းဖြိုးထွန်း၊ နိုနို
ဓာတ်ပုံ - PHILIP HEIJMANS ( AL JAZEERA )